சத்திய வார்த்தை

தீமை செய்யாதிருங்கள்

2011-09-27T00:42:00.000+05:30

வேத பகுதி: நீதிமொழிகள் 17: 13

"நன்மைக்குத் தீமை செய்கிறவன் எவனோ அவன் வீட்டை விட்டுத் தீமை நீங்காது" நீதிமொழிகள் 17: 13

நன்மைக்குத் தீமை செய்வது மனிதத்தன்மை கிடையாது. ஆனால் நாம் நமக்கு நன்மை செய்தவர்களுக்குப் பதிலாக பல வேளைகளில் தீமை செய்து விடுகின்றோம் ஜென்ம சுபாவத்தில் பிறந்த நமது எண்ணங்கள் நம்மை அப்படிச் செய்யத் தூண்டுகின்றது. நன்மைக்குத் தீமை செய்கின்ற நம்மால் தீமைக்கு நன்மை செய்ய முடிவதில்லை. ஆண்டவராகிய இயேசு கிறிஸ்துவும் தன்னுடைய உபதேசங்களிளெல்லாம் பகைவனையும் நேசிக்க வேண்டும் தீமைக்குப் பதிலாக நன்மை செய்ய வேண்டும் என்பதை வலியுறுத்தியுள்ளார். நம்மால் தீமை செய்தவர்களுக்கு நன்மை செய்ய வேண்டும் என்பது மிகவும் கடினமாக இருக்கின்றது. ஏனென்றால் பாவத்தில் பிறந்த நம்மால் தீமைக்கு நன்மை செய்ய முடியாது. ஆனால் கிறிஸ்துவுக்குள்ளாக நம்முடைய வாழ்க்கையை அர்ப்பணிக்கும் போது தேவ ஒத்தாசையால் நன்மை செய்து நமக்குத் தீமை செய்பவர்களையும் ஆண்டவரண்டை நடத்த முடியும்.

தாவீது ராஜாவின் வாழ்க்கையை நாம் பார்ப்போமானால், தாவீது ராஜா தனக்கு விசுவாசமாக, உண்மையான போர்ச்சேவகனாக இருந்த உரியாவைப் போர்முனையில் வைத்து எதிரிகளால் உரியாவைக் கொன்று உரியாவின் மனைவியை தனக்கு மனைவியாக்குகின்றான். கர்த்தர் இதனைப் பார்த்துக் கொண்டு சும்மா இருக்கவில்லை. நாத்தான் தீர்க்கதரிசியின் மூலமாக தாவீதைக் கடிந்து கொண்டு, அவன் செய்த தீமைக்கு அவனுக்குக் கிடைத்த சாபம் "பட்டயம் உன் வீட்டை வீட்டு என்றும் விலகாதிருக்கும்". இந்த சாபம் அவனுடைய வாழ்க்கையில் நிறைவேறியது. நாமும் நன்மைக்குத் தீமை செய்யும் போது நம்மை விட்டு தீமை என்றும் நீங்காது. ஆனால் நாம் நமக்குத் தீமை செய்தவர்களுக்குப் பதிலாக நன்மை செய்யும் போது கர்த்தர் நாம் செய்த நன்மைக்குப் பதிலாக நம்மை அதிகமாக ஆசீர்வதித்து வழி நடத்துவார்.

சிந்தனை: இன்னா செய்தாரை ஒறுத்தல் அவர்நாண நன்னயஞ் செய்து விடல்ஜெபம்: அன்பு நிறைந்த இயேசு கிறிஸ்துவே, நாங்கள் எங்களுக்குத் தீமை செய்கின்றவர்களுக்கு நன்மை செய்ய எங்களுக்குக் கிருபை புரியும். அதன் மூலமாக உமது அன்பை மற்றவர்களும் கண்டு கொள்ள உதவி செய்யும். ஆமேன்.

தமிழ் வேதாகமம் படிக்க இங்கே சொடுக்கவும்

பகைவனையும் நேசி

2010-06-14T21:30:00.001+05:30

வேத பகுதி: I சாமுவேல் 26

"சவுல் தாவீதை நோக்கி: என் குமாரனாகிய தாவீதே, நீ ஆசீர்வதிக்கப்பட்டவன்; நீ பெரிய காரியங்களைச் செய்வாய்; மேன்மேலும் பலப்படுவாய் என்றான்" 1 சாமுவேல் 26 : 25

தாவீது இஸ்ரவேல் ஜனங்கள் மத்தியில் சவுல் ராஜாவை விடப் பெயர் பெற்றவனாக மாறுகின்றான். இதனைப் பொறுக்க முடியாத சவுல் தாவிதைக் கொலை செய்ய நினைக்கின்றான். இதை அறிந்த தாவீது சவுலுக்குத் தப்பி ஒடுகின்றான். சவுல் தாவீதைப் பின் தொடருகின்றான். ஒரு மலையில் தாவீதும் இன்னொரு மலையில் சவுலும் இருக்கின்றார்கள். சவுலின் கூட்டத்தார் தூங்குகின்ற வேளையில் தாவீதும் அபிசாயும் சவுல் இருக்கின்ற இடத்திற்கு வருகின்றார்கள். அபிசாய் தாவீதிடம் நம்முடையப் எதிரியாய் இருக்கின்ற சவுலைக் கொன்று போடுவோம் என்று தாவீதிடம் கூறுகின்றான். ஆனால் தாவீதோ சவுலைத் தப்ப விட்டு சவுலுடைய ஈட்டியையும் தண்ணீர்ச் சொம்பையும் எடுத்துக் கொண்டு வருகின்றார்கள். தாவீது தன்னுடைய இடத்திற்கு வந்து சவுலின் கூட்டத்தாரிடம் பேசுகின்றான். இதனை உணர்ந்த சவுல் தாவீதை நீ மேன்மேலும் பலப்படுவாய் என்று ஆசீர்வதித்து தன் வழியே செல்லுகின்றான்.

ஆம் பிரியமானவர்களே நமது ஆண்டவராகிய இயேசு கிறிஸ்துவும் "உங்கள் சத்துருக்களைச் சிநேகியுங்கள்; உங்களைச் சபிக்கிறவர்களைச் ஆசீர்வதியுங்கள்; உங்களைப் பகைக்கிறவர்களுக்கு நன்மை செய்யுங்கள்; உங்களை நிந்திக்கிறவர்களுக்காகவும் உங்களைத் துன்பப்படுத்துகிறவர்களுக்காகவும் ஜெபம்பண்ணுங்கள். இப்படிச் செய்வதினால் நீங்கள் பரலோகத்திலிருக்கிற உங்கள் பிதாவுக்குப் புத்திரராயிருப்பீர்கள். மத்தேயு 5: 44,45" என்று தனது மலைப் பிரசங்கத்தில் கூறுகின்றார். நாமும் நமது சத்துருக்களாய், பகைஞர்களாய் இருக்கின்றவர்கள் செய்கின்றத் தீமையானக் காரியங்களுக்குப் பதிலாக நன்மையைச் செய்வோமானால் அவர்களும் நமது நல்ல நடக்கைகளைப் பார்த்து கிறிஸ்துவின் அன்பினை அறிந்து கொள்வார்கள்.நம்மையும் கர்த்தர் ஆசீர்வத்து வழிநடத்துவார்.

சிந்தனை: நான் எனக்குத் தீங்கு செய்கிறவர்களுக்குப் பதிலாகத் தீங்கு செய்கின்றேனா அல்லது கிறிஸ்துவின் அன்பினைக் காட்டுகின்றேனா?

ஜெபம்: அன்பின் தேவா, நான் எனக்குத் தீமை செய்கிறவர்களுக்குப் பதிலாக நன்மையைச் செய்யும்படிக் கிருபையத் தந்து அதன் மூலமாக உம்முடைய நாமம் மகிமைப் படும் படி செய்யும். ஆமேன்.
தமிழ் வேதாகமம் படிக்க இங்கே சொடுக்கவும்

உண்மையான நட்பு

2010-03-23T01:19:00.001+05:30

வேத பகுதி: I சாமுவேல் 20: 1 - 17

"யோனத்தான் தாவீதை மிகவும் சிநேகித்தபடியினால், பின்னும் அவனுக்கு ஆணையிட்டான். தன் உயிரைச் சிநேகித்ததுபோல அவனைச் சிநேகித்தான்." I சாமுவேல் 20: 17

சவுல் தாவீதைக் கொல்ல நினைக்கின்றான். இதனைப் பல்வேறு சூழ்நிலைகளினால் உணர்ந்து கொண்ட தாவீது யோனத்தானிடம் பேசுகின்ற நிகழ்ச்சி தான் இந்தப் பகுதியிலே குறிப்பிடப்பட்டுள்ளது. வேதாகமத்திலே ஒரு சிறந்த நட்பைக் கூற வேண்டுமானால் யோனத்தான் மற்றும் தாவீதின் இடையில் உள்ள நட்பைக் குறிப்பிடலாம். யோனத்தான் ராஜாவுடையக் குமாரன், சவுலுக்குப் பின்பு ராஜாவாக வேண்டியவன். ஆனால் யோனத்தான் தாவீதிடம் "என் தகப்பனாகிய சவுலின் கை உம்மைக் கண்டு பிடிக்க மாட்டாது; நீர் இஸ்ரவேலின்மேல் ராஜாவாயிருப்பீர் அப்பொழுது நான் உமக்கு இரண்டாவதாயிருப்பேன்; அப்படி நடக்கும் என்று என் தகப்பனாகிய சவுலும் அறிந்திருக்கிறார்" I சாமுவேல் 23:17 . என்று கூறுகின்றார். நண்பணுக்காகத் தன்னுடையப் பதவியைக் கூட விட்டுக் கொடுக்கும் படி யோனத்தான் ஆயத்தமாக இருக்கின்றார்.

பிரியமானவர்களே நம்முடைய நட்புகள் எப்படிப்பட்டவைகளாயிருக்கின்றது என்று எண்ணிப் பார்ப்போம். நம்முடைய நட்பு தாவீது மற்றும் யோனத்தானுடைய நட்பைப் போல இருக்கின்றதா? புற பாலினத்தவரிடம் பலகும் போது நாம் எப்படிப்பட்ட நட்புடன் பழகுகின்றோம்? உண்மையான நட்புடனா? அல்லது தவறான எண்ணத்துடனா? சிந்தித்துப் பார்ப்போம். எனக்கு உண்மையான நண்பர்கள் கிடைக்கவில்லையே என்று கவலைப்படுகிறீர்களா? கவலையை விட்டு விட்டு நம்முடையப் பாவங்களுக்காக அக்கிரமங்களுக்காக தன்னுடைய இரத்தத்தைச் சிலுவையில் சிந்தின உண்மையான நண்பராம் இயெசு கிறிஸ்து உங்களுக்காகக் காத்துக் கொண்டு இருக்கிறார். உங்களை அவரிடம் ஒப்புக்கொடுக்கும் போது அவர் உங்களைச் செவ்வையானப் பாதையிலே வழிநடத்துவார்.

சிந்தனை: என்னுடைய நட்பு எப்படிப்பட்ட நட்பாயிருக்கின்றது?

ஜெபம்: அன்பின் இயேசு கிறிஸ்துவே நல்ல நண்பணாகிய உம்மிடம் என்னையே அர்ப்பணிக்கின்றேன். நீரே என்னைச் செவ்வையானப் பாதையிலே வழி நடத்தி இந்த உலக வாழ்க்கையிலே உமக்குச் சாட்சியாக வாழ அருள் புரியும். ஆமேன்.
தமிழ் வேதாகமம் படிக்க இங்கே சொடுக்கவும்

யார் இறைவனின் வீட்டில் தங்குவான்?

2010-03-01T19:27:00.005+05:30

வேத பகுதி: சங்கீதம் 15:1 - 5

"கர்த்தாவே, யார் உம்முடைய கூடாரத்தில் தங்குவான்? யார் உம்முடைய பரிசுத்த பர்வதத்தில் வாசம் பண்ணுவான்? உத்தமனாய் நடந்து, நீதியை நடப்பித்து, மனதாரச் சத்தியத்தைப் பேசுகிறவன்தானே." சங்கீதம் 15: 1,2

தாவீது ராஜா சங்கீதம் 15 ஆம் அதிகாரம் முதலாம் வசனத்தில் யார் இறைவனின் வீட்டில் தங்குவான்? என்று கேள்வையைக் கேட்டுவிட்டு அதற்கானப் பதில்களை மீதியுள்ள வசனங்களில் குறிப்பிடுகின்றார். நாம் கர்த்தருடையக் கூடாரத்தில் அதாவது பரலோகப் பாக்கியத்திற்கு நம்மிடம் காணப்பட வேண்டியக் குணாதிசயங்கள்

உத்தமமாய்(நேர்மையாக) நடக்க வேண்டும்
நீதி செய்ய வேண்டும்
உண்மையைப் பேச வேண்டும்
புறங்கூறாதவனாய்(ஒருவர் அவ்விடத்தில் இல்லாதபோது அவரைப் பற்றி இழிவாகக் கூறுதல்) இருக்க வேண்டும்
அண்டை அயலகத்தாருக்குத் தீங்கு செய்யாதவன்
தீய மனிதர்களோடு கலவாதவன்
கர்த்தருக்குப் பயந்தவர்களைக் கனம் பண்ணுகின்றவன்
வாக்கு தவறாதவன்
தன் பணத்தை வட்டிக்குக் கொடாதவன்
குற்றம் புரியாதவனுக்கு எதிராகப் பணம் வாங்காதவன்

ஆம் பிரியமானவர்களே நாமும் மேலே கூறப்பட்டக் குணாதியங்களோடு வாழ்வோமானால் இவ்வுலக ஆசீர்வாதங்களோடு கர்த்தரின் கூடாரமாகியப் பரலோக வாழ்க்கைக்குப் பாக்கியவான்களாய் இருப்போம். மாறாக நாம் இன்னும் துன்மார்க்க வாழ்க்கை வாழ்ந்து கொண்டிருப்போமானால் நிரந்தர அக்கினிக் கடலாகிய நரகத்திற்குத் தள்ளப்படுவோம். இர'ண்டில் எது நமக்கு வேண்டும் என்பதை நாமே தீர்மானித்து அதின் படி நடப்போம். கர்த்தர் தாமே நம்மை ஆசீர்வதித்து வழிநடத்துவாராக.

சிந்தனை: நான் கர்த்தரின் கூடாரமாகியப் பரலோக வாழ்க்கைக்குப் பாத்திரமாக இருக்கின்றேனா?

ஜெபம்: அன்பின் தேவனே நான் பரலோகப் பாக்கியத்திற்குத் தகுதியுள்ளவனா(ளா)கப் பரிசுத்தப்படுத்தி, இந்த உலக வாழ்க்கையில் உமக்குச் சாட்சியாக வாழ உன்னத அருள் புரியும். ஆமேன்.
தமிழ் வேதாகமம் படிக்க இங்கே சொடுக்கவும்

யாரைப் பிரியப்படுத்துகிறேன்?

2010-02-13T10:15:00.001+05:30

வேத பகுதி: மாற்கு 15: 1 - 15

"பிலாத்து ஜனங்களைப் பிரியப்படுத்த மனதுள்ளவனாய், பரபாசை அவர்களுக்கு விடுதலையாக்கி, இயேசுவையோ வாரினால் அடிப்பித்து, சிலுவையில் அறையும்படிக்கு ஒப்புக்கொடுத்தான்." மாற்கு 15:15

யூத ஜனங்கள் ஆண்டவராகிய இயேசு கிறிஸ்துவைப் பிடித்துக் கொண்டு பிலாத்துவினிடத்தில் ஒப்புக்கொடுக்கின்றார்கள். யூத ஜனங்கள் பிலாத்துவினிடம் இயேசுவைச் சிலுவையில் அறைய வேண்டும் என்று சொல்லுகின்றார்கள். பிலாத்து ஆண்டவராகிய இயேசு கிறிஸ்துவிடம் விசாரித்து விட்டு அவரிடம் ஒரு குற்றமும் கண்டுபிடிக்கவில்லை என்று சொல்லுகின்றான். யூதர்களோ இயேசுவை சிலுவையில் அறைய வேண்டும் என்று சத்தமிடுகின்றார்கள். ஜனங்களுக்கு நீதி நியாயங்களைச் செய்ய வேண்டிய தேசாதிபதியாகிய பிலாத்துவோ இயேசுகிறிஸ்துவிடம் குற்றம் ஒன்றும் கண்டுபிடிக்கவில்லை, என்றாலும் யூத ஜனங்களைப் பிரியப்படுத்துகின்றவனாய் இயேசுவைச் சிலுவையில் அறைய ஒப்புக் கொடுக்கின்றான்.

ஆம் பிரியமானவர்களே நாம் யாரைப் பிரியப்படுத்துகின்றோம்? நணபர்களைப் பிரியப்படுத்துகின்றோமா? அல்லது மேலதிகாரிகளைப் பிரியப்படுத்தும்படி கிறிஸ்துவுக்குப் பிரியமில்லாதக் காரியங்களைச் செய்கின்றோமா? அல்லது குடும்பத்தினர் உறவினர்களைப் பிரியப்படுத்தும்படி நடந்து கொள்ளுகின்றோமா? இல்லை நாம் தேவனைப் பிரியப்படுத்துகின்றோமா? சிந்தித்துப் பார்ப்போம். சவுல் ஜனங்களைப் பிரியப்படுத்துகின்றவனாய் கர்த்தருடைய வார்த்தைக்குக் கீழ்ப்படியவில்லை. சவுலுடைய முடிவு பரிதாபம். பிலாத்துவின் முடிவும் மிகப் பரிதாபம். கர்த்தருக்குப் பயந்து அவருடைய கட்டளைகளுக்கு மிகவும் பிரியமாய் நடக்கும் போது நாம் பாக்கியவான்களாய் பாக்கியவதிகளாய் மாறுவோம்.

சிந்தனை: நான் யாரைப் பிரியப்படுத்துகின்றேன்? என்னுடைய நடவடிக்கை யாரைப் பிரியப்படுத்துகின்றன? கிறிஸ்த்துவையா அல்லது உலகத்தின் காரியங்களையா?

ஜெபம்: அன்பின் தேவனே நான் என்னுடைய நடவடிக்கைகள் எல்லாவற்றிலும் உம்மைப் பிரியப்படுத்தி பாக்கியாவானா(ளா)க இந்த உலகத்திலே உமக்குச் சாட்சியாக ஜீவிக்கக் கிருபையையும் பெலனையும் தாரும். ஆமேன்.
தமிழ் வேதாகமம் படிக்க இங்கே சொடுக்கவும்

சாட்சியுள்ள வாழ்க்கை

2010-01-31T14:15:00.001+05:30

வேதபகுதி: மாற்கு 5 : 1 - 20

"நீ உன் இனத்தாரிடத்தில் உன் வீட்டிற்குப்போய், கர்த்தர் உனக்கு இரங்கி, உனக்குச் செய்தவைகளையெல்லாம் அவர்களுக்கு அறிவியென்று சொன்னார்" மாற்கு 5 : 19

ஆண்டவராகிய இயேசு கிறிஸ்து கதரேனருடைய நாட்டில் உள்ள லேகியோன் பிசாசு பிடித்திருந்த மனிதனைக் குணமாக்கினார். குணமாக்கப்பட்ட அந்த மனிதன் ஆண்டவரிடம் வந்து தானும் ஆண்டவருடன் கூட இருக்கும்படியாக ஆணடவரிடம் வேண்டிக்கொள்ளுகின்றான். ஆனால் ஆண்டவராகிய இயேசு கிறிஸ்து நீ போய் உன்னுடைய இனத்தாரிடத்திலும் உன்னுடைய ஜனத்தினிடத்திற்கும் போய் ஆண்டவர் உனக்குச் செய்த நன்மைகளை அறிவி என்று அவனுக்குச் சொன்னார். அந்தப்படியே அந்த மனிதனும் ஆண்டவர் அவனுக்குச் செய்த நன்மைகள் யாவற்றையும் அந்தப் பகுதி முழுவதும் பிரசித்தப்படுத்தினான்.

ஆம் பிரியமானவர்களே நம்மையும் நம்முடையக் குடும்பத்தினருக்கு முன்பாகவும் நாம் வசிக்கின்றப் பகுதியிலும் ஆண்டவருக்கு நற்சாட்சியாக வாழ இயேசு நம்மை அழைக்கின்றார். நாம் வசிக்கின்றப் பகுதியிலும் நம்முடையக் குடும்பத்திலும் சாட்சியாக வாழாமல் நம்மால் கிறிஸ்துவுக்குள்ளாக வளர முடியாது, ஊழியம் செய்யவும் முடியாது. நாம் நம்முடைய நடக்கையினாலும் சாட்சியினாலும் பரிசுத்தமான வாழ்க்கையினாலும் நம்முடையக் குடும்பத்தில் உள்ள மக்களையும் நாம் வசிக்கின்றப் பகுதியுலுள்ள மக்களையும் கிறிஸ்துவுக்காக ஆதாயம் பண்ணமுடியும்.

சிந்தனை: என்னுடையக் குடும்பத்திலும் நான் வசிக்கின்றப் பகுதியிலும் சாட்சியாக வாழ்கின்றேனா?

ஜெபம்: அன்பின் தேவனே நான் என்னுடையக் குடும்பத்திற்கும் நான் வசிக்கின்றப் பகுதியிலும் உமக்குச் சாட்சியாகவும் பரிசுத்தமாகவும் வாழக் கிருபை தாரும். ஆமேன்.
தமிழ் வேதாகமம் படிக்க இங்கே சொடுக்கவும்

உலகப் பொருளில் உண்மை

2009-12-10T20:01:00.003+05:30

வேதபகுதி: ஆதியாகமம் 14:14 - 24

"நான் ஒரு சரட்டையாகிலும் பாதரட்சையின் வாரையாகிலும், உமக்கு உண்டானவைகளில் யாதொன்றையாகிலும் எடுத்துக்கொள்ளேன் என்று,வானத்தையும பூமியையும் உடையவராகிய உன்னதமான தேவனாகிய கர்த்தருக்கு நேராக என் கையை உயர்த்துகிறேன்." ஆதியாகமம் 14:22,23

ஆபிரகாம் சோதோமின் ஜனங்களைப் பிடித்துச் சென்ற இராஜாக்களைப் பின் தொடர்ந்து சென்று சோதோமின் ஜனங்கள் மற்றும் அவர்கள் கொள்ளையடித்துச் சென்றப் பொருள்களை எல்லாம் மீட்டு வருகின்றான். ஆபிரகாமை வரவேற்க சென்ற சோதோமின் ராஜா ஜனங்களை மட்டும் தன்னிடம் ஒப்படைத்து விட்டுப் பொருள்களை எல்லாம் ஆபிரகாமை எடுத்துக் கொள்ளும் படியுமாகக் கேட்கின்றான். ஆனால் ஆபிரகாம் எனக்கு ஒன்றும் வேண்டாம் என்று சொல்லி தன்னுடன் வந்தவர்களுடையப் பங்கை மாத்திரம் கேட்டுத் தான் மீட்டு வந்தப் பொருள்கள் மற்றும் ஜனங்களைச் சோதோமுடைய ராஜாவினிடம் ஒப்படைக்கின்றான். ஆகையினால் கர்த்தர் ஆபிரகாமை அதிகமாக ஆசீர்வதித்தார்.

மற்றவர்களுடையப் பொருளை எப்படி அபகரிக்கலாம், குறுக்கு வழியில் எப்படிப் பணம் சம்பாதிக்கலாம், கூட இருக்கின்றவர்களை எப்படி ஏமாற்றி அவர்களுடையப் பணத்தையோ அல்லது அவர்களுடைய சொத்தையோ எப்படி அபகரிக்கலாம் என்று இருக்கின்றக் காலத்தில் வாழ்ந்து கொண்டிருக்கின்ற நாம் எப்படிப்பட்ட நிலைமையில் இருக்கின்றோம் என்று சிந்தித்துப் பார்ப்போம். நம்முடையச் சிந்தனைகள் மற்றும் செயல்கள் எப்படிப்பட்டவைகளாயிருக்கிறது என்று சிந்திப்போம். நாம் கர்த்தர் நம்மிடம் கொடுத்திருக்கின்ற உலகப் பொருள்கள், பணிகள் மற்றும் பதவிகளிலே உண்மையுள்ளவர்களாய் நடந்த்து நேர்மையாய் நடக்கும் போது கர்த்தர் நம்மையும் நம்முடையக் குடும்பங்களையும் ஆசீர்வதித்து வழிநடத்துவார்.

சிந்தனை: "அநீதியான உலகப்பொருளைப்பற்றி நீங்கள் உண்மையாயிராவிட்டால், யார் உங்களை நம்பி உங்களிடத்தில் மெய்யான பொருளை ஒப்புவிப்பார்கள்?" லூக்கா 16:11

ஜெபம்: அன்பின் தேவனே நீர் எனக்கு இந்த உலகத்தில் எனக்குத் தந்திருக்கின்றக் காரியங்கள் அனைத்திலும் நான் உண்மையாய் நடந்து கொள்ள தேவ ஒத்தாசையையும் பெலனையும் தந்து வழிநடத்தும். ஆமேன்

தமிழ் வேதாகமம் படிக்க இங்கே சொடுக்கவும்

அர்ப்பணிப்பு

2009-10-24T16:21:00.000+05:30

வேதபகுதி: அப்போஸ்தலர் 9 : 1 - 18

"ஆண்டவரே, நான் என்னசெய்யச் சித்தமாயிருக்கிறீர் என்றான். " அப்போஸ்தலர் 9:6 a

தேவனுடையப் பிள்ளைகளைக் கட்டி துன்பப்படுத்தும்படி சவுல் பிரதான ஆசாரியரிடத்திலே நிருபங்களை வாங்கிக் கொண்டு தமஸ்குவை நோக்கிச் செல்லுகின்ற வழியிலே தேவன் சவுலைச் சந்திக்கின்றார். அந்த இடத்திலேயே ஆண்டவரே நீர் என்ன செய்யச் சித்தமாயிருக்கிறீர் என்று சவுல் தன்னை அர்ப்பணிக்கின்றார். ஆண்டவரின் சத்தத்திற்குக் கீழ்ப்படிந்து அர்ப்பணித்தபடியினால் கர்த்தர் சவுலை பவுலாக மாற்றி வல்லமையாக எடுத்துப் பயண்படுத்தினார். புறஜாதிகள் அநேகரைக் கர்த்தருக்குள்ளாகக் கொண்டு வருவதற்கும் அநேகச் சபைகளை உருவாக்குவதற்கும் பவுல் அப்போஸ்தலன் காரணமாக இருந்தார்.

வேதாகமத்தில் அநேகர் தங்களை ஆண்டவரின் அழைப்பிற்கு இணங்கி தங்களை அர்ப்பணித்துப் பெரிய காரியங்கள் அவர்களால் செய்யப்படவும் அவர்களும் அவர்களுடையக் குடும்பங்களும் அசீர்வாதம் பெற்றிருக்கிறார்கள். நாமும் நம்மை கர்த்தருடையச் சத்தத்திற்குச் செவிகொடுத்து அர்ப்பணித்து அருடையச் சித்தத்தின்படி நடப்போமானால் நாமும் நம்முடையக் குடும்பங்களும் ஆசீர்வாதங்களைச் சுதந்தரிக்கும் மாறாக நாம் அவருடையச் சித்தத்தின்படி செய்யாமல் நம்முடைய மனம் போனபடிச் செய்வோமானால் நமது துன்ப நேரங்களில் அவரும் நம்மைக் கைவிட்டு விடுவார். நாம் அவருடைய சித்தத்தின்படி செய்யும் போது நமது துன்பங்களையெல்லாம் இன்பமாக மாற்றி விடுவார்.

சிந்தனை: நான் கர்த்தருடைய சத்தத்திற்குச் செவிகொடுக்கிறேனா?

ஜெபம்: கிருபையுள்ள அன்பின் தேவனே நான் என்னையே உம்மிடம் அர்ப்பணிக்கின்றேன் நீரே என்னை உம்முடைய சித்தத்தின்படி வழிநடத்தும். ஆமேன்.

தமிழ் வேதாகமம் படிக்க இங்கே சொடுக்கவும்

தானியேலின் தீர்மானம்

2009-08-26T20:10:00.000+05:30

வேதபகுதி: தானியேல் 1: 3 - 20

"தானியேல் ராஜாவின் போஜனத்தினாலும் அவர் பானம்பண்ணும் திராட்சரசத்தினாலும் தன்னைத் தீட்டுப்படுத்தலாகாதென்று, தன் இருதயத்தில் தீர்மானம்பண்ணிக்கொண்டு, தன்னைத் தீட்டுப்படுத்தாதபடி பிரதானிகளின் தலைவனிடத்தில் வேண்டிக்கொண்டான்." தானியேல் 1:8

தானியேல் தான் பாபிலோன் அரசனால் சிறைபிடிக்கப்பட்டு வந்தாலும், பாபிலோனில் உள்ளப் பாவக் காரியங்களால் தன்னைத் தீட்டுப்படுத்திக் கொள்ளக்கூடாது என்று தீர்மானம் பண்ணுகின்றான். தீர்மானம் பண்ணுவதோடு நின்று விடாமல் ஜெபத்தோடு கூட அந்தத் தீர்மானம் நிறைவேறுவதற்காக வேண்டிய முயற்சிகளை எடுக்கின்றான். தேவன் தானியேலின் தீர்மானம் நிறைவேறப் பிரதானிகளின் தலைவனுடைய கண்களில் தயவு கிடைக்கும்படிச் செய்தார். மேலும் ராஜபோஜனத்தை உண்கின்ற மற்ற வாலிபர்களைக் காட்டிலும் தானியேல் மற்றும் அவருடைய நண்பர்களின் முகம் களையுள்ளதாயும் சரீரம் புஷ்டியாகவும் மாறச் செய்தார். மேலும் மற்ற மனிதர்களைக் காட்டிலும் ஞானத்தையும் அறிவையும் சாமர்த்தியத்தையும் அவர்களுக்குக் கொடுத்தார்.

நாம் எப்படிப்பட்டத் தீர்மானங்களை நம்முடைய வாழ்க்கையில் எடுக்கின்றோம் அல்லது நாம் எடுத்தத் தீர்மானங்களில் நிலைத்து நிற்கின்றோமா? ஏதோ புதிய வருடங்களில் அல்லது நற்செய்திக் கூட்டங்களில் தீர்மானங்களை மட்டும் எடுக்கின்றவர்களாக இருக்கின்றோமா? அல்லது தீர்மானங்களை நிறைவேற்றிக் கர்த்தருடைய நாமத்தை மகிமைப்படுத்துகின்றவர்களாக இருக்கின்றோமா? சிந்தித்துப் பார்ப்போம் . கிறிஸ்துவுக்குள்ளாக நல்ல தீர்மானங்களை எடுப்போம், எடுத்தத் தீர்மானங்களுக்காக ஆண்டவரிடம் மன்றாடுவோம். தீர்மானங்களை நிறைவேற்றுவோம், கர்த்தர் தானியேலைப் போல நம்மையும் உயர்த்தி ஆசீர்வதிப்பார்.

சிந்தனை: நாம் எடுத்தத் தீர்மானங்களில் நிலைத்து நிற்கின்றோமா?

ஜெபம்: கிருபையும் இரக்கமும் நிறைந்த தேவனே, நான் உமக்குள்ளாகத் தீர்மானங்களை எடுக்கவும் அந்தத் தீர்மானங்களில் நிலைத்து இருக்கவும் தேவ ஒத்தாசையையும் கிருபையையும் தாரும். ஆமேன்.

தமிழ் வேதாகமம் படிக்க இங்கே சொடுக்கவும்

அரசுக்கு முறையாக வரி செலுத்துதல்

2009-07-28T19:43:00.000+05:30

வேதபகுதி: லூக்கா 20:20 - 26

"இராயனுடையதை இராயனுக்கும் தேவனுடையதை தேவனுக்கும் செலுத்துங்கள் என்றார்" லூக்கா 20 : 25

இயேசு கிறிஸ்துவினிடத்தில் குற்றம் கண்டுபிடிக்கும்படியாக பிரதான ஆசாரியரும் வேதபாரகரும் அவரிடத்தில் வேவுகாரரை அனுப்புகின்றார்கள். ஏனென்றால் இயேசு கிறிஸ்து தனது பிரசங்கங்களில் அவர்களது தவறான வாழ்க்கை முறைகளைச் சுட்டிக்காட்டினதினால் அவரிடம் குற்றம் கண்டுபிடித்து அவரைத் தேசாதிபதியினிடம் பிடித்துக் கொடுத்து விடலாம் என்று திட்டம் தீட்டுகின்றார்கள். ஆனால் இயேசு கிறிஸ்துவோ அவர்களுடைய தந்திரத்தை அறிந்து கொண்டு அவர்களிடம் இராயனுடையதை இராயனுக்கும் தேவனுடையதை தேவனுக்கும் செலுத்த வேண்டும் என்று பதில் கூறுகின்றார்.

பிரியமானவர்களே நாம் நம்முடைய வாழ்க்கையில் எப்படி இருக்கின்றோம். நாம் முறையாக வரி செலுத்துகின்றோமா? தசமபாகம் செலுத்துகின்றோமா? அல்லது கள்ள கணக்குக் காண்பித்து வரியைக் குறைவாகச் செலுத்துகின்றோமா? தசமபாகத்திலே வஞ்சனை செய்கின்றோமா? என்ன நிலைமையில் நாம் இருக்கின்றோம் சிந்தித்துப் பார்ப்போம்? கர்த்தர் நம்மைப் பார்த்து மனிதன் என்னைக் காணிக்கைகளினாலும் தசமபாகங்களினாலும் அல்லவோ வஞ்சிக்கிறான் என்று மல்கியா தீர்க்கன் மூலமாக நம்மை எச்சரிக்கின்றார். மேலும் தசமபாகங்களை என்னிடத்தில் கொண்டு வாருங்கள் அதன் மூலமாக நான் உங்களை இடங்கொள்ளாமற்போகுமட்டும் உங்கள்மேல் ஆசீர்வாதத்தை வருஷிக்கமாட்டேனோவென்று அதினால் என்னைச் சோதித்துப் பாருங்கள் என்றும் மல்கியா தீர்க்கன் மூலமாகக் கூறுகின்றார். அரசுக்கு முறையாக வரி செலுத்துவோம், தசமபாகங்களைத் தேவனிடத்தில் கொண்டு வருவோம் கர்த்தர் நம்மை ஆசீர்வதிப்பார்.

சிந்தனை: நான் அரசுக்கு முறையாக வரிசெலுத்துகின்றேனா? தசமபாகத்தைத் தேவனுக்குச் செலுத்துகின்றேனா?

ஜெபம்: அன்பின் ஆண்டவரே நீர் கற்றுத் தந்தபடி நான் அரசுக்கு முறையாக வரி செலுத்தவும் உமக்குத் தசமபாகத்தைத் தவறாது செலுத்தவும் தேவ பெலனையும் ஒத்தாசையும் தாரும். ஆமேன்.

தமிழ் வேதாகமம் படிக்க இங்கே சொடுக்கவும்

நன்றி செலுத்தும் உணர்வு

2009-06-14T12:48:00.002+05:30

"அவர்களில் ஒருவன் தான் ஆரோக்கியமானதைக் கண்டு, திரும்பி வந்து உரத்த சத்தத்தோடே தேவனை மகிமைப்படுத்தினான்" லூக்கா 17:5

நாம் ஒரு நபரிடத்திலே நன்மைக்காகச் செல்கின்றோம். அவரும் செய்து தருகிறேன் என்று சொல்லுகிறார். நாம் நமக்கு நன்மை கிடைத்த பின்பு அவரைப் பார்த்து நாம் நன்றி சொல்லுகின்றபோது அவருக்கு மற்ற மக்களுக்கு நம்மால் நன்மை செய்ய முடிகின்றது என்று மகிழ்கின்றார். இது அவருக்கு மேலும் பல நன்மைகளை மற்ற மக்களுக்குச் செய்ய ஒரு உந்துதலாக இருக்கும். மாறாக நமக்கு நன்மை செய்தவரை நாம் மதிக்காமல் நடக்கும் போது அந்த மனிதருக்கு நன்மை செய்கின்ற எண்ணமே இல்லாமல் போய் விடும்.

நன்றி சொல்வது என்பது மிக உயரிய பண்பு ஆகும். இந்தக் காலத்தில் நன்றி சொல்வது நாளுக்கு நாள் குறைந்து வருகின்றது மாறாக நன்றி மறத்தல் அதிகமாகிக் கொண்டிருக்கின்றது. நமது ஆண்டவர் நமக்கு எவ்வளவோ அதிகமான நன்மைகளைச் செய்திருக்கின்றார். நாம் ஆண்டவர் நமக்குச் செய்த ஒவ்வொரு நன்மைகளையும் நினைத்து அவருக்குத் துதிகளையும் ஸ்தோத்திரங்களையும் ஏறெடுக்கும்போது கர்த்தர் நம்மில் மிகவும் பிரியப்படுகின்றார். மேலும் நமக்குப் பல்வேறு ஆசிர்வாதங்களையும் தந்து நம்மை மகிழ்ச்சிப்படுத்துகின்றார். மாறாக நாம் ஆண்டவர் நமக்குச் செய்த நன்மைகளை மறந்து நடப்போமானால் நமக்கு ஆசிர்வாதக் குறைவு தான் கிடைக்கும்.

சிந்தனை: நன்றி மறப்பது நன்றன்று

ஜெபம்:அன்பின் தேவா, எனக்கு நன்றி நிறைந்த உள்ளத்தை அதிகமாகத் தந்து வழிநடத்தும். ஆமேன்.

தமிழ் வேதாகமம் படிக்க இங்கே சொடுக்கவும்

உன்னதமானவரின் பிள்ளைகள்

2009-04-19T20:09:00.000+05:30

"உங்கள் சத்துருக்களைச் சிநேகியுங்கள் , நன்மை செய்யுங்கள், கைம்மாறு கருதாமல் கடன் கொடுங்கள்; அப்பொழுது உங்கள் பலன் மிகுதியாயிருக்கும், உன்னதமானவருக்கு நீங்கள் பிள்ளைகளாயிருப்பீர்கள்" லூக்கா 6:35

குஷ்டரோகிகள் மத்தியிலே ஊழியம் செய்த கிரகாம் ஸ்டெய்ன்ஸ் மற்றும் அவரது இரு குழந்தைகளையும் எரித்துக் கொன்றார்கள். கிரகாம் ஸ்டெய்ன்ஸ் அவர்களின் துணைவியார் திருமதி.கிளாடிஸ் அம்மையார் அவர்கள் நான் என்னுடைய கணவர் மற்றும் குழந்தைகளையும் எரித்துக் கொன்றவர்களை மன்னிக்கிறேன் என்று அறிக்கை விட்டார்கள். இதன் மூலமாக கிறிஸ்துவின் மன்னிப்பின் குணத்தை அநேக மக்கள் அறிந்து கொண்டார்கள். அவர்களது இந்த மன்னிப்பின் குணம் தாங்கள் உன்னதமானவரின் பிள்ளைகள் என்பதை இந்த உலக மக்களுக்கு வெளிப்படுத்தினார்கள்.

நமது ஆண்டவராகிய இயேசு கிறிஸ்துவும் தான் இந்த உலகத்தில் வாழ்ந்த காலத்தில் இப்படிப்பட்ட அறிவுறைகளை மக்களுக்கு வழங்கியதோடு மட்டும் இல்லாது தன்னுடைய வாழ்க்கையிலும் நடத்திக் காட்டினார். பிரதான ஆசாரியர்கள் அவரைப் பிடிக்க வரும்போது பேதுரு பிரதான ஆசாரியனின் வேலைக்காரரின் காதை வெட்டி விடுகின்றான். கர்த்தரோ அந்த பிரதான ஆசாரியரின் வேலைக்காரனின் காதைக் குணப்படுத்தி அற்புதம் செய்தார். ஆம் பிரியமானவர்களே நம்மிடம் இயெசு கிறிஸ்துவிடம் காணப்பட்ட பகைவர்களை நேசிக்கின்ற மன்னிக்கின்ற குணம் காணப்படுகின்றதா? இல்லையென்றால் நாம் இன்றே உன்னதமானவரின் பிள்ளைகளாக மாறுவதற்காக கர்த்தர் நமக்குச் சத்துருக்களைச் சிநேகிக்கின்ற மன்னிக்கின்ற குணத்தை அருளும்படி மன்றாடுவோம்.

சிந்தனை: நான் உன்னதமானவரின் பிள்ளையாக மாறிவிட்டேனா?

ஜெபம்: அன்பின் தேவனே நான் உம்முடையப் பிள்ளையாக நடப்பதற்கு என்னுடையச் சத்துருக்களைச் சிநேகிக்கவும் மன்னிக்கவும் கூடிய நல்ல குணத்தைத் தந்து வழிநடத்தும். ஆமேன்.

தமிழ் வேதாகமம் படிக்க இங்கே சொடுக்கவும்

விசுவாசம்

2009-03-30T20:36:00.000+05:30

"அவன்(ஆபிரகாம்) பொறுமையாய்க் காத்திருந்து, வாக்குத்தத்தம் பண்ணப்பட்டதைப் பெற்றான்." எபிரேயர் 6:15

அந்தக் கிராமத்தில் அந்த வருடம் மழை பெய்யவில்லை. அந்த ஊரின் போதகர் நாம் அனைவரும் பத்து நாட்கள் நமது கிராமத்தை சுற்றி வந்து கர்த்தரைத் துதித்து நாம் வேண்டுதல் செய்வோம் என்று அறிவிப்புக் கொடுத்தார். அந்த கிராமத்தின் மக்கள் அனைவரும் தொடர்ந்து 9 நாட்கள் ஊரைச் சுற்றி வந்து ஜெபித்தார்கள். பத்தாவது நாளும் வந்த்தது ஒரே ஒரு சிறுமி மட்டும் குடையுடன் அந்த ஜெபத்திற்கு வந்திருந்தாள். அந்தச் சிறுமியைப் பார்த்து அனைவரும் கேலி செய்தார்கள். ஆனால் அந்தச் சிறுமியோ எதற்கும் கவலைப்படாமல் விசுவாசத்தோடு அந்தக் கிராமத்தைச் சுற்றி வந்தாள். ஊரின் எல்லையில் வந்தவுடன் போதகர் ஜெபித்து ஆசிர்வாதம் கூறியவுடன் சோரென மழை பெய்ய ஆரம்பித்தது. சிறுமியைக் கேலி செய்தவர்கள் வெட்கத்துடன் மழையில் நனைந்தார்கள். சிறுமியோ தன்னுடையக் குடையினால் மற்றவர்களுக்கு உதவி செய்தாள்.

ஆம் பிரியமானவர்களே அந்தச் சிறுமியின் விசுவாசம் மழையைக் கொண்டு வந்தது. அபிரகாமும் கர்த்தருடைய வார்த்தையைக் கேட்டுத் தன்னுடைய சொந்த ஜனங்களை எல்லாம் விட்டு விட்டுக் கர்த்தர் காண்பிக்கும் இடத்திற்கு நேராகச் செல்கின்றார். தனக்கு வயதாகி விட்டபோதிலும் கர்த்தர் ஆபிரகாமை நோக்கி உன் சந்ததியை ஆசீர்வதிப்பேன் என்று சொன்ன வார்த்தையை விசுவாசித்ததினால் சாராள் வயது சென்றவளாயிருந்தாலும் அவள் மூலமாக ஈசாக்கைப் பெருகிறான். கால் மிதிக்கும் தேசத்தை உன் சந்ததிக்குத் தருவேன் என்று தேவன் சொன்னதை விசுவாசித்ததினால் இஸ்ரவேலர் கானான் தேசத்தைச் சுதந்தரிக்கிறார்கள். ஆகவே ஆபிரகாம் விசுவாசிகளின் தகப்பன் என்று அழைக்கப்படுகின்றான். பிரியமானவர்களே நாமும் நம்முடைய விசுவாசம் எப்படியிருக்கிறதென்று சோதித்து அறிவோம். விசுவாசத்தில் குறைவுள்ளவர்களாய் நாம் இருப்போமானால் தேவன் நம்முடைய விசுவாசத்தை பெருகச்செய்ய இறைவனிடம் மன்றாடுவோம். கிறிஸ்தவத்தின் வாழ்க்கையே விசுவாசத்தில் தான் அடங்கி இருக்கின்றது. விசுவாசத்தில் பெலப்படுவோம் கர்த்தர் நம்மை ஆசீர்வதிப்பாராக.

சிந்தனை: "நீங்கள் விசுவாசமுள்ளவர்களாய் ஜெபத்திலே எவைகளைக் கேட்பீர்களோ அவைகளையெல்லாம் பெறுவீர்கள்" மத்தேயு 21: 22

ஜெபம்: அன்பின் தேவனே நீர் வாக்குப் பண்ணினவைகளைப் பெற்றுக் கொள்ள விசுவாசத்துடன் பொறுமையாய்க் காத்திருந்து வாக்குத்தத்தங்களைச் சுதந்தரித்துக் கொள்ளக் கிருபைகளைத் தந்து வழி நடத்தும். ஆமேன்.

தமிழ் வேதாகமம் படிக்க இங்கே சொடுக்கவும்

தீமையின் பலன்

2009-02-07T16:47:00.004+05:30

"பொல்லாப்பை தேவன் அவன்மேல் திரும்பும்படி செய்தார்." நியாயாதிபதிகள் 9:56 பி

காண்ட்ரக்டர் ஒருவர் ஒரு கட்டுமான நிருவனத்திற்குப் பல பணிகளைச் செய்து கொடுத்து வந்தார். தனக்கு வயதாகிவிட்டபடியினால் இனிமேல் தன்னால் அப்படி காண்ட்ராக்ட் எடுத்துச் செய்ய முடியாது என்று அந்த நிறுவனத்தின் தலைவரிடம் சொன்னார். அதற்கு அந்த நிறுவனத்தின் தலைவர் சரி கடைசியாக ஒரே ஒரு வீடு மட்டும் காண்ட்ராக்டில் கட்டிக் கொடுங்கள் என்று சொன்னார். இவரும் அந்த வீட்டை மிகவும் மலிவான பொருள்களைக் கொண்டு தரமில்லாமல் அந்த வீட்டைக் கட்டி முடித்தார். வீட்டின் திறப்பு விழாவிற்கு அந்தக் காண்ட்ரக்டரை குடும்பத்தோடு அழைத்தார். அந்தத் திறப்பு விழாவில் அந்த நிறுவனத்தின் தலைவர் காண்ட்ரக்டரிடம் இதுவரை எங்களது நிறுவனத்திற்கு நீங்கள் செய்த பணிக்காக இந்த வீட்டை உனக்குச் சொந்தமாகத் தருகிறேன் என்றார். காண்ட்ரக்டருக்கு தலை சுற்றியது. ஐயோ இந்த வீடு எனக்கு என்று முன்பதாகத் தெரிந்திருந்தால் நான் தரமானப் பொருள்களைக் கொண்டு கட்டியிருப்பேனே என்று அவன் புலம்பினான் .

ஆம் பிரியமானவர்களே நாம் செய்கின்ற தீமையான எல்லாச் செயல்களும் மீண்டும் நம்மை நோக்கியே வரும். அபிமெலேக்கின் வாழ்க்கையிலும் இது தான் பலித்தது. தன்னுடைய சகோதரர்கள் 70 பேரையும் கொலை செய்து விட்டு சீகேமின் அரசனாக மாறினான். இவனுடைய இந்தத் தீமையானச் செயலுக்கு சீகேமின் மனுஷரும் உடந்தையாக இருந்தார்கள். முடிவிலே சீகேமின் மனுஷருக்கும் அபிமெலேக்கிற்கும் பிரிவினை உண்டாகின்றது. முடிவிலே அபிமெலேக்கின் மரணம் ஒரு பெண்ணால் வருகின்றது. அபிமெலேக்கு செய்த எல்லாத் தீமையானக் காரியங்களுக்கும் கர்த்தர் அவனுக்குப் பதிலளித்தார்.

சிந்தனை: தன் வினை தன்னைச் சுடும்.

ஜெபம்: அன்பின் தேவனே நான் நன்மையானக் காரியங்களைச் செய்வதற்கு எனக்குப் பெலன் தந்து தீமையானக் காரியங்களுக்கு என்னை விலக்கிக் காத்தருளும். ஆமேன்.

தமிழ் வேதாகமம் படிக்க இங்கே சொடுக்கவும்

யார் கண்ணில் உத்திரம்?

2008-12-20T18:23:00.002+05:30

"நீ உன் கண்ணிலிருக்கிற உத்திரத்தை உணராமல், உன் சகோதரன் கண்ணிலிருக்கிற துரும்பைப் பார்க்கிறதென்ன?" மத்தேயு 7 : 3

அந்தக் கிராமத்தில் உள்ள அவர்களது வீட்டிற்குப் பக்கத்து வீட்டிற்குப் புதிதாக ஒரு குடும்பம் குடியேறியது. இந்த வீட்டில் உள்ளப் பெண்மணி தங்களுடைய வீட்டின் கண்ணாடி ஜன்னலின் வழியாகப் பார்க்கின்றார். அங்கு அவர்கள் துவைத்துக் காயப் போட்டிருந்தத் துணிகளைப் பார்க்கும் போது எல்லாம் பழையத் துணிகளாகவும் அழுக்கு நிறைந்ததாகவும் இருந்தது. இந்தப் பெண்மணிக்கு அந்தக் குடும்பத்தின் மீது மிகவும் பரிதாபம் வந்தது. வருகின்ற கிறிஸ்துமஸ் பண்டிகைக்கு அவர்கள் குடும்பத்தினருக்குப் புதியத் துணிகளை எடுத்துக் கொடுக்க வேண்டும் என்று நினைத்தார்கள், கிறிஸ்துமஸ் பண்டிகையும் நெருங்கியது. கணவரிடம் தன்னுடைய விருப்பத்தைச் சொல்லுகின்றார். இதனைக் கேட்டுக் கொண்டிருந்த அந்தப் பெண்ணின் மகன் அவனுடைய தாயைப் பார்த்து அம்மா நம்முடைய வீட்டு கண்ணாடி ஜன்னலில் உள்ள தூசியை முதலாவது சுத்தம் செய்யுங்கள் அதன் பிறகு அவர்கள் வீட்டில் காயப் போட்டிருக்கும் துணியைப் பாருங்கள் என்று கூறினான்.

ஆம் பிரியமானவர்களே நாமும் இப்படித்தான் நம்மில் அநேகப் பாவங்களையும் அக்கிரமங்களையும் அசுத்தங்களையும் வைத்துக் கொண்டு அவர் இப்படி இவர் அப்படி என்று மற்றவர்களைப் பார்த்துக் குறை கூறிக் கொண்டு இருக்கிறோம். ஆனால் நாம் குறைகூறும் நபர்களை விட நாம் அதிகமானக் குற்றங்களைச் செய்கின்றவராகவும் அசுத்தங்களை உடையவராகவும் வாழ்ந்து வருகின்றோம். முதலாவதாக நம்மில் உள்ளப் பாவங்களையும் அசுத்தங்களையும் களைந்து விட்டு இயேசு கிறிஸ்துவின் தூய இரத்ததினால் கழுவப்பட்டவர்களாக வாழுவோம். நம்மைச் சுற்றியிருக்கின்ற மனிதர்கள் தவறு செய்ப்பவர்களாக இருந்தால் மற்ற மனிதர்களிடம் கூறாமல் நேரடியாக அந்த மனிதரிடமே அவருடையத் தவறுகளைச் சுட்டிக் காட்டி அறிவுரை கூறுவோம் அவர்கள் மனந்திரும்பும்படி அவர்களுக்காக ஜெபிப்போம். நம்முடைய நல்ல நடத்தை அவர்களும் மாறுவதற்கு ஒரு தூண்டுகோலாக அமையும்.

சிந்தனை: என்னுடைய நடவடிக்கைகள் அனைத்தும் பரிசுத்தமானதாக இருக்கின்றதா?

ஜெபம்: அன்பின் பிதாவே நான் பரிசுத்தமாக வாழ்ந்து அதன் மூலமாக மற்றவர்களை உம்மண்டை வழிநடத்தும் கருவியாகத் திகழ என்னைப் பெலப்படுத்தும். ஆமேன்.

தமிழ் வேதாகமம் படிக்க இங்கே சொடுக்கவும்

நன்மை

2008-11-29T15:28:00.001+05:30

"அவருடைய தீர்மானத்தின்படி அழைக்கப்பட்டவர்களாய்த் தேவனிடத்தில் அன்புகூருகிறவர்களுக்குச் சகலமும் நன்மைக்கு ஏதுவாக நடக்கிறதென்று அறிந்திருக்கிறோம்." ரோமர் 8 :28

யோசேப்பின் வாழ்க்கையை நாம் உற்று நோக்குவோமானால் அவன் தன்னுடையச் சகோதரர்களால் எகிப்துக்குச் செல்லும் வியாபாரிகளிடம் விற்கப்பட்டான். அவனை அவர்கள் எகிப்து அதிகாரியான போத்திபாரினிடத்தில் விற்றுப்போட்டார்கள். அங்கு போத்திபாரின் மனைவியின் பேச்சிற்கு இணங்கிப் பாவம் செய்யாமல் தேவனுக்குப் பயந்து நடந்ததினால் சிறையில் அடைக்கப்பட்டான். தேவன் சிறைச்சாலைத் தலைவன் கண்களில் தயவு கிடைக்கும்படிச் செய்தார். பார்வோன் கண்டச் சொப்பனத்திற்கு அர்த்தம் சொன்னதின் விளைவாக எகிப்து நாட்டிற்கு அதிபதியாக்கப்பட்டான். உலகமெங்கும் பஞ்சம் ஏற்பட்டதினால் யோசேப்பின் சகோதரர்கள் தானியம் வாங்க வருகிறார்கள். தன்னுடையச் சகோதரர்களிடம் தன்னை வெளிப்படுத்தும் போது நீங்கள் என்னை விற்றுப்போட்டதற்காக வருத்தப்பட வேண்டாம் தேவன் அநேக ஜனங்களைக் காக்கும்படி எல்லாவற்றையும் நன்மையாக மாறப்பண்ணினார் என்று தேவனை மகிமைப்படுத்தினான்.

ஆம் பிரியமானவர்களே நமக்குத் துன்பங்கள் துயரங்கள் வருகின்ற நேரங்களிலெல்லாம் நாம் தேவனை உறுதியாய்ப் பற்றிக் கொண்டு அவருடைய சித்தத்தின்படி நடக்கும் போது அவர் நமக்கு நேரிட்டுள்ள துன்பங்கள் கஷ்டங்கள் எல்லாவற்றையும் மாற்றி நம்மை மற்ற மனிதர்களுக்கு முன்பாக நம்மை உயர்த்துவார். யோபுவின் வாழ்க்கையிலும் இது தான் நடந்தது, யோபு தன்னுடைய துன்ப நேரத்திலும் தேவனை மறுதலிக்கவோ தூஷிக்கவொ இல்லை. எனவே தேவன் அவருடையத் துன்பங்கள் எல்லாவற்றையும் மாற்றி அவருடைய வாழ்க்கையிலே இரட்டிப்பான ஆசீர்வாதத்தைத் தந்தருளினார். நாம் நம்முடையத் துன்ப வேளைகளிலே எப்படி நடக்கின்றோம் என்பதைச் சிந்தித்துப் பார்ப்போம்.

சிந்தனை: நாம் நமது துன்ப வேளைகளில் தேவனை விடாமல் பற்றிக் கொண்டிருக்கின்றோமா? அல்லது தேவனைத் தானே நான் நம்பியிருக்கின்றேன் எனக்கு ஏன் துன்பம் வருகின்றது என்று முறுமுறுக்கின்றோமா?

ஜெபம்: அன்பின் தேவனே நான் என்னுடையக் கஷ்ட வேளைகளிலும் துன்ப வேளைகளிலும் உம்மை விடாமல் பற்றிக் கொள்ளக் கிருபைகளைத் தாரும். ஆமேன்

தமிழ் வேதாகமம் படிக்க இங்கே சொடுக்கவும்

செவிகொடுக்கும் தேவன்

2008-11-15T18:55:00.001+05:30

"ஒருவன் தேவபக்தியுள்ளவனாயிருந்து அவருக்குச் சித்தமானதைச் செய்தால் அவனுக்குச் செவிகொடுப்பார்." யோவான் 9: 31

ஒரு அலுவலகத்தில் அல்லது நிறுவனத்தில் வேலை பார்க்கின்றோம். நமது உயரதிகாரிகள் சொல்கின்றக் காரியங்களைச் செய்து முடிக்கும் போது நமது மேலதிகாரிகள் நம்மிடம் நன்மதிப்பு வைத்து இருப்பார்கள். நாம் நமது காரியங்களுக்காக அவர்களிடம் உதவி கேட்கும் போது அவர்கள் மறுக்காமல் தன்னால் ஆன உதவிகளைச் செய்வார்கள். நாம் நமக்கு அதிகாரிகளாக நியமிக்கப்பட்டவர்களை மதிக்காமல் நடப்போமென்றால் அதனுடைய எதிர்பலன் என்னவாக இருக்கும் என்பதை நான் சொல்லி நீங்கள் தெரிந்துக் கொள்ள வேண்டியதில்லை.

இப்படியாக நாமும் நமது தேவனுடைய சத்தத்தைக் கேட்டு அதின்படி நடக்கும் போது தேவனும் நாம் ஏறெடுக்கும் விண்ணப்பங்களுக்குப் பதிலளிப்பார். ஆனால் நாமோ அவருடைய சத்தத்திற்குச் செவிகொடுப்பதில்லை. நோவா தேவனின் சத்தத்திற்குக் கீழ்ப்படிந்ததினால் அவரும் அவருடையக் குடும்பத்தினரும் உலகத்தின் அழிவினின்றுப் பேழையின் மூலமாகக் காப்பாற்றப்பட்டார்கள். ஆபிரகாம் தன்னுடையக் குமாரனாகிய ஈசாக்கைத் தேவன் பலியிடச் சொன்னபோது தேவனுக்குக் கீழ்ப்படிந்து தன்னுடையக் குமாரனைப் பலியிடச் சென்றதினால் விசுவாசிகளின் தகப்பன் என்றழைக்கப்படுகின்றார். சவுல் ராஜா தேவனுடையச் சத்தத்திற்குக் கீழ்ப்படியாமற்போனதினால் ராஜ்ஜியபாரம் சவுலின் குடும்பத்தை விட்டுத் தாவீதின் குடும்பத்தின் வசம் சென்றது, இப்படி வேதாகமத்தில் இருந்து உதாரணங்களைச் சொல்ல வேண்டுமென்றால் சொல்லிக் கொண்டேப் போகலாம். நாம் தேவனுடைய சத்தத்திற்குச் செவிகொடுப்போம் அவரும் நம்முடைய வேண்டுதல்கள் விருப்பங்கள் எல்லாவற்றையும் நன்மையாகச் செய்து முடிப்பார்.

சிந்தனை: நான் தேவனுடைய சத்தத்திற்குச் செவி கொடுத்து நடக்கின்றேனா?

ஜெபம்: அன்பின் ஆண்டவரே நான் உம்முடையச் சத்தத்திற்குக் கீழ்ப்படிந்து நடக்கக் கிருபையும் பெலனும் தந்து வழி நடத்தும். ஆமேன்.

தமிழ் வேதாகமம் படிக்க இங்கே சொடுக்கவும்

பாவத்திற்கு அடிமை

2008-11-05T20:04:00.001+05:30

" பாவஞ்செய்கிறன் எவனும் பாவத்துக்கு அடிமையாயிருக்கிறான்" யோவான் 8:34

புகைப்பிடிக்கும் நபரிடத்திலோ அல்லது குடிப்பழக்கம் உடைய நபரிடத்திலோ நீங்கள் இந்தப் பழக்கத்தை விட்டு விடுவதினால் உங்கள் உடலுக்கு நன்மை என்று நாம் சொன்னால் அவர்கள் நான் இந்தப்பழக்கத்தை விட்டு விட வேண்டும் என்று தான் நினைக்கிறேன் ஆனால் என்னால் முடியவில்லை என்று நம்மிடம் சொல்லுவார்கள். ஒரு சிலர் சினிமாவிற்கு அடிமைகளாக இருப்பார்கள் ஒரு சிலர் தொலைக்காட்சியில் வரும் தொடர் நாடகங்களுக்கு அடிமைகளாக இருப்பார்கள் ஒரு சிலர் தொலைக்காட்சியில் வரும் சில நிகழ்ச்சிகளுக்கு (ஆட்டம் பாட்டம்) அடிமைகளாக இருப்பார்கள். இப்படி ஒவ்வொருவரும் ஒவ்வொரு பாவப்பழக்கத்திற்கு அடிமையாக இருப்பார்கள். பாவத்திற்கு அடிமைகளாக இருக்கிறோம் என்று தெரிந்தாலும் அவர்களால் அந்தப் பாவத்தை விட்டு விட முடிவதில்லை. ஏனென்றால் அந்தப் பாவமானது அவர்களை ஆட்கொண்டு அடிமைப்படுத்தி வைத்துள்ளது. இதனால் குடும்பங்களிலும் தனிப்பட்ட வாழ்க்கையிலும் பலப் பிரச்சனைகள். இந்தப் பாவக்கட்டுகளில் இருந்து விடுபட ஒரே வழி இயேசு கிறிஸ்துவினால் பாவங்கள் கழுவப்பட்டால் மட்டுமே முடியும்.

எனக்குத் தெரிந்த ஒரு நண்பர் அதிகமாகப் புகைப் பிடிக்கும் பழக்கத்தை உடையவர். புகைப்பதினால் ஏற்படும் தீமைகளை நினைத்துப் படிப்படியாகப் புகைப்பதை நிறுத்தினார். நாட்கள் சென்றது. ஒரு சில மாதங்கள் கழித்து மீண்டுமாகப் புகை பிடிக்கும் பழகத்திற்கு அடிமையாகி விட்டார். முழுவதுமாக அந்தப் பாவப்பழக்கத்திலிருந்து அவர் விடுபடாததே அவரை மீண்டும் புகை பிடிப்பதற்குத் தூண்டியது. இயேசுக் கிறிஸ்துவின் விலையேறப்பெற்றக் கல்வாரி இரத்தத்தினால் கழுவப்பட்டு விட்டால் இப்படிப் பட்ட விட முடியாதப் பாவப் பழக்கங்கள் நம்மிடம் இருந்திருந்தால் அவைகள் எல்லாம் அடியோடு மறந்துப் போய்விடும். ஏனென்றால் அவர் நம்முடையப் பாவங்கள் அக்கிரமங்கள் எல்லாவற்றையும் மன்னித்துக் கடலின் ஆழத்திலே போட்டுவிட்டார். நம்மிடையே உள்ள துக்கங்கள் பாரங்கள் எல்லாம் மறைந்துப் போய்விடும்.

சிந்தனை: "நீங்கள் பாவத்தினின்று விடுதலையாக்கப்பட்டு, தேவனுக்கு அடிமைகளானதினால், பரிசுத்தமாகுதல் உங்களுக்குக் கிடைக்கும் பலன், முடிவோ நித்தியஜீவன்." ரோமர் 6:22

ஜெபம்: இரக்கமும் மனதுருக்கமும் நிறைந்த அன்பின் ஆண்டவரே விட முடியாமல் இருக்கின்றப் பாவப்பழக்கத்தில் இருந்து விடுதலை தாரும். ஆமேன்.

தமிழ் வேதாகமம் படிக்க இங்கே சொடுக்கவும்

ஒளியினிடத்தில் வருதல்

2008-10-18T19:38:00.001+05:30

"சத்தியத்தின்படி செய்கிறவனோ, தன் கிரியைகள் தேவனுக்குள்ளாய்ச் செய்யப்படுகிறதென்று வெளியாகும்படிக்கு, ஒளியினிடத்தில் வருகிறான் என்றார்." யோவான் 3 : 21

கடுமையான வெயில் காலம் ஒன்றின் இரவுப் பொழுதில் திடீரென மின்சாரம் தடைபட்டு விடுகின்றது. நம்மால் வீட்டிற்குள் ஒரு சில நிமிடங்கள் கூட மின்சாரம் இல்லாமல் இருக்க முடிவதில்லை காரணம் வெயில் காலத்திலே வீட்டின் வெப்பநிலை மிகவும் அதிகமாகக் காணப்படும். வீட்டிற்கு வெளியே காற்று அடிக்குமா என்று வீட்டிற்கு வெளியே வருகின்றோம். சிறிது நேரத்தில் தடைபட்டிருந்த மின்சாரம் வருகின்றது. உடனே நாம் வீட்டிற்குள்ளே சென்று மின்விசிறிக்குக் கீழேயோ அல்லது குளிர்சாதனப் பெட்டிக்கு முன்பாகவோ சென்று நிற்கின்றோம். மின்சாரம் வந்ததினால் நமது வீட்டினுடைய வெப்பநிலையைச் சிறிது குறைக்கும் என்று நிம்மதிப் பெருமூச்சு விடுகின்றோம்.

இதனைப் போலத்தான் இருளான உலக வாழ்விற்கும் சாத்தானிற்கும் அடிமைப்பட்டுக் கிடக்கின்ற நாம் ஒளியான இயேசுக் கிறிஸ்துவினிடத்திற்கு வரும்போது நமக்குக் கிடைக்கின்ற மகிழ்ச்சி அளவிடமுடியாதது. நமது உள்ளம் சந்தோஷத்தினாலும் சமாதானத்தினாலும் நிறைவாகக் காணப்படும். ஆனால் நாமோ கற்களுக்கு அடியில் வாழும் சிறு பூச்சிகளைப்போலக் கல்லைப் புரட்டினாலும் மீண்டும் அந்த இருளான கற்களுக்கு அடியிலே செல்வது போல நாமும் மனந்திரும்பாமல் மீண்டும் மீண்டும் பாவமான வாழ்க்கையையே வாழ்ந்து வருகின்றோம். இப்படியே நாம் வாழ்ந்துக் கொண்டிருப்பதனால் நமக்கும் பயன் இல்லை இந்த உலகத்தில் வாழ்கின்ற மற்ற மக்களுக்கும் பயன் இல்லை. நாம் ஒளியான கிறிஸ்துவை நம் உள்ளத்தில் தரித்துக் கொள்ளும் போது மலையின் மேல் உள்ள பட்டணம் எங்கும் தெரிவது போல நாமும் நம்முடைய நற்காரியங்களால் மற்ற மக்களையும் ஆதாயப்படுத்திக் கொள்ளலாம். இதன் பலன் நமக்குக் கிறிஸ்துவின் வருகையில் அளிக்கப்படும்.

சிந்தனை: நாம் ஒளியின் பிள்ளையாக வாழ்கின்றோமா? அல்லது இருளின் பிள்ளயாக வாழ்கின்றோமா?

ஜெபம்: அன்பின் தேவனே நான் என்னையே உமக்கு அர்ப்பணிக்கின்றேன் நான் உமது பிள்ளையாக உம் சித்தத்தின்படி நடக்கக் கிருபை தாரும். ஆமேன்.

தமிழ் வேதாகமம் படிக்க இங்கே சொடுக்கவும்

நன்மை செய்

2008-09-19T20:17:00.001+05:30

மனுஷர் உங்களுக்கு எவைகளைச்செய்ய விரும்புகிறீர்களோ, அவைகளை நீங்களும் அவர்களுக்குச் செய்யுங்கள்;" மத்தேயு 7:12

இந்த வசனத்தை விளக்குவதற்கு ஒரு உதாரணத்தை எடுத்துக் கொள்வோம். நீங்கள் ஒரு அலுவலகத்தில் வேலை பார்த்துக் கொண்டிருக்கிறீர்கள். நாம் வேலை பார்க்கின்ற அலுவலகத்திற்கு வருகின்ற வாடிக்கையாளர்கள் அல்லது உடன் ஊழியர்கள் ஆகியோரிடம் நாம் எப்படி நடந்துக் கொள்கின்றோம். ஆனால் நமது மேலதிகாரி நம்மிடம் கோபம் கொள்கின்ற போது நமக்கு அவர் மீது எவ்வளவு கோபம் வருகின்றது. இதைத் தானே நாமும் மற்றவர்களுக்குச் செய்கின்றோம் என்று நாம் நினைப்பதில்லை மாறாக அவர் நம்மிடம் காண்பித்தக் கோபத்தை மற்றவர்கள் மீது காட்டுகின்றோம். நாம் நம்மிடம் கூட வேலை பார்ப்பவர்களிடமும் வாடிக்கையாளர்களிடமும் அன்புடன் நடந்து கொண்டு நமது வேலையைச் சரியாகச் செய்யும் போது நமது மேலதிகாரியும் நம்மிடம் கோபம் கொள்ளாமல் நம்மைப் பாராட்டுவார் அல்லவா. நாம் மற்ற மனிதர்களிடம் அன்பு கூர்ந்து நற்காரியங்களைச் செய்யும் போது நம்மைப் பார்க்கின்ற மற்ற மனிதர்களும் நம்மிடம் அன்புடன் நடந்து கொள்வார்கள்.

இதனைத் தான் இயேசுகிறிஸ்துவும் தமது போதனையில் மற்ற மனிதர்கள் நமக்கு என்ன செய்ய வேண்டுமென்று நாம் விரும்புகின்றோமோ அதனையே நீங்களும் பிறருக்குச் செய்யுங்கள் என்று சொல்லுகின்றார். நமக்கு மற்ற மனிதர்கள் நன்மை செய்ய வேண்டும் என்று விரும்புகின்றோமா அல்லது தீமை செய்ய விரும்புகின்றோமா. இவைகளின் காரணக் கருவியாக நம்முடையச் செயல்களே இருக்கின்றது . வள்ளுவரும் "பிறர்க்கின்னா முற்பகல் செய்யின் தமக்கின்னா பிற்பகல் தாமே வரும்" என்றக் குரளில் இதனைத்தான் வலியுருத்துகின்றார். நாம் மற்றவர்களுக்கு எப்படிச் செய்கின்றோமோ அப்படியே நமக்கும் செய்யப்படும்.

சிந்தனை: மற்றவர்களிடம் நாம் எப்படி நடந்துக் கொள்கின்றோம்?

ஜெபம்: அன்பின் தேவனே நான் மற்ற மனிதர்களிடம் அன்புகூர்ந்து அவர்களுக்கு நன்மைகள் செய்து அதன் மூலம் உமது நாமத்தை மகிமைப்படுத்தக் கிருபை தாரும். ஆமேன்.

தமிழ் வேதாகமம் படிக்க இங்கே சொடுக்கவும்

யார் குற்றவாளி?

2008-09-12T20:37:00.001+05:30

வேதபகுதி: மத்தேயு 7 : 1- 5

"நீங்கள் குற்றவாளிகளென்று தீர்க்கப்படாதபடிக்கு மற்றவர்களைக் குற்றவாளிகளென்று தீர்க்காதிருங்கள்." மத்தேயு 7 : 1

ஒரு ஊரில் துறவி ஒருவர் ஒரு குடிசை ஒன்றைப் போட்டுக் கொண்டு அவரைப் பார்க்க வருகின்ற மக்களுக்கு அறிவுரைகள் கூறி வந்தார். அவரது குடிசைக்கு அருகில் ஒரு சிறிய வீடு ஒன்று இருந்தது. அந்த வீட்டில் ஒரு பெண் இருந்தார். அவர் விபசாரத்தில் ஈடுபட்டு வந்தார். இந்த துறவி காலையில் தனது குடிசையை விட்டு வெளியே வந்து உட்கார்ந்து விடுவார். அந்த வீட்டிற்கு விபசாரத்திற்கு எத்தனைப் பேர் வருகின்றார்கள் என்பதை எண்ணி அத்தனை அளவு சிறு கற்களை எடுத்து ஒரு மூலையில் போட்டார். நாளாக நாளாக அது ஒரு குவியலானது. துறவிக்கு இது ஒரு பொழுதுபோக்காகவே இருந்தது. துறவிக்கு வயதான காரணதினால் வியாதிப்பட்டார். இந்தத் துறவிக்கு வேலையே அந்தப் பெண்ணைப் பற்றிக் குறை சொல்வது தான். இடைப்பட்ட காலத்தில் அந்தப் பெண்ணும் தன்னுடையத் தவறுகளை எல்லாம் விட்டு விட்டு நல்லவராக வாழ்ந்தார். அந்தப் பெண்ணும் மரித்தார்.ஒரு சில நாட்களில் துறவியும் மரித்தும் விட்டார். ஊர்ப் பெரியவர்கள் கூடி அந்தத் துறவியை நல்ல முறையில் அடக்கம் செய்தனர். இருவரும் மோட்சத்திற்குச் செல்கின்றனர். இறைவன் அந்தப் பெண்ணிற்கு மோட்சத்தையும் துறவிக்கு நரகத்தையும் தீர்ப்பு எழுதினார். துறவி நான் என்னத் தவறு செய்தேன் நரத்திற்கு அனுப்புதற்கு என்று இறைவனிடம் கேட்டார். அதற்கு இறைவன் உனது வாழ்நாள் முழுவது இந்தப் பெண்ணைப் பற்றியே மற்றவர்களிடம் குறைகூறுவதிலேயே களித்தாய் ஆனால் இந்தப் பெண்ணோ தன்னுடையத் தவறுகளை உணர்ந்து திருந்தி வாழ்ந்தாள் என்று கூறினார்.

இது ஒரு வேடிக்கையான கதை தான் என்றாலும் நம்மில் அநேகர் இந்தத் துறவியைப் போலத்தான் மற்றவர்கள் செய்யும் சிறு தவறுகளையும் பெரிதுப்படுத்தி அவர்களைக் குற்றவாளிகளாகத் தீர்த்துக் கொண்டிருக்கின்றோம். ஆனால் நம்மில் உள்ளத் தவறுகளையெல்லாம் மறந்து அல்லது மறைத்துவிட்டு மற்றவர்களைக் குறைகூறுவதிலேயேக் காலந்தள்ளிக் கொண்டிருக்கின்றோம். ஆனால் அவர்கள் தங்களுடையத் தவறுகளை விட்டு மனந்திரும்பி நியாயத்தீர்ப்பின் நாளிலே நித்தியத்திற்குப் பாத்திரவான்கள் ஆகிவிடுவார்கள். ஆனால் நாமோ அழிவுக்கு ஒப்புக்கொடுக்கப்பட்டு விடப்படுவோம். மற்றவர்களைத் தீர்க்கின்ற நம்மைப் பார்த்துதான் ஆண்டவர் மாயக்காரனே என்று அழைக்கின்றார். மற்றவர்களைக் குற்றவாளிகளாகத் தீர்ப்பதற்கு நமக்கு அதிகாரம் இல்லை.இந்த அதிகாரங்கள் தேவனுக்கு உரியது. நாம் நம்மில் உள்ளத் தவறுகளை இறைவனிடம் அறிக்கையிட்டு மன்னிப்பு பெறுவோம். மற்றவர்கள் தவறு செய்பவர்களாயிருந்தால் அவர்கள் மனம் மாறும் படியாக ஜெபிப்போம். தேவன் தாமே நம்மை ஆசீர்வதித்து வழிநடத்துவாராக.ஆமேன்.

சிந்தனை: "நமக்குப் பாவமில்லையென்போமானால், நம்மை நாமே வஞ்சிக்கிறவர்களாயிருப்போம், சத்தியம் நமக்குள் இராது." 1 யோவான் 1 : 8

ஜெபம்: அன்பின் ஆண்டவரே நான் மற்றவர்களைக் குற்றவாளியாகத் தீர்க்காமலும் என்னை மற்றவர்கள் குற்றவாளியாகத் தீர்க்காமலும் இருக்க என்னில் நல் நடக்கையைத் தந்து வழிநடத்தும். ஆமேன்.

தமிழ் வேதாகமம் படிக்க இங்கே சொடுக்கவும்

தானியேலின் வெற்றி(ஜெயம்)

2008-08-31T19:58:00.001+05:30

"தானியேலின் காரியம் ஜெயமாயிருந்தது." தானியேல் 6:28 பி

தானியேல் இஸ்ரவேல் தேசத்தில் இருந்து பாபிலோனுக்குக் கைதியாகக் கொண்டுச் செல்லப்பட்டார். ஆனாலும் அவர் பாபிலோனில் வாழ்ந்த காலங்களிலெல்லாம் மேன்மேலும் உயர்த்தப்பட்டார். தானியேல் சந்தித்த இராஜாக்கள் நான்கு பேர். இந்த நான்கு இராஜாக்களின் காலத்திலும் தானியேலின் காரியங்கள் அனைத்தும் வெற்றியாய் இருந்தது. தானியேலின் காரியம் ஜெயமாய் இருப்பதற்குத் தானியேலிடம் காணப்பட்ட ஒரு சில நற்காரியங்கள்

1. ராஜ போஜனத்தை விலக்கினான்:

தானியேல் ராஜாவினால் கட்டளையிடப்பட்ட ராஜபோஜனத்தையும் அவரால் கொடுக்கப்படுகின்ற திராட்சைரசத்தையும் விலக்கி விட்டு( தானியேல் 1: 8) மரக்கறிகளைக் கேட்டு வாங்கி உண்கின்றார். ராஜபோஜனத்தில் ஒரு வித போதை வஸ்து கலக்கப்படும் என்று சொல்லப்படுகின்றது. ஆகவே தானியேல் தன்னை மதுபானம் மற்றும் ராஜபோஜனத்தினின்றும் காத்துக் கொள்ளுகின்றார். நாம் இன்னும் மதுப்பழக்கத்தினால் தள்ளாடிக் கொண்டிருக்கின்றோமா? அல்லது எப்படி இருக்கின்றோம்?

2. கூடி ஜெபித்தல்:

தானியேல் பாபிலோனில் உள்ள ஞானிகள் அனைவரையும் கொல்வதற்கு ராஜா உத்தரவிட்டிருக்கிறார் என்பதை அறிகின்றான். ராஜாவிடம் போய் மற்றவர்கள் கொல்லப்படாமல் இருப்பதற்குத் தவனை கேட்கின்றார். தன்னுடைய நண்பர்கள் சாத்ராக் மெஷாக் ஆபேத்நேகோ ஆகியவர்களோடு சேர்ந்து தேவனிடத்தில் விண்ணப்பம் செய்கின்றார்( தானியேல் 2: 18). கர்த்தரும் இவர்களின் ஜெபத்தைக் கேட்டு தானியேலுக்குச் சொப்பனத்தையும் அதின் அர்த்தத்தையும் வெளிப்படுத்துகின்றார். நமக்கு நண்பர்கள் மற்றும் குடும்பத்தினருடன் கூடி ஜெபிக்கின்ற பழக்கம் உண்டா?

3. உண்மை :
தானியேல் தன்னுடைய எல்லாக் காரியத்திலும் மிகவும் உண்மையுள்ளவராகக் காணப்படுகின்றார். அப்படி உண்மையுள்ளவராய் இருந்தப்படியினால் பாபிலோனிய அதிகாரிகளால் தானியேலிடத்தில் எந்தக் குற்றமும் கண்டுபிடிக்க முடியவில்லை.( தானியேல் 6:4). நாம் நம்முடையப் பணிகளில் எப்படி இருக்கின்றோம்?

4. தனி ஜெபம்:

தானியேல் தினமும் மூன்று வேலைத் தவறாது இஸ்ரவேலின் தேவனை நோக்கி விண்ணப்பம் செய்து வந்தார்( தானியேல் 6 : 10). நாம் நமது அனுதின வேலையில் தனிஜெபத்திற்கு நேரம் ஒதுக்கி உள்ளோமா?

5. நண்பர்களின் தேர்வு:

தானியேல் எருசலேமிலிருந்து அநேகர் அடிமைகளாக வந்திருந்தாலும் தனது நண்பர்களாக கர்த்தருக்குப் பயந்து நடக்கும் சாத்ராக், மேஷாக், ஆபேத்நேகோவைத் தேர்ந்தெடுத்தார். நம்முடைய நண்பர்களின் தேர்வு எப்படி இருக்கின்றது?

நாமும் தானியேலிடம் காணப்பட்ட நற்குணங்களுடன் வாழுவோமென்றால் நம்முடையக் காரியங்களும் ஜெயமாகும் என்பதில் எவ்விதச் சந்தேகமுமில்லை

சிந்தனை: தானியேலிடம் உள்ள நற்குணங்கள் என்னிடத்தில் காணப்படுகின்றதா?

ஜெபம்: அன்பின் தேவனே தானியேலிடம் காணப்பட்ட அனைத்து நற்குணங்களும் என்னில் காணப்பட உம் கிருபையையும் வழிநடத்துதலையும் தாரும். ஆமேன்.

தமிழ் வேதாகமம் படிக்க இங்கே சொடுக்கவும்

மீட்கப்பட்டவர்களின் மகிழ்ச்சி

2008-08-02T19:58:00.001+05:30

"கர்த்தரால் மீட்கப்பட்டவர்கள் திரும்பி, ஆனந்தக்களிப்புடன் பாடி, சீயோனுக்கு வருவார்கள்; நித்திய மகிழ்ச்சி அவர்கள் தலையின்மேலிருக்கும்; சந்தோஷமும் மகிழ்ச்சியும் அடைவார்கள்; சஞ்சலமும் தவிப்பும் ஓடிப்போம்." ஏசாயா 35:10

மீட்கப்பட்டவர்கள் யார் என்று பார்ப்போமானால் கல்வாரியில் சிந்த்தப்பட்ட கிறிஸ்துவின் இரத்தத்தினால் கழுவப்பட்டவர்கள். கிறிஸ்துவின் இரத்தத்தினால் கழுவப்பட்டவர்களுக்குக் கிடைக்கும் பலன் என்னவென்றால் அவர்களுக்கு நித்திய மகிழ்ச்சி கிடைக்கும். நித்திய மகிழ்ச்சி என்றால் அவர்களுக்கு இனி துன்பமே கிடையாது சந்தோஷத்தையும் மகிழ்ச்சியையும் மட்டுமே என்றைக்கும் காண்பார்கள். ஆடிப்பாடி மகிழ்வார்கள். அவர்களுக்குத் துக்கம் என்பதும் இனி இல்லை.

இவைகள் அனைத்தும் கிறிஸ்துவின் இரண்டாம் வருகையின் போது நடக்கும் காரியங்கள். நாம் கிறிஸ்துவின் இரத்தத்தினால் கழுவப்பட்டு மீட்கப்பட்டவர்களாகும் போது நமக்கும் அந்த பாக்கியம் கிடைக்கும். நாம் கிறிஸ்துவின் இரத்தத்தினால் கழுவப்படாமல் பாவங்களோடு வாழ்ந்து கொண்டிருப்போமானால் நாம் பரிதாபத்திற்குரியவர்களாவோம். கிறிஸ்துவின் இரண்டாம் வருகையைக் குறித்து வேதத்தில் சொல்லப்பட்டக் காரியங்களெல்லம் நிறைவேறி வருகின்றது. கிறிஸ்துவானவர் விரைவில் வரப்போகின்றார் அப்பொழுது நாம் தகுதியுடையவர்களாயிருந்தால் மட்டுமே அவரைக் கண்டு தரிசிக்கும் பாக்கியம் கிடைக்கும் மற்றவர்களையெல்லாம் அவர் அக்கினிக் கடலிலே தள்ளி விடுவார்.

சிந்தனை: நான் கிறிஸ்துவின் இரத்தத்தால் கழுவப்பட்டிருக்கின்றேனா?

ஜெபம்: கர்த்தாவே என்னை உம்முடைய தூய இரத்தத்தால் கழுவி உம் அன்பினால் என்னை நிரப்பியருளும். ஆமேன்.

தமிழ் வேதாகமம் படிக்க இங்கே சொடுக்கவும்

ஆலோசனையில் பெரியவர்

2008-07-18T21:06:00.002+05:30

"அவர்(கர்த்தர்) ஆலோசனையில் ஆச்சரியமானவர், செயலில் மகத்துவமானவர்." ஏசாயா 28:29

நமது தேவனுக்கு இன்னொரு பெயர் ஆலோசனைக் கர்த்தர் என்பதாகும். இறைவன் கொடுக்கும் ஆலோசனைகள் ஆச்சரியமானவை அதிசயமானவை. ஆனால் நாமோ அவைகளைக் கேட்பதற்கும் செயல்படுத்துவதற்கும் முயல்வதில்லை. அவருடைய ஆலோசனைகளுக்குச் செவி கொடுத்து அதின்படி நடக்கும்போது அவைகளின் முடிவோ நாம் நினைப்பதற்கும் எதிர்பார்ப்பதற்கும் அரிய காரியங்களைச் செயல்படுத்துவார். ஆனால் நாமோ இறைவனுடைய ஆலோசனைகளுக்குச் செவிகொடுப்பதில்லை.

மோசேயும் தன்னுடைய வாழ்வில் ஒரு சோதனையைச் சந்திக்க நேரிட்டது. இஸ்ரவேல் ஜனங்களை எகிப்திலிருந்து கானானுக்கு வழிநடத்திச் செல்லுகின்ற வழியிலே காதேசிலே தண்ணீர் இல்லாதிருந்தது. கர்த்தர் மோசேயினிடமும் ஆரோனிடமும் தேவனுடையக் கோலை எடுத்துக் கொண்டு கன்மலையிடம் பேசுங்கள் என்று சொன்னார். ஆனால் அவர்களோ கன்மலையை அடித்தார்கள். இஸ்ரவேல் ஜனங்களுக்குத் தண்ணீர் கிடைத்தது ஆனால் மோசேக்கும் ஆரோனுக்கும் கானானுக்குச் செல்லக்கூடிய வாய்ப்புக் கிடைக்கவில்லை.

இறைவனுடைய ஆலோசனைகளை நாமும் பெற வேண்டுமானால் நாம் செய்ய வேண்டியது நம்மை முழுவதுமாக அர்ப்பணித்து இறைவனுடைய சன்னிதியில் காத்திருப்போமானால் அவர் தமது ஆலோசனைகளை தரிசனங்களின் மூலமாகவோ அல்லது வேதவசனங்களின் மூலமாகவோ நமக்கு அருளிச் செய்வார். தேவ சன்னிதியில் நாமும் காத்திருந்து ஜெபிப்போம் கர்த்தர் நமக்குப் பெரிய காரியங்களைச் செய்வார்.

சிந்தனை: நான் தேவனுடைய ஆலோசனைகளுக்குச் செவிகொடுக்கின்றேனா?

ஜெபம்: கர்த்தாவே நான் உம்முடைய ஆலோசனைகளுக்குச் செவிகொடுத்து அதன்படி நடக்கக் கிருபை செய்யும். ஆமேன்.

தமிழ் வேதாகமம் படிக்க இங்கே சொடுக்கவும்

வழி நடத்தும் தேவன்

2008-07-01T03:07:00.004+05:30

"உன் வழியைக் கர்த்தருக்கு ஒப்புவித்து, அவர்மேல் நம்பிக்கையாயிரு; அவரே காரியத்தை வாய்க்கப்பண்ணுவார்." சங்கீதம் 37:5

நமது ஆண்டவர் நம்மை முன்சென்று வழிநடத்தும் தேவனாயிருக்கின்றார். அவர் நம்மை நேரானப் பாதையிலே நல்ல மேய்ப்பனாக வழிநடத்துகின்றார். நாம் செல்ல வேண்டியப் பாதை எதுவோ அதனை நமக்குக் காட்டி நம்மை வழிநடத்துகின்றார். இஸ்ரவேல் ஜனங்கள் எகிப்தின் அடிமைத்தனத்தை விட்டு வரும் போது கர்த்தர் செங்கடலின் வழியாக அவர்களை நடத்துகின்றார். கர்த்தர் அவர்களை குறுக்கான வழியிலே நடத்தியிருக்கலாம். அப்படி நடத்தியிருந்தால் எகிப்தின் சேனைகளினால் பிடிபட்டுப் போயிருப்பார்கள். நாம் நம்மைக் கர்த்தருக்கு ஒப்புவித்து அவருடையச் சித்ததிற்கு நம்மை கையளிப்போமானால் கர்த்தர் நம்முடையக் காரியங்கள் எல்லாவற்றையும் பார்த்துக் கொள்ளுவார். நாம் செய்ய வேண்டியது நம்முடையப் பாரங்கள் எல்லாவற்றையும் அவருடைய சமூகத்தில் ஊற்றி விட வேண்டும். அநேகர் இதனைச் செய்ய மறந்து விடுகின்றனர். பின்னர் நான் கர்த்தருக்குப் பயந்து நடக்கின்றேனே ஏன் எனக்கு இந்தக் காரியம் ஏற்பட்டது என்று புலம்புகிறார்கள்.

ஒரு சில வாரங்களுக்கு முன்பதாக எனது உயரதிகாரி தலைமை அலுவலகத்திலிருந்து வந்திருந்தார். அவர் தான் தங்கியிருக்கும் இடத்தின் முகவரியைக் கொடுத்து அங்கு வந்து பார்க்கும்படியாகச் சொன்னார். எனக்கோ அந்த இடமோ தெரியாது. நான் புறபட்டவுடன் ஆண்டவரே எனக்கு இடம் தெரியாது நீரே என்னை நேர் வழியிலே நடத்தி சரியான இடத்திற்குச் செல்லத் துணை புரியும் என்று ஜெபித்துவிட்டுக் கிளம்பினேன். யாரிடமும் அந்த முகவரியைக் குறித்து விசாரிக்கவில்லை. ஆனால் நான் பல்வேறு சாலைகளைக் கடந்து செல்லுகின்றேன் எனக்குச் சிறிது சந்தேகம் நான் சரியானப் பாதையிலேச் செலுகின்றேனா என்று ஆனால் முடிவிலே நான் செல்லவேண்டிய முகவரிக்கு நேராகக் கர்த்தர் என்னை வழிநடத்தினார். ஆம் பிரியமானவர்களே நாம் செய்யும் ஒவ்வொரு செயலுக்கு முன்பாகவும் ஜெபித்துச் செயல்படுவோமானால் கர்த்தர் நம்முடையக் காரியங்களை ஜெயமாக முடியப்பண்ணுவார்.

சிந்தனை: நான் என்னுடையக் காரியங்களை முதலாவதாகத் தேவனுக்குத் தெரியப்படுத்துகின்றேனா?

ஜெபம்: கர்தாவே நான் எல்லாக் காரியங்களையும் முதலாவதாக உமக்குத் தெரியப்படுத்தி அதன் மூலமாக ஜெயமாகக் காரியங்களை முடிக்கக் கிருபை தாரும். ஆமேன்.

தமிழ் வேதாகமம் படிக்க இங்கே சொடுக்கவும்

கிருபை

2008-06-18T19:47:00.004+05:30

"நாம் நிர்மூலமாகாதிருக்கிறது கர்த்தருடைய கிருபையே, அவருடைய இரக்கங்களுக்கு முடிவில்லை" புலம்பல் 3 :22

கிருபை என்றால் என்ன என்று பார்ப்போமானால் தகுதியில்லாதவர்களுக்குத் தேவன் கொடுக்கின்ற ஈவு. நாம் இம்மட்டும் இருப்பதே கடவுளின் சுத்தக் கிருபையே. அவருடையக் கிருபை இல்லாமல் நம்மால் ஒன்றும் செய்ய முடியாது.தேவன் யாருக்கெல்லாம் தம்முடையக் கிருபைகளைத் தருகின்றார் என்று பார்ப்போமானால்

1தாழ்மை உள்ளவர்களுக்கு:

தேவன் தாழ்மையுள்ளவர்களுக்குக் கிருபைகளை அளிக்கின்றார். எனது யாருக்குக் கிருபை என்றப் பதிவில் சிறிது விவரித்து உள்ளேன் அதையும் படிக்கவும்.உசியா ராஜா கடவுள் தனக்கு அளித்திருக்கும் கிருபைகளை மறந்து பெருமை கொண்டு மனமேட்டிமை அடைந்து அவன் செய்த காரியத்தினால் குஷ்ட ரோகியானான்.

"பெருமையுள்ளவர்களுக்குத் தேவன் எதிர்த்து நிற்கிறார், தாழ்மையுள்ளவர்களுக்கோ கிருபை அளிக்கிறார்."1 பேதுரு 5 :5

2. இறைவனுக்குப் பயந்து நடப்பவர்களுக்கு:

கர்த்தர் தமக்குப் பயந்து தனது கற்பனைகளுக்குக் கீழ்ப்படிந்து நடப்பவர்களுக்குத் தம்முடையக் கிருபையை அளவில்லாமல் ஊற்றுகின்றார். யோசேப்பின் வாழ்க்கையைப் பார்ப்போமானால் அவன் இறைவனுக்குப் பயந்து நடந்ததினால் கர்த்தர் தமது கிருபையினால் அவனை எகிப்தின் அதிபதியாக உயர்த்தினார்.

"கர்த்தருடைய கிருபையோ அவருக்குப் பயந்தவர்கள்மேலும், அவருடைய நீதி அவர்கள் பிள்ளைகளுடைய பிள்ளைகள்மேலும் அநாதியாய் என்றென்றைக்கும் உள்ளது" சங்கீதம் 103:17

"கர்த்தருடைய உடன்படிக்கையையும் அவருடைய சாட்சிகளையும் கைக்கொள்ளுகிறவர்களுக்கு, அவருடைய பாதைகளெல்லாம் கிருபையும் சத்தியமுமானவைகள்." சங்கீதம் 25:10

3. இறை நம்பிக்கை உள்ளவர்களுக்கு(Faith in God):

தேவன் தம்மேல் நம்பிக்கையாயிருப்பவர்களுக்கு கிருபைகளை அளித்து ஆசீர்வதிப்பார். எசேக்கியா ராஜாவின் வாழ்க்கையைப் பார்ப்போமானால் அவனை எதிரிகள் துரத்துகின்ற சமயத்தில் எல்லாம் அவன் கர்த்தரை மட்டுமே நம்பி ஜெபித்ததினால் அவனுக்கு கிருபை அளித்து அவனுடைய சத்துருக்களினின்று அவனை விலக்கிக் காத்தார்.

"துன்மார்க்கனுக்கு அநேக வேதனைகளுண்டு; கர்த்தரை நம்பியிருக்கிறவனையோ கிருபை சூழ்ந்துகொள்ளும்." சங்கீதம் 32:10

நானும் கடந்த வாரத்திற்கு முந்தின வாரத்தில் அலுவலகத்திற்கு இருசக்கர வாகனத்தில் வந்து கொண்டிருக்கும்போது முன்பதாக இருசக்கர வாகனத்தில் சென்று கொண்டிருந்த நபர் திடீரெனத் திரும்பியதினால் விபத்திற்குள்ளானேன். வாகனத்திலிருந்து தூக்கி எறியப்பட்டு சிறிது தூரம் இழுத்துச் செல்லப்பட்டேன். ஆனாலும் சிறியக் காயங்களுடன் கர்த்தர் கிருபையாகக் காத்துக் கொண்டார். ஆம் இறைவனின் கிருபை இல்லையென்றால் நம்மால் ஒன்றும் செய்ய முடியாது.

"என் கால் சறுக்குகிறது என்று நான் சொல்லும்போது, கர்த்தாவே, உமது கிருபை என்னைத் தாங்குகிறது." சங்கீதம் 94:18

சிந்தனை: "என் கிருபை உனக்குப்போதும்; பலவீனத்திலே என் பலம் பூரணமாய் விளங்கும் என்றார். " 2 கொரிந்தியர் 15:9

ஜெபம்: கர்த்தாவே உம்முடையக் கிருபைகளை எங்களுக்கு அதிகமாய்த் தந்து எங்களை வழிநடத்தும். ஆமேன்.

தமிழ் வேதாகமம் படிக்க இங்கே சொடுக்கவும்

யாருக்கு உயர்வு

2008-06-04T20:00:00.005+05:30

"அவன் உயர்ந்த இடங்களில் வாசம்பண்ணுவான்; கன்மலைகளின் அரண்கள் அவனுடைய உயர்ந்த அடைக்கலமாகும்; அவன் அப்பம் அவனுக்குக் கொடுக்கப்படும்; அவன் தண்ணீர் அவனுக்கு நிச்சயமாய்க் கிடைக்கும்." ஏசாயா 33:16

கிறிஸ்தவர்கள் அனைவருக்கும் உயர்வு கிடைத்து விடுமா என்று பார்ப்போமானால் இல்லை என்பதே பதில். நீங்கள் உயர்த்தப்படுவீர்கள், ஆசீர்வதிக்கப்படூவீர்கள் என்று தானே ஊழியர்கள் பிரசங்கிக்கின்றார்கள். அவர்கள் கூறுவது பொய்யா அல்லது உண்மையா? பின்னை யார் உயர்வடைவார்கள் என்ற கேள்வி உங்களுக்கு எழும்பக்கூடும். உங்களது கேள்விக்குப் பதில் இங்கே. யார் கிறிஸ்துவின் முன்பாக உயர்த்தப்படுவார்கள் என்று பார்ப்போமானால்

1 நீதி செய்பவர்கள்:

"நீதிமானுடைய சிரசின்மேல் ஆசீர்வாதங்கள் தங்கும்; கொடுமையோ துன்மார்க்கனுடைய வாயை அடைக்கும்." நீதிமொழிகள் 10: 6

2. செம்மையானவைகளைச் செய்பவர்கள்:

"நீதிமானுக்காக வெளிச்சமும், செம்மையான இருதயத்தாருக்காக மகிழ்ச்சியும் விதைக்கப்பட்டிருக்கிறது." சங்கீதம் 97:11

3. பரிதானம்(லஞ்சம்) வாங்காதவர்கள்:

"தன் பணத்தை வட்டிக்குக்கொடாமலும், குற்றமில்லாதவனுக்கு விரோதமாய்ப் பரிதானம் வாங்காமலும் இருக்கிறான். இப்படிச் செய்கிறவன் என்றென்றைக்கும் அசைக்கப்படுவதில்லை." சங்கீதம் 15: 5

4.பொல்லாங்கான(தீமையான) காரியங்களைச் செய்யாதவர்கள்:

"பொல்லாதவர்கள் அறுப்புண்டு போவார்கள்; கர்த்தருக்குக் காத்திருக்கிறவர்களோ பூமியைச் சுதந்தரித்துக்கொள்வார்கள்." சங்கீதம் 37:9

நாமும் மேலேக் குறிப்பிட்டுள்ளக் காரியங்களைக் கடைப்பிடித்து வாழ்வோமானால் கர்த்தர் நம்மையும் இந்தப் பூமியிலே உயர்த்துவார்.

சிந்தனை: நான் உயர்த்தப்படுவதற்குத் தகுதியாய் இருக்கின்றேனா?

ஜெபம்: கர்த்தாவே நான் இவைகளைக் கைக்கொண்டு இந்த உலகத்தின் ஆசீர்வாதங்களைப் பெற்றுக் கொள்ள உமதுக் கிருபைகளைத் தாரும். ஆமேன்.

தமிழ் வேதாகமம் படிக்க இங்கே சொடுக்கவும்

நீதியின் கிரியை

2008-06-03T20:43:00.003+05:30

"நீதியின் கிரியை சமாதானமும், நீதியின் பலன் என்றுமுள்ள அமரிக்கையும் சுகமுமாம்." ஏசாயா 32:17

நாம் வாழுகின்ற இந்த நவீனக் காலத்தில் நீதியாய் நடப்பது என்பது மிகவும் கடினமாகவே இருக்கின்றது. கர்த்தருக்குப் பயந்து நீதியாய் நடப்பவர்கள் என்றால் விரல் விட்டு எண்ணக் கூடிய அளவில் தான் இருக்கின்றது. கிறிஸ்தவர்களும் உலகத்தோடு ஒத்துப் போக வேண்டும் என்று நினைத்துக் கொண்டு நியாயங்களையும் நீதியையும் விட்டு விடுகின்றார்கள். அநேக கிறிஸ்தவ அரசு அதிகாரிகள் லஞ்சம் வாங்குவதைக் காண முடிகின்றது. ஒரு சில கிறிஸ்தவ நீதிபதிகளும் கூட லஞ்சம் வாங்கிக் கொண்டு நியாயத்தைப் புரட்டுகின்றார்கள். இப்படி நியாயங்களைப் புரட்டி கர்த்தர் நமக்கு கூறியக் கட்டளையை மறந்து விடுகின்றோம்.

"நியாயவிசாரணையில் அநியாயம் செய்யாதிருங்கள்; சிறியவனுக்கு முகதாட்சிணியம் செய்யாமலும், பெரியவனுடைய முகத்துக்கு அஞ்சாமலும், நீதியாகப் பிறனுக்கு நியாயந்தீர்ப்பாயாக." லேவியராகமம் 19 : 15

நோவா தன்னுடையக் காலத்திலே நீதிமானாக இருந்ததினால் தான் கர்த்தர் அவரை அழிக்கச் சித்தம் கொள்ளாமல் பேழையினால் அவரைக் காப்பாற்றினார்.

"நீதிமான் பனையைப்போல் செழித்து, லீபனோனிலுள்ள கேதுருவைப்போல் வளருவான்." சங்கீதம் 92: 12

ஆனால் ஆகாப் ராஜாவைப் பாருங்கள் அவன் நாபோத்தினிடமிருந்து தோட்டத்தை அநியாயமாகப் பறித்ததினால் அவனுடைய சந்ததியே அழிந்துப் போனது.

"கர்த்தர் நீதிமான்களின் வழியை அறிந்திருக்கிறார்; துன்மார்க்கரின் வழியோ அழியும்" சங்கீதம் 1: 6

நீதி நியாயங்களைப் புரட்டுகின்றக் கடைசிக் காலத்திலே கிறிஸ்துவின் வருகையை எதிர் நோக்கியிருக்கின்ற நாம் கர்த்தருக்குப் பயந்து நீதி நியாயங்களைச் செய்வோமானால் நாமும் அவருடைய வருகையில் நித்திய ராஜ்ஜியத்திற்குச் செல்லலாம்.மாறாக இந்த உலகத்தின் மக்களைப் போல நாமும் அநீதிகளைச் செய்து நியாயங்களைப் புரட்டுவோமானால் நம்மைத் தேவன் நியாயத்தீர்ப்பின் நாளிலே நித்திய அக்கினிக் கடலுக்கு ஒப்புக் கொடுப்பார்.

சிந்தனை: "துன்மார்க்கனுடைய வீட்டில் கர்த்தரின் சாபம் இருக்கிறது, நீதிமான்களுடைய வாசஸ்தலத்தையோ அவர் ஆசீர்வதிக்கிறார்." நீதிமொழிகள் 3 : 33

ஜெபம்: கர்த்தாவே நான் உம்முடையக் கட்டளைக்குக் கீழ்ப்படிந்து நீதி செய்யவும் நியாயங்களை நிறைவேற்றவும் கிருபை தாரும். ஆமேன்.

தமிழ் வேதாகமம் படிக்க இங்கே சொடுக்கவும்

முழு இருதயம்

2008-05-31T01:46:00.002+05:30

"இந்த ஜனங்கள் தங்கள் வாயினால் என்னிடத்தில் சேர்ந்து, தங்கள் உதடுகளினால் என்னைக் கனம்பண்ணுகிறார்கள்; அவர்கள் இருதயமோ எனக்குத் தூரமாய் விலகியிருக்கிறது;" ஏசாயா 29:13

மேலே குறிப்பிடப்பட்டுள்ள வசனத்தின் நிலைமையில் தான் அநேகக் கிறிஸ்தவர்கள் வாழ்ந்துக் கொண்டிருக்கின்றார்கள். ஏதோ ஞாயிற்றுக்கிழமை என்றால் ஆலயத்திற்குச் செல்ல வேண்டும், பண்டிகைகள் வந்தால் அதற்காகப் புதிய உடைகள் வாங்கவும் சிறப்பாகப் பண்டிகைகளைக் கொண்டாட வேண்டும் என்கின்ற மனப் போக்கில் தான் வாழ்ந்துக் கொண்டிருக்கின்றார்கள். உண்மையான மனதுடனும் தூய இருதயத்துடனும் தேவனை ஆராதிக்க வேண்டும் என்ற எண்ணம் இல்லாமல் கடமைக்காக ஆராதனையில் கலந்து கொள்கின்றார்கள். ஆராதனைகளில் வேடிக்கைப் பார்த்துக் கொண்டும் மற்றவர்களோடு பேசிக் கொண்டும் தாங்கள் இறைவனின் திருச்சன்னிதியில் இருக்கின்றோம் என்பதை மறந்து விடுகின்றனர். அவர்களைப் பார்த்துதான் இறைவன் மனந்திரும்புங்கள் என்று ஏசாயா தீர்க்கன் மூலமாக எச்சரிக்கின்றார்.

நாம் இன்னும் நம்முடைய இருதயத்தைக் கடினப்படுத்திக் கொண்டு இருப்போமானால் நம்மைத் தேவன் நியாயத்தீர்ப்பு நாளிலே அக்கினிக்கு ஒப்புக் கொடுப்பார். அப்பொழுது நம்மைத் தப்புவிப்பார் ஒருவருமில்லை. நாம் நம்மை அர்ப்பணித்து நம்முடைய முழு இருதயத்தோடும் தேவனை ஆராதித்து அவருடையக் கற்பனைகளைப் பின்பற்றி நடப்போமானால் நம்மையும் தேவன் ஆசீர்வதித்து வழிநடத்துவார். மாறாக நாம் இன்னமும் கடமைக் கிறிஸ்தவர்களாக வாழுவோமானால் நாம் தண்டனைக்குத் தப்பித்துக் கொள்ள முடியாது.

"என்னைக் கனம்பண்ணுகிறவர்களை நான் கனம் பண்ணுவேன்" 1 சாமுவேல் 2 :30

சிந்தனை: நாம் நம்முடைய முழு இருதயத்தோடும் தேவனை ஆராதிக்கின்றோமா?

ஜெபம்: கர்த்தாவே நான் என்னுடைய முழு இருதயத்தோடும் உமக்குக் கீழ்ப்படிந்து உம்மை உண்மையாய் ஆராதிக்கக் கிருபை தாரும். ஆமேன்.

தமிழ் வேதாகமம் படிக்க இங்கே சொடுக்கவும்

தாழ்மை

2008-05-22T20:58:00.003+05:30

"நீங்களெல்லாரும் ஒருவருக்கொருவர் கீழ்ப்படிந்து, மனத்தாழ்மையை அணிந்துகொள்ளுங்கள்; பெருமையுள்ளவர்களுக்குத் தேவன் எதிர்த்து நிற்கிறார், தாழ்மையுள்ளவர்களுக்கோ கிருபை அளிக்கிறார்." 1 பேதுரு 5:5

இந்த நவீன உலக வாழ்க்கையில் தாழ்மையாக நடப்பது என்பது மிகவும் கடினமான ஒன்றாக மாறிவிட்டது. தாழ்மையுள்ள மனிதர்களைப் பார்ப்பதும் மிகவும் அரிதாயிருக்கின்றது. எல்லா மனிதர்களும் மேட்டிமையுடனும் பெருமையுடனும் வாழ்வதைத் தான் பார்க்க முடிகின்றது. நான் பெரியவன் நீ பெரியவன் என்று போட்டிபோட்டுக்கொண்டு வாழ்கின்றார்கள். அதின் காரணமாக போட்டிகள் பொறாமைகள் நிறைந்து மனதில் சமாதானம், அன்பு இல்லாமல் வாழ்ந்து கொண்டிருக்கின்றார்கள். இவர்கள் தாழ்ந்து போயிருந்தால் நிம்மதியோடு இருந்திருக்கலாம். நான் என்ற பெருமை, அகந்தை, மேட்டிமை அவர்களது கண்களைத் தடுத்து விட்டது.

வேதாகமத்திலும் தங்களுடைய மேட்டிமையான காரியங்களால் தங்களது சமாதனத்தைத் தொலைத்தவர்களில் சவுலையும் உசியா ராஜாவையும் பாருங்கள். சவுல் தன்னுடைய மேட்டிமையினால் போருக்குச் சென்ற இடத்தில் பலிகளை இட்டதினால் கர்த்தர் அவனுடைய சந்ததிக்கு ராஜ்யபாரத்தைக் கொடுக்கவில்லை. சவுல் தன்னுடையக் காலம் முழுவதும் தன் சந்ததிக்கு ராஜ்ஜியபாரம் கிடைக்காது என்று எண்ணி தாவீதைப் பின்தொடருவதிலேயேச் செலவிட்டான். உசியாவைப் பார்ப்போமானால் கர்த்தர் அவனை ஆசீர்வதித்ததினால் மேட்டிமையாகி எருசலேம் தேவாலயத்திலே தூபக்கலசத்தை எடுத்துக் கொண்டுச் சென்று பலியிட்டதினால் கர்த்தருடையக் கோபத்திற்கு ஆளாகி குஷ்டரோகத்தைப் பெற்றுக் கொண்டான். காலம் முழுவதும் தனி அறையிலே தான் வாசம் செய்தான். மரணத்திற்குப் பிறகு கூட அவனை ராஜாக்களின் கல்லறையிலே வைக்கவில்லை. பரிதாபம்.

நாமும் இந்தப் பரிதாபத்திற்கு ஆளாக வேண்டுமா? சிந்திப்போம். கிறிஸ்து இயேசு நமக்குக் கற்றுத் தந்த தாழ்மையோடு வாழ்வோம் கர்த்தர் நம்மை ஆசீர்வதிப்பாராக.

சிந்தனை: "தேவன் பெருமையுள்ளவர்களுக்கு எதிர்த்து நிற்கிறார், தாழ்மையுள்ளவர்களுக்கோ கிருபை அளிக்கிறார்" யாக்கோபு 4:6

ஜெபம்: கர்த்தாவே நான் என்னிலேத் தாழ்மையைத் தரித்து உமக்குப் பிரியமாய் நடக்கக் கிருபை தாரும். ஆமேன்.

தமிழ் வேதாகமம் படிக்க இங்கே சொடுக்கவும்

மீட்பு

2008-05-20T20:45:00.004+05:30

"எல்லாரும் பாவஞ்செய்து, தேவமகிமையற்றவர்களாகி, இலவசமாய் அவருடைய கிருபையினாலே கிறிஸ்து இயேசுவிலுள்ள மீட்பைக்கொண்டு நீதிமான்களாக்கப்படுகிறார்கள்;" ரோமர் 3:23,24

இந்த உலகத்தில் மனிதர்களாகப் பிறந்த யாவருமே பாவிகள் தான். நான் பாவம் செய்யவில்லை என்று ஒரு மனிதனாலும் கூற முடியாது. இந்த உலகத்தில் உள்ள மனிதர்கள் அனைவரும் பாவம் செய்ததனால் தேவன் நோவாவை மட்டும் பேழையின் மூலம் காப்பாற்றி மற்ற மனிதர்களை எல்லாம் அழித்தார். பின்னும் ஜனங்கள பாவம் செய்ததனால் தேவன் மோசே மூலமாக ஜனங்களுக்கு நியாயப்பிரமாணத்தை ஏற்படுத்தினார். அதின் மூலமாக ஜனங்கள் செய்த பாவங்களுக்கு பாவநிவிர்த்தியாக பலிகளை ஏற்படுத்திக் கொடுத்தார்.

பலிகளின் மூலமாகப் பாவநிவிர்த்தி செய்து கொள்ளலாம் என்று மக்கள் பின்னும் அதிகமாகப் பாவங்களைச் செய்து இறைவனின் சாயலில் படைக்கப்பட்ட மனிதர்கள் இறைவனின் சாயலை இழந்து விட்டார்கள் ஆகவே தான் இறைவன் தன்னுடைய ஒரேபேரான குமாரனாகிய இயேசு கிறிஸ்துவை இந்த பாவ உலகத்தின் மக்களின் மீட்புக்காக இந்த உலகத்தின் மீட்பராக அனுப்பினார். இயேசு கிறிஸ்து தன்னுடைய ஊழியக் காலத்தில் மக்கள் மனந்திரும்பும்படியாக அறைகூவல் விடுத்தார். அதின் தொடர்ச்சியாகத் தான் இந்த பாவ உலகத்தின் மக்களின் மீட்பிற்காகத் தன்னுடைய உயிரைச் சிலுவையில் தியாகம் செய்தார். இயேசு கிறிஸ்துவின் இரத்ததினாலன்றி ஒருவரும் பரலோகம் செல்லமுடியாது. மீட்பரின் கல்வாரிச் சிலுவையின் இரத்தத்தால் கழுவப்பட்டவர்கள் மாத்திரமே பரலோகராஜ்ஜியத்தைச் சுதந்தரிக்க முடியும். அவருடைய இரத்தத்தால் கழுவப்படாதவர்கள் நரகத்திற்குத் தான் செல்ல முடியும்.

சிந்தனை: நான் இயேசு கிறிஸ்துவின் இரத்தத்தால் கழுவப்பட்டிருக்கின்றேனா?

ஜெபம்: அன்பின் தேவனே நான் என்னுடையப் பாவங்களையெல்லாம் உம்மிடம் அறிக்கையிடுகின்றேன் நீர் என்னை மன்னித்து நான் திரும்பவும் பாவ வாழ்க்கையில் விழாதபடி காத்து பரலோக வாழ்வைக் கண்டடையக் கிருபை தாரும். ஆமேன்.

தமிழ் வேதாகமம் படிக்க இங்கே சொடுக்கவும்

அழைப்பு

2008-05-16T19:21:00.005+05:30

"யாரை நான் அனுப்புவேன், யார் நமது காரியமாய்ப் போவான்" ஏசாயா 6 :8

நமது ஆண்டவராகிய கிறிஸ்து இன்று நம் ஒவ்வோருவரையும் பார்த்து யாரை நான் அனுப்புவேன் என்று கேட்கிறார். அன்று கால்டுவெல், மர்காஷியஸ், ராக்லேண்ட், சீகன் பால்க் போன்றவர்கள் தங்களுடைய உறவினர்கள் மற்றும் தங்களது சொந்தத் தேசங்களை விட்டு தியாகத்துடன் இங்கு வந்து கிறிஸ்துவின் அன்பை நமக்குக் கூறினார்கள். அதோடு மட்டும் இல்லாது நமக்குக் கல்விக்கூடங்கள் அமைத்து கல்வி அறிவையும் நமக்கு கொடுத்துள்ளார்கள். அதின்பயனாகத் தான் நாம் இன்று இந்திய தேசத்திலும் மற்றும் வெளிநாடுகளிலும் ஆசீர்வதிக்கப்பட்டவர்களாகப் பல்வேறு நிலைகளில் உயர்ந்து நிற்கின்றோம்.

ஆனால் நமது இந்திய தேசத்தில் இன்னும் நாம் வாழுகின்ற தமிழகத்தில் கூட அநேகப் பகுதிகளில் வாழும் மக்கள் கிறிஸ்துவின் அன்பை அறியாமலும் கல்வி அறிவைப் பெறாமலும் வாழ்ந்துக் கொண்டிருக்கின்றனர். அவர்களைப் பற்றி நாம் என்றைக்காவது சிந்தித்தது உண்டா?. ஒன்று நாம் கர்த்தருக்காகப் பணிபுரிவதற்கு நம்மை அர்ப்பணிப்போம் அல்லது அவர்களுக்காக மற்றும் அந்தப் பகுதிகளில் பணிபுரிபவர்களுக்காக நம்முடையப் பிரார்த்தனைகளை ஏறெடுப்போம். பிரார்த்தனைகளோடு நம்மால் முடிந்த உதவிகளைச் செய்வோம். இல்லையென்றால் நியாயத்தீர்ப்பின் நாளிலே கர்த்தர் நம்மைப் பார்த்து பசியாயிருந்தேன், நீங்கள் எனக்குப் போஜனங்கொடுக்கவில்லை; தாகமாயிருந்தேன், நீங்கள் என் தாகத்தைத் தீர்க்கவில்லை; அந்நியனாயிருந்தேன், நீங்கள் என்னைச் சேர்த்துக்கொள்ளவில்லை; வஸ்திரமில்லாதிருந்தேன், நீங்கள் எனக்கு வஸ்திரங்கொடுக்கவில்லை; வியாதியுள்ளவனாயும் காவலிலடைக்கப்பட்டவனாயும் இருந்தேன், நீங்கள் என்னை விசாரிக்க வரவில்லையென்பார்.அப்பொழுது நாம் பரிதபிக்கப்பட்டவர்களாவோம். ஆண்டவரோ நம்மை நித்திய அக்கினிக் கடலாகிய நரகத்திற்கு நம்மை ஒப்புக் கொடுப்பார். சிந்திப்போம் செயல்படுவோம். கர்த்தர் நம்மை ஆசீர்வதிப்பாராக.

சிந்தனை: எனக்காகச் சிலுவையில் அறையுண்ட கிறிஸ்துவுக்காக நான் என்ன செய்திருக்கிறேன்?

ஜெபம்: அன்பின் பிதாவே நான் என்னையே உம்மிடம் அர்ப்பணிக்கின்றேன். நான் உமக்காக ஊழியம் செய்ய என்னைப் பலப்படுத்தும். ஆமேன்.

தமிழ் வேதாகமம் படிக்க இங்கே சொடுக்கவும்

இரண்டில் ஒன்று

2008-05-13T21:22:00.002+05:30

"நீ கர்த்தருக்குக் காத்திருந்து, அவருடைய வழியைக் கைக்கொள்; அப்பொழுது நீ பூமியைச் சுதந்தரித்துக் கொள்வதற்கு அவர் உன்னை உயர்த்துவார்; துன்மார்க்கர் அறுப்புண்டுபோவதை நீ காண்பாய்." சங்கீதம் 37:34

இந்த உலகப் பிரகாரமான வாழ்க்கையில் பயணிக்கின்ற நமக்கு முன்பாக இரண்டு வழிகள் வைக்கப்படுகின்றது

1. நித்திய வழி
2. மரண வழி

1. நித்திய வழி:

நித்திய வழி என்ன என்று பார்ப்போமானால் நாம் இயேசு கிறிஸ்துவின் மூலமாக இரட்சிக்கப்பட்டு அவரது அடிச்சுவடுகளைப் பின்பற்றுதல் ஆகும்.

"நானே வாசல், என் வழியாய் ஒருவன் உட்பிரவேசித்தால், அவன் இரட்சிக்கப்படுவான், அவன் உள்ளும் புறம்பும் சென்று, மேய்ச்சலைக் கண்டடைவான்." யோவான் 10:9

இயேசு கிறிஸ்துவின் வழியை நாம் பின்பற்றுவதினால் நமக்குக் கிடைக்கும் பலன் என்னவென்றால் உலகப் பிரகாரமான ஆசீர்வாதங்கள் மற்றும் பரலோக வாழ்வு.

" நல்ல வழி எங்கே என்று பார்த்து, அதிலே நடவுங்கள்; அப்பொழுது உங்கள் ஆத்துமாவுக்கு இளைப்பாறுதல் கிடைக்கும் என்று கர்த்தர் சொல்லுகிறார்;" எரேமியா 6 : 16

2. மரண வழி:
மரண வழி என்னவென்று பார்ப்போமானால் உலகத்தின் ஆசைகளிலும் அதின் இச்சைகளிலும் சிக்கிப் பாவமான வாழ்க்கை வாழ்வதே ஆகும்.

"மனுஷனுக்குத் செம்மையாய்த் தோன்றுகிறவழி உண்டு; அதின் முடிவோ மரண வழிகள்" நீதிமொழிகள் 14:12

நாம் இந்த வழியைப் பின்பற்றுவதினால் நமக்குக் கிடைக்கும் பலன் நிம்மதியின்மை மற்றும் மரணத்திற்குப் பிறகு எரிகின்ற அக்கினிக் கடலாகிய நரகம்.

"பாவத்தின் சம்பளம் மரணம்; தேவனுடைய கிருபைவரமோ நம்முடைய கர்த்தராகிய இயேசுகிறிஸ்துவினால் உண்டான நித்தியஜீவன்." ரோமர் 6 : 23

நாம் எந்த வழியைப் பின்பற்றிக் கொண்டு இருக்கின்றோம் என்பதை சிந்தித்துப் பார்க்க வேண்டும் . இயேசு கிறிஸ்து தன்னுடைய ஊழியக் காலத்திலே இதனைத் தான் மக்களுக்குப் பிரசங்கித்தார்.

"இடுக்கமான வாசல்வழியாய் உட்பிரவேசியுங்கள்; கேட்டுக்குப் போகிற வாசல் விரிவும், வழி விசாலமுமாயிருக்கிறது; அதின் வழியாய்ப் பிரவேசிக்கிறவர்கள் அநேகர்.ஜீவனுக்குப் போகிற வாசல் இடுக்கமும், வழி நெருக்கமுமாயிருக்கிறது; அதைக் கண்டுபிடிக்கிறவர்கள் சிலர்." மத்தேயு 7 : 13,14

நாமும் நல்ல வழிகளிலே நடக்க முயற்சிப்போம் மற்றவர்களையும் நித்திய வழிக்குள்ளாக நடத்துவோம்.

"துன்மார்க்கன் தன் வழியைவிட்டுத் திரும்பும்படி நீ அவனை எச்சரித்தும், அவன் தன் வழியைவிட்டுத்திரும்பாமற்போனால், அவன் தன் அக்கிரமத்திலே சாவான்; நீயோ உன் ஆத்துமாவைத் தப்புவிப்பாய்." எசேக்கியேல் 33:9

மாறாக நாம் இந்த உலகத்தின் காரியங்களும் வேண்டும் கிறிஸ்துவையும் பின்பற்ற வேண்டும் என்று ஜீவிப்போமானால் நாம் பரிதாபத்திற்கு உள்ளாவோம் .

சிந்தனை: நான் நித்திய வழியில் நடக்கின்றேனா? அல்லது மரண வழியில் நடக்கின்றேனா?

ஜெபம்: இயெசு கிறிஸ்துவே நான் உம்மைப் பின்பற்றி நித்திய வழியிலே நடப்பதற்குக் கிருபை தாரும். ஆமேன்.

தமிழ் வேதாகமம் படிக்க இங்கே சொடுக்கவும்

வெளி வேஷம்

2008-05-08T21:37:00.001+05:30

வேதபகுதி: யோவான் 15 : 1 - 17

"இனி வீண் காணிக்கைகளைக் கொண்டுவரவேண்டாம் தூபங்காட்டுதல் எனக்கு அருவருப்பாயிருக்கிறது; நீங்கள் அக்கிரமத்தோடே ஆசரிக்கிற மாதப்பிறப்பையும், ஓய்வுநாளையும், சபைக்கூட்டத்தையும் நான் இனிச்சகிக்கமாட்டேன்.உங்கள் மாதப்பிறப்புகளையும், உங்கள் பண்டிகைகளையும் என் ஆத்துமா வெறுக்கிறது; அவைகள் எனக்கு வருத்தமாயிருக்கிறது; அவைகளைச் சுமந்து இளைத்துப்போனேன்." ஏசாயா 1 : 13,14

இன்றையக் காலத்தில் அநேகக் கிறிஸ்தவர்கள் பொய்க் கிறிஸ்தவர்களாக அல்லது வெளிவேஷக் கிறிஸ்தவர்களாக வாழ்ந்து கொண்டிருக்கிறார்கள். ஏதோ நாம் காணிக்கைகளை அதிகமாகக் கொடுட்த்தாலோ அல்லது மற்றவர்கள் முன்பதாக நல்லவர்கள் போல நடித்தாலோ நம்மை நல்லவர்கள் என்று மக்கள் எண்ணுவார்கள் என்று மக்களுக்காக நல்லவர்கள் போல நடிக்கின்றார்கள். ஆனால் அவர்கள் தங்களுடைய வாழ்க்கையில் நடப்பது இவைகளுக்கு நேர் எதிரானதாக இருக்கும். அநேகர் தங்களுடையப் பெயர் சபைகளிலே சொல்லப்படவேண்டும் அல்லது தங்களுடையப் பெயர் கல்வெட்டிலேப் பதிக்கப்பட வேண்டும் அல்லது தாங்கள் தான் இந்தச் சபையிலேப் பணக்காரர் என்று காண்பிக்கவேண்டுவதற்காகக் காணிக்கை கொடுக்கின்றார்கள். ஆனால் தங்கள் உள்ளத்திலோ கடவுள் பயம் சிறிது கூட கிடையாது. இதனைத் தான் சாமுவேல் தீர்க்கதரிசி மூலம் சவுலை எச்சரிக்கிறார்,

"கர்த்தருடைய சத்தத்துக்குக் கீழ்ப்படிகிறதைப் பார்க்கிலும், சர்வாங்க தகனங்களும் பலிகளும் கர்த்தருக்குப் பிரியமாயிருக்குமோ? பலியைப் பார்க்கிலும் கீழ்ப்படிதலும், ஆட்டுக்கடாக்களின் நிணத்தைப்பார்க்கிலும் செவி கொடுத்தலும் உத்தமம்." 1 சாமுவேல் 15:22

ஆம் கர்த்தர் நம்முடையக் காணிக்கைகளை விட நாம் அவருடைய சத்தத்திற்குச் செவிகொடுப்பதைத் தான் மிகவும் அதிகமாக விரும்புகிறார். நாம் அவருடைய சத்தத்திற்குக் கிழ்ப்படிவோமானால் அவர் நம்மை மேய்ச்சலுல்ல இடங்களிலே நம்மை வழிநடத்துவார். மாறாக நாம் அவருடைய சத்தத்திற்கு விலகி நடந்து வெளிவேஷக் கிறிஸ்தவர்களாக வாழ்ந்து வருவோமானால் சவுலுக்கு ஏற்பட்ட கதி தான் நமக்கும் நடக்கும்.

சிந்தனை: நான் கர்த்தரின் சத்ததிற்குக் கீழ்ப்படிந்து நடக்கிறேனா?

ஜெபம்: கர்த்தாவே நான் உம்முடைய சத்தத்திற்குக் கீழ்ப்படிந்து நடந்து அதன் மூலமாகப் பரலோகப் பாக்கியத்தைப் பெற அருள் புரியும். ஆமேன்.

தமிழ் வேதாகமம் படிக்க இங்கே சொடுக்கவும்

கிறிஸ்தவர்கள் பெற வேண்டிய மாற்றங்கள்

2008-05-02T18:20:00.005+05:30

நவீன காலத்தில் வாழுகின்ற கிறிஸ்தவர்கள் தங்களுடைய செய்கைகளில் மாற்ற வேண்டியக் ஒரு சிலக் காரியங்கள்

1.ஜெபவேளை

இன்றையக் காலங்களில் ஆராதனை நடக்கும்போது ஜெப வேளைகளில் மக்கள் முழங்கால் படியிடுவதைப் பார்க்க முடிவதில்லை. நாற்காலிகளில் உட்கார்ந்து கொண்டு இருக்கிறார்கள். அல்லது தரையில் உட்கார்ந்து கொண்டு இருக்கிறார்கள். நாம் நம்மைப் படைத்த தேவனுக்கு முன்பாக நம்மைத் தாழ்த்தும் போது தான் அவரும் நம்மேல் பிரியம் கொண்டு நம்மை ஆசீர்வதிப்பார்.

"கர்த்தருக்கு முன்பாகத் தாழ்மைப்படுங்கள், அப்பொழுது அவர் உங்களை உயர்த்துவார்." யாக்கோபு 4:10

2.கைப்பேசி(செல் போன்):

ஆராதனை நேரங்களில் செல்போனை அனைத்து விடுவது நல்லது. நண்பர்கள் உறவினர்களிடம் ஞாயிறு ஆராதனை நேரங்களில் தயவு செய்து என்னை செல்போனில் அழைக்க வேண்டாம் என்று கூறி நல்லது. அதிலும் ஒரு சிலர் சினிமாப் பாடல்களை ரிங்டோனாக(Ring Tone) வைத்துக் கொள்ளுகிறார்கள். ஆராதனை நேரத்தில் அவர்களது செல்போன் அடிக்கும் போது அனைத்து மக்களும் அவர்களைப் பார்க்கின்றார்கள். இது ஆராதனை நடத்துபவர்களுக்கும் ஆராதனையில் பங்கு பெற்றிருப்பவர்களுக்கும் மிகுந்த இடையூறாக இருக்கும். கண்டிப்பாக எனக்கு செல்போனில் அழைத்தவர் எண் உங்களுக்குத் தெரிய வேண்டும் என்றால் ஒன்று சைலன்டில்(Silent) வையுங்கள் அல்லது கால் டைவர்டில்(Call Divert) வையுங்கள். ஒரு சில செல்போன் நிறுவனங்கள் இந்தச் சேவையை இலவசமாக வழங்குகின்றது. எல்லாவற்றிற்கும் மேலாக நாம் கர்த்தரை ஆராதிக்கத்தான் வந்திருக்கின்றோம் என்பதை உணருங்கள். வாரத்திலுள்ள மற்ற ஆறு நாட்களும் நம்முடையக் காரியங்களுக்காகச் செலவிடுகின்றோம் ஆனால் நம்மை ஆசீர்வதித்தக் கர்த்தருக்காக ஒரு இரண்டு மணி நேராமாவது உங்களால் செலவிட முடியாதா?

3.பாடல் வேளை:

அநேகர் பாடல் வேளைகளின் போது தங்களது வாய்களைத் திறந்து பாடுவது கிடையாது, ஒரு சிலர் வேடிக்கைப் பார்த்துக் கொண்டு இருக்கிறார்கள் ஆனால் இவர்களைச் சினிமாப் பாடலைப் பாடச் சொன்னால் அப்படியே மனப்பாடமாகப் பாடுவார்கள். கேவலம். இவர்கள் துதியின் வல்லமைகளை உணராதவர்கள். துதியினாலே எரிகோவின் கோட்டை இடிந்து விழுந்ததையும் சிறைச்சாலையில் பவுலும் சீலாவும் பாடியபோது சிறைச்சாலைக் கதவு திறந்ததையும் அதன் மூலமாக சிறைச்சாலைத் தலைவனுடையக் குடும்பம் இரட்சிக்கப்பட்டதையும் இவர்கள் எங்கு அறியப் போகிறார்கள்.பாடகர் குழு மட்டுமே பாட வேண்டும் என்று நினைக்காமல் நம்முடைய உள்ளத்தின் ஆழத்திலிருந்து கர்த்தரைத் துதித்துப் பாடும் போது கர்த்தர் பெரிய காரியங்களைச் செய்வார்.

4. காலணிகள்:
அநேகர் தாங்கள் தெருக்களிலே உள்ளக் குப்பைகளையெல்லாம் மிதித்துக் கொண்டு வந்தக் காலணிகளோடுக் கூட ஆலயங்களிலே வருகிறார்கள், ஒரு சிலர் ஒரு படி மேலே போய் நன்றிக் காணிக்கைகளை ஏறெடுக்கச் செல்லும் போது கூடத் தங்களுடையக் கால்களில் காலணி அணிந்துச் செல்கின்றார்கள். ஆலயம் என்பது பரிசுத்தமான இடம் என்பதை உணர வேண்டும். இவர்களால் புறமதத்தவர்களுடைய வழிபாட்டு இடங்களுக்குக் காலணிகளுடன் செல்லமுடியுமா? அல்லது ஒரு சில மருத்துவர்களைப் பார்ப்பதற்குக் காலணியுடன் செல்லமுடியுமா? அல்லது ஒரு சில இன்டெர்நெட் புரொவுசிங் சென்டர்களுக்குக் (Internet Browsing Center) காலணியுடன் செல்லமுடியுமா? ஏன் பரிசுத்த ஆலயத்திற்கு இந்த மதிப்புக் கொடுக்கிறீகள். உங்களுடையப் படுக்கை அறைக்குக் கொண்டுச் செல்லமுடியாதவைகளை மட்டும் ஏன் ஆலயத்திற்கு உள்ளே போட்டுக் கொண்டு வருகிறீர்கள். நாம் இருக்கின்ற இடம் பரிசுத்தமான இடம் என்பதை உணர வேண்டும். அப்போழுது தான் கர்த்தர் நம்மை ஆசீர்வதிப்பதற்கு ஏதுவாக இருக்கும்.

5.வேதாகமம்:

ஆலயத்திற்கு வரும்போது கண்டிப்பாக வேதாகமத்தைக் கையில் எடுத்துக் கொண்டு வர வேண்டும். நாம் படிப்பதற்குக் பள்ளிக்கூடம் அல்லது கல்லூரிக்குச் செல்லும்போதோ அல்லது அலுவகங்களுக்குக் கோப்புகளைக் கொண்டுச் செல்லும்போது நாம் தேவையானவைகளைப் பை நிறைய எடுத்துக் கொண்டுச் செல்கிறோமே ஆனால் ஆலயத்திற்கு வரும் போது ஏன் உங்களால் வேதாகமத்தை எடுத்துக் கொண்டு வரமுடிவதில்லை. ஒரு சிலரோ வேதாகமத்தைக் கையில் எடுத்துக் கொண்டு வருவதோடு சரி ஆனால் வேதபாடங்கள் வாசிக்கப்படும் போதும் செய்தி வேளையின் போதும் திறந்து பார்ப்பதே கிடையாது. மேலும் வேதாகமத்தை நாம் வாங்கி வைத்தால் மட்டும் போதாது, தினமும் காலை மற்றும் மாலை வேலைகளில் வாசித்து தியானம் செய்ய வேண்டும். நாம் கர்த்தரை இந்த உலகத்தில் அறிக்கைப் பண்ணும் போது தான் கர்த்தரும் நம்மை இவர்கள் என்னுடையப் பிள்ளைகள் என்று அறிக்கை பண்ணுவார்.

"மனுஷர் முன்பாக என்னை அறிக்கை பண்ணுகிறவன் எவனோ, அவனை நானும் பரலோகத்திலிருக்கிற என் பிதாவின் முன்பாக அறிக்கைபண்ணுவேன்" மத்தேயு 10:32

6. அருளுரைக்குச் செவிகொடுத்தல்:

ஞாயிற்றுக்கிழமைகளில் ஆராதனைக்கு மட்டும் வந்தால் போதாது செய்தி வேளையின் போது செய்தியாளர் கொடுக்கின்றச் செய்தியை நாம் கவனமுடன் கேட்கவேண்டும். கேட்பதோடு மட்டும் அல்லாது அதில் இருந்து நாம் நம்முடைய வாழ்க்கையில் திருத்த வேண்டியக் குறைகளைத் திருத்த முற்பட வேண்டும்.. அப்படி நாம் நடக்கும் போது தான் நல்ல நிலத்தில் விழுந்த விதைகளைப் போல நாமும் கர்த்தருக்குள் நற்கனியுள்ள வாழ்க்கையை வாழ முடியும். ஒரு சிலர் செய்தி வேளைதான் நமக்கு ஒய்வு எடுக்கக்கூடிய நேரம் என்றெண்ணி நன்றாகத் தூங்குகிறார்கள். நாம் இப்படிச் செயல்பட்டால் அது நமக்குச் சாபத்தையும் ஆசீர்வாதக் குறைவையும் தருவிக்கும். இப்படிச் செய்வதனால் நாம் ஏன் கர்த்தருடையக் கோபத்திற்கு ஆளாக வேண்டும்.

"வேதத்தைக் கேளாதபடி தன் செவியை விலக்குகிறவனுடைய ஜெபமும் அருவருப்பானது."நீதிமொழிகள் 28:9

7.குறை கூறுதல்:

குறை கூறுவது என்பது மிகவும் எளிதானது எனவே நாம் போதகர்களையும் நிர்வாகிகளையும் மிகவும் எளிதில் குறை கண்டுபிடித்துவிடலாம். நாம் நம்முடையக் கண்களில் உத்திரத்தை வைத்துக் கொண்டு மற்றவர்கள் கண்களில் உள்ளத் துரும்பைப் பார்ப்பது ஏன்?. நாம் குறை கூறுவதை விட்டு விட்டு நம்மால் முடிந்தவைகளை ஆலயக் காரியங்களில் செய்வோம். நாம் அவர்கள் மனம் மாறுவதற்காக ஜெபிப்போம். அவர்கள் தவறு செய்திருந்தால் கடவுள் அவர்களுக்குத் தண்டனையைக் கொடுப்பார். மனிதனாகப் பிறந்த ஒருவனும் நீதிமான் அல்லவே. மற்றவர்களைக் குற்றவாளிகளாகத் தீர்ப்பதற்கு நாம் யார்? நாம் நீதிமானோ? அல்லவே. பின்னே நம் வேலையை நாம் பார்க்கவேண்டியது தானே அவர்களைக் குறை கூறி நாம் ஏன் அவர்களின் வெறுப்பையும் அவர்களுக்குக் கடவுள் தரும் சாபத்தையும் குறைக்க வேண்டும். எல்லாவற்றையும் நியாயந்தீர்ப்பதற்கு நியாயாதிபதி ஒருவர் இருக்கிறார், அவர் பார்த்துக் கொள்ளுவார்.

8.வேடிக்கைப் பார்த்தல்:

நாம் ஆலயத்திற்கு வந்திருப்பது இறைவனை ஆராதிப்பதற்காகத் தான் வந்திருக்கிறோம் என்பதை உணர வேண்டும். வேடிக்கைப் பார்பதென்றால் பூங்காவிற்கோ அல்லது பொழுது போக்குவதற்கான இடங்களுக்கோச் செல்லுங்கள். நீங்கள் ஆலயத்திற்கு வந்து ஏன் மற்றவர்களைக் கெடுக்க வேண்டும்.

9. சண்டை போடுதல்

போதகரிடத்திலோ அல்லது நிர்வாகிகளிடமோ உங்களுக்கு மனஸ்தாபம் இருந்தால் அவைகளைத் தேவனுடைய சமுகத்தில் ஊற்றி விடுங்கள். நீங்கள் கர்த்தரிடத்தில் ஊற்றி விடும்போது அவர் எல்லாவற்றையும் பார்த்துக் கொள்ளுவார் மாறாக நீங்கள் ஆலயத்திலே அவர்களிடம் வாக்குவாதம் செய்யும் போது மீண்டும் ஒருவருக்கொருவர் மனஸ்தாபம் ஏற்பட்டுப் பிரிவினைகளை உண்டாக்கும். இதனைப் பார்க்கின்ற புறமதத்தவர் மத்தியில் கிறிஸ்துவின் நாமம் தூஷிக்கப்படுவதற்கு ஏதுவாகும். இதனால் உங்களுக்கு ஏன் சாபத்தை வருவித்துக் கொள்ளவேண்டும்.

10.கூடுகைகளில் பங்குபெறுதல்:

நாம் ஆலயத்திற்குச் செல்வதோடு மட்டுமல்லாமல் அங்கு நடைபெறுகிற சிறுவர், வாலிபர், ஆண்கள் மற்றும் பெண்கள் கூடுகைகளில் நமக்குரிய தகுதிகளுக்கு ஏற்பப் பங்குபெறவேண்டும். நாம் அப்படிப் பங்குபெருகின்ற போது நம்முடைய ஆவிக்குரிய வாழ்க்கையில் முன்னேறுவதற்கு உதவியாக இருக்கும்.

11. நேரம் தவறாமை:

நாம் ஆலயத்திற்கு ஆராதனை ஆரம்பிக்கும் முன்பதாகவே வருவது மிகவும் சாலச் சிறந்ததாகும். அலவலகங்களுக்கு மற்றும் பள்ளி கல்லூரிகளுக்கு நாம் சரியான நேரத்திற்குச் செல்லுகின்ற நாம் ஏன் ஆலய ஆராதனைக்கு முக்கியத்துவம் கொடுப்பதில்லை. உலகப் பிரகாரமான ஆசிர்வாதங்களைத் தந்துள்ள கடவுளை நாம் தேடாமல் விட்டு விட்டால் அவரும் உங்களைக் கைவிடுவார்.

மேலே குறிப்பிடப்பட்டுள்ள காரியங்கள் அனைத்தையும் கடைபிடிக்க முயற்சிப்போம். கர்த்தர் நம்மை மென்மேலும் ஆசீர்வதிப்பார்.

ஜெபம்: கர்த்தாவே இந்தப் பகுதியில் குறிப்பிட்டவைகளையெல்லாம் கைக்கொண்டு நடந்து அதன் மூலமாக மற்ற மக்களை உம்மண்டை வழிநடத்தும் கருவியாக என்னைப் பயன்படுத்தும். ஆமேன்

சாலமோனின் வீழ்ச்சி

2008-04-12T19:07:00.002+05:30

"யெரொபெயாமை நோக்கி: பத்துத் துண்டுகளை எடுத்துக்கொள்; இஸ்ரவேலின் தேவனாகிய கர்த்தர் சொல்லுகிறது என்னவென்றால்: இதோ, நான் ராஜ்யபாரத்தைச் சாலொமோனுடைய கையிலிருந்து எடுத்துக் கிழித்து, உனக்குப் பத்துக் கோத்திரங்களைக் கொடுப்பேன்.ஆனாலும் என் தாசனாகிய தாவீதுக்காகவும், நான் இஸ்ரவேல் கோத்திரங்களில் எல்லாம் தெரிந்துகொண்ட எருசலேம் நகரத்துக்காகவும், ஒரு கோத்திரம் அவனுக்கு இருக்கும்"1 இராஜாக்கள் 11:31,32

கர்த்தர் சாலமோனை இந்த உலகத்தில் உள்ள ஐசுவரியத்தினாலும் ஞானத்தினாலும் மிகவும் அதிகமாக ஆசீர்வதித்திருந்தார். சாலமோனைப் போல ஐசுவரியத்திலும் ஞானத்திலும் கனம் பெற்றவன் இந்த உலகத்தில் ஒருவனும் இல்லை. சாலமோனுடையத் தரிசனத்தைத் தேடுவதற்குப் பற்பல நாடுகளில் இருந்தும் வந்துக் காத்துக் கிடந்தார்கள். இந்தச் சாலமோனுடையக் காலத்தில் பொன் வெள்ளியைப் போலத் தான் மதிக்கப் பட்டது. அப்படிப்பட்ட ஐசுவரியங்களைப் பெற்ற சாலமோனின் கடைசிக்காலத்தில் கர்த்தருடைய ஆசீர்வாதங்கள் குறைவு பட்டது. கர்த்தர் அகியா தீர்க்கத்தரிசியைக் கொண்டு இந்தச் சாலமோனுடைய நாட்களுக்குப் பிறகு இஸ்ரவேலின் ராஜ்ஜியம் இரண்டாகப் பிரிக்கப்படும் என்று கூறினார். இப்படிச் சாலமோனுடைய வாழ்க்கையில் கிடைத்த சாபங்களுக்குக் காரணம் என்னவென்று பார்ப்போமானால்

1.கர்த்தரின் கட்டளைகளை மீறுதல்:

சாலமோன் தனக்கு ஞானத்தையும் ஐசுவரியத்தையும் கனத்தையும் கொடுத்த தன்னுடையத் தேவனாகியக் கர்த்தரை மறந்து தன்னுடைய மனைவிகளின் விருப்பப்படி கர்த்தர் அவனை எச்சரித்திருந்தும் அந்நிய தெய்வங்களைத் தேடிக் கர்த்தரை விட்டு விட்டான்.

"ஆகையால் இஸ்ரவேலின் தேவனாகிய கர்த்தர் சாலொமோனுக்கு இரண்டுவிசை தரிசனமாகி, அந்நிய தேவர்களைப் பின்பற்றவேண்டாம் என்று கட்டளையிட்டிருந்தும், அவன் கர்த்தரை விட்டுத் தன் இருதயத்தைத் திருப்பி, அவர் கற்பித்ததைக் கைக்கொள்ளாமற்போனதினால் கர்த்தர் அவன்மேல் கோபமானார்."1 இராஜாக்கள் 11:9,10

2. அந்நியத் தெய்வங்களுக்குப் பலீபிடம் கட்டுதல்:

சாலமோன் ராஜா அந்நியத் தேவர்களைத் தேடினதும் அல்லாமல் அந்தத் தெய்வங்களுக்குத் தன்னுடைய மனைவியரின் விருப்பப்படி அவைகளுக்குக் கோவில்களைக் கட்டி அவைகளுக்குப் பலியிடவும் செய்தான். இஸ்ரவேல் ஜனங்களையும் கர்த்தரைவிட்டு வழிவிலகிப்போகச் செய்தான். இப்படி அவன் செய்தக் காரியங்களினிமித்தம் கர்த்தர் அவன் மேல் மிகவும் கோபமானார்.

"அவர்கள் என்னைவிட்டு, சீதோனியரின் தேவியாகிய அஸ்தரோத்தையும், மோவாபியரின் தேவனாகிய காமோசையும், அம்மோன் புத்திரரின் தேவனாகிய மில்கோமையும் பணிந்துகொண்டு, அவன் தகப்பனாகிய தாவீததைப்போல என் பார்வைக்குச் செம்மையாய் இருக்கிறதைச் செய்யவும், என் கட்டளைகளையும் என் நியாயங்களையும் கைக்கொள்ளவும், அவர்கள் என் வழிகளில் நடவாமற்போனபடியினால் அப்படிச் செய்வேன்."1 இராஜாக்கள் 11 :33

3. சிற்றின்பப் பிரியனாக வாழ்ந்தான்:

சாலமோன் ராஜா தான் வாழ்ந்தக் காலத்திலே தனக்காகப் பெண்களைக் கொள்ளுவதிலும் தன்னுடைய மனைவியருக்காக அரண்மனைகளைக் கட்டுவதிலும் தன்னுடைய மனைவியரின் ஆசைகளை நிறைவேற்றுவதிலும் முன்னோடியாகத் திகழ்ந்து உலகத்திலும் அதின் ஆசைகளிலும் சிக்குண்டு சிற்றின்பப் பிரியனாகத் திரிந்துக் கர்த்தரை விட்டுவிட்டான்.

"அவனுக்குப் பிரபுக்கள் குலமான எழுநூறு மனையாட்டிகளும், முந்நூறு மறுமனையாட்டிகளும் இருந்தார்கள், அவனுடைய ஸ்திரீகள் அவன் இருதயத்தை வழுவிப்போகப் பண்ணினார்கள்" 1 இராஜாக்கள் 11:3

நாமும் கர்த்தருடையக் கட்டளைகளை மீறி நடந்து, அந்நியத் தெய்வங்களை நாடி, இந்த உலகத்தின் சிற்றின்பங்களிலேச் சிக்குண்டு அலைவோமானால் நாமும் கர்த்தர் நமக்குத் தருகின்ற ஆசீர்வாதங்களை இழக்க நேரிடும். மாறாக நாம் கர்த்தருக்குப் பிரியமாய் நடந்து, உலகத்தின் ஆசைகளை விட்டு நடப்போமானால் பரலோக இராஜ்ஜியத்திற்குச் சுதந்திரவாளியாகி இவ்வுலகத்தின் ஆசீர்வாதங்களையும் பெற்றுக் கொள்ளுவொம்.

சிந்தனை: நான் கர்த்தருக்குப் பிரியமாக நடக்கிறேனா?

ஜெபம்: அன்பும் இரக்கமும் நிறைந்த ஆண்டவரே நான் உமக்குப் பிரியமாக நடந்து அதன் மூலமாக இந்த உலகத்தின் அசீர்வாதங்களையும் பரலோக இராஜ்ஜியத்தையும் சுதந்தரித்துக் கொள்ள உதவி புரியும். ஆமேன்

தமிழ் வேதாகமம் படிக்க இங்கே சொடுக்கவும்

இயேசு கிறிஸ்துவின் வாழ்க்கை நிகழ்வுகள் ஓவியமாக

2008-04-07T15:12:00.021+05:30

இயேசு கிறிஸ்து மாட்டுத்தொழுவத்தின் முண்ணனையில் பிறந்த போது அவரது பெற்றோர் யோசேப்பு மற்றும் மரியாளுடன்

இயேசு பிறந்த எட்டாம் நாளில் விருத்தசேதனம் பண்ண ஆலயத்திற்கு வந்த போது சிமியோன் என்னும் முதியவர் ஆசீர்வதிக்க மரியாளிடம் குழந்தையை வாங்குகிறார்.

இயேசு தனது 12வது அகவையில் எருசலேம் தேவாலயத்திற்குத் தனது பெற்றோருடன் பண்டிகையை ஆசரிக்க வந்தார்

இயேசு கிறிஸ்து தனது 30வது அகவையில் யோர்தான் நதியில் யோவான்ஸ்நானகனால் ஞானஸ்னானம் பெற்றார்.

நல்ல மேய்ப்பன் இயேசு கிறிஸ்து

சிறு குழந்தைகளை நேசித்த இயேசு

இயேசு மறுரூபமான காட்சி

நாசரேத்தூரில் இயேசு ஜெப ஆலயத்தில் ஏசாயா தீர்க்கதரிசியின் ஆகமம் வாசித்தார்.

எருசலேம் நகர் வீதியில் இயேசு பவணி வருகிறார்.

இயேசு சிலுவையில் மரிப்பதற்கு முந்தின இரவில் பஸ்கா பண்டிகையை ஆசரிக்கிறார்.

இயேசு சிலுவையில் மரிப்பதற்கு முந்தின இரவில் பிதாவிடம் ஜெபிக்கிறார்.

இயேசு கள்ளர்கள் மத்தியில் அறையப்பட்டார்,

இயேசு தாம் சொன்னபடி மூன்றாம் நாள் உயிரோடு எழுந்தார்.

இயேசு உயிர்த்தெழுந்த பின்பாகத் தம்முடைய சீஷர்களுக்கு காட்சியளிக்கிறார்.

பாக்கியவான்/பாக்கியவதி

2008-04-05T18:24:00.001+05:30

"கர்த்தருடைய வேதத்தில் பிரியமாயிருந்து, இரவும் பகலும் அவருடைய வேதத்தில் தியானமாயிருக்கிற மனுஷன் பாக்கியவான்." சங்கீதம் 1 :2

கடந்த வாரத்தில் நான் ஊருக்குச் சென்று விட்டு இரயிலில் வந்து கொண்டிருந்தேன். நான் வந்த பெட்டியில் இரண்டு பெண்களும் ஒரு ஆணும் ஏறினார்கள். மூவரும் கிறிஸ்தவர்கள் என்று அவர்கள் பேச்சிலேத் தெரிந்தது. சிறிது நேரம் அவர்களது குடும்பங்களைப் பற்றிப் பேசிக் கொண்டு இருந்தனர். ஒரு பெண் மற்றொரு பெண்ணிடம் வேதாகமம் எடுத்து வந்திருக்கிறீர்களா என்று கேட்டார். அதற்கு அந்தப் பெண் கடந்த முறை வந்த போது எடுத்து வந்ததாகவும் அப்படி வந்தபோது அதை ஒவ்வொரு இடத்திற்குச் செல்லும் போது எடுத்துச் செல்வதற்கு மிகவும் சிரமப்பட்டதாகவும் அதனால் இந்த முறை எடுத்து வரவில்லை என்றும் கூறினார். ஆனால் அவர்கள் இரயிலில் ஏறும் போது கனமான பெட்டிகள் மற்றும் பையுடன் தான் ஏறினார்கள்.

சுமையானப் பைகளைக் கொண்டு வருவதற்கு அவர்களால் முடிகிறது ஆனால் 500 கிராம் எடை அளவு கூட இல்லாத வேதாகமத்தை அவர்களால் தூக்கிக் கொண்டு வரமுடிகிறதில்லை. அநேகக் கிறிஸ்தவர்கள் ஆலயத்திற்குக் கூட வேதாகமம் கொண்டு வருவது கிடையாது ஆனால் பள்ளிகளுக்கோ அல்லது கல்லூரிகளுக்கோ செல்லும்போது புத்தகமூட்டையை அள்ளிக் கொண்டுச் செல்லுகிறார்கள். உலகக் காரியங்களிலே நாட்டம் உள்ளவர்களாக இருக்கின்றார்கள். கர்த்தருடைய வேதத்தை மறந்து விட்டார்கள். நாளடைவில் கர்த்தரும் அவர்களை மறந்து விடுவார். இப்படிப்பட்டவர்கள் சமாதனக் குறைவினாலும் ஆசீர்வாதக் குறைவினாலும் அவதிப்படுவதை நான் பார்த்திருக்கின்றேன், நாம் கர்த்தரைத் தேடும் போது மட்டும் தான் அவர் நம்மை ஆசீர்வதிப்பார். நாம் கர்த்தருடைய வேதத்தையும் அவருடைய வல்லமைகளையும் நாடும் போது நாம் பாக்கியவான்களாயிருப்போம். இல்லையென்றால் நாம் அவர் கொடுக்கின்ற ஆசீர்வாதங்களுக்கு அபாத்திரராயிருப்போம்.

சிந்தனை: "வேதத்தைக் கேளாதபடி தன் செவியை விலக்குகிறவனுடைய ஜெபமும் அருவருப்பானது."நீதிமொழிகள் 28:9

ஜெபம்: அன்பின் பிதாவே நான் உம்முடைய வேதத்தை நேசித்துக் கற்று அதின்படி நடந்து பாக்கியம் பெற்றவர்களாக வாழக் கிருபை தாரும். ஆமேன்

தமிழ் வேதாகமம் படிக்க இங்கே சொடுக்கவும்

நோக்கிப் பார்

2008-03-31T19:59:00.001+05:30

"அவர்கள் அவரை நோக்கிப்பார்த்துப் பிரகாசமடைந்தார்கள்; அவர்கள் முகங்கள் வெட்கப்படவில்லை." சங்கீதம் 34:5

வேதநாயகம் சாஸ்திரியார் ஒரு முறை காட்டு வழியாகப் பல்லக்கில் சென்றுக் கொண்டிருந்தார். நான்கு பேர் பல்லக்கைத் தூக்கிக் கொண்டு வந்தனர். திடீரென ஒரு புலி அவர்களுக்கு எதிராக வந்து கொண்டிருந்தது. இதனைப் பார்த்ததும் பல்லக்கைத் தூக்கிக் கொண்டிருந்தவர்கள் அனைவரும் ஒடி விட்டனர். வேதநாயகம் சாஸ்திரியார் மட்டும் பல்லக்கில் இருக்கிறார். புலி பல்லக்கிற்கு மிக அருகில் வந்து விட்டது. ஆனால் வேதநாயகம் சாஸ்திரியாரோ ஓடாமல் கர்த்தரை நோக்கித் துதித்துப் பாடினார். பல்லக்கை நோக்கி வந்த புலி அமைதியாகச் சென்று விட்டது.ஆம் கர்த்தரை நம்பினோர் கைவிடப்படுவதில்லை

பரிசுத்த வேதாகமத்தில் பார்ப்போமானால்

1.ஈசாக்கு கர்த்தரை நோக்கிப் பார்த்த போது பிள்ளையில்லாமல் இருந்த ரெபேக்காள் கர்ப்பம் தரித்தாள்.
2.யாபேஸ் கர்த்தரை நோக்கிப் பார்த்த போது அவர் அவனை அதிகமாக ஆசீர்வதித்தார்.
3.சாலமோன் கர்த்தரை நோக்கிப் பார்த்தபொழுது யாருக்கும் கிடைக்காத ஞானத்தை அவனுக்கு அருளினார்.
4.எசேக்கியா ராஜா வியாதியாயிருக்கும் போது கர்த்தரை நோக்கி விண்ணப்பம் செய்தான். அப்பொழுது கர்த்தர் அவனுக்கு இரங்கி 14 வயது கூட்டிக் கொடுத்தார்.

இப்படி கர்த்தரை நோக்கும் போது அவர் செய்த அதிசயங்களைச் சொல்லிக் கொண்டேப் போகலாம். ஆம் பிரியமானவர்களே நாமும் கர்த்தரை நோக்கிப் பார்க்கும் போது அவர் நமக்கு விடுதலை அளிக்கிறார். நமது தேவைகளையெல்லாம் சந்திக்கிறார். நாம் முழுமையாக ஆண்டவரிடம் நம்மை அர்ப்பணிப்போம். கர்த்தர் நம்மை ஆசீர்வதித்து வழிநடத்துவார்.

சிந்தனை: நான் கர்த்தரை நோக்கிப் பார்க்கிறேனா? இல்லை மனிதர்களை நோக்கிப் பார்க்கிறேனா?

ஜெபம்: கர்த்தாவே நான் உம்மை நோக்கிப் பார்த்து இரட்சிப்பைக் கண்டடையக் கிருபை தாரும். ஆமேன்

தமிழ் வேதாகமம் படிக்க இங்கே சொடுக்கவும்

சிட்சை

2008-03-18T19:13:00.001+05:30

"பிள்ளையானவன் நடக்கவேண்டிய வழியிலே அவனை நடத்து; அவன் முதிர்வயதிலும் அதை விடாதிருப்பான்."நீதிமொழிகள் 22:6

அந்தப் பெற்றோருக்கு அவன் ஒரே பையன் ஆகையால் அவனுக்கு மிகவும் செல்லம் கொடுத்து வளர்த்தார்கள். அவன் சிறு பையனாயிருக்கும் போதே மற்றவர்கள் வீட்டிலுள்ளப் பொருட்கள் இவனுக்குப் பிடித்தமாயிருந்தால் அவைகளை எடுத்துக் கொண்டு வந்து விடுவான். அவனுடையத் தாயாரும் இதைக் கண்டு கொள்வதில்லை. அது இவனுக்குத் தைரியத்தைக் கொடுத்தது. நாளடைவில் பள்ளியில் தன்னுடன் படிக்கும் பிள்ளைகளுடைய பேனா, பென்சில் போன்ற பொருட்களைத் திருடிக் கொண்டு வருவான். அவன் தாயார் அவன் செய்கின்றவைகள் தவறு என்று தெரிந்தும் அவனைக் கண்டு கொள்ளாமல் விட்டு விட்டார். அவனுக்குப் படிப்பில் நாட்டம் இல்லாமல் படிப்பைப் பாதியிலே விட்டு விட்டு முழு நேரமாகத் திருட்டுத் தொழில் செய்ய ஆரம்பித்து விட்டான்.இப்படி ஒரு இடத்தில் திருடச் செல்லும் போது ஒரு பெண்ணைக் கொலை செய்து விட்டான். அவன் கண்டுபிடிக்கப்பட்டு சிறையில் அடைக்கப்பட்டான். தீர்ப்பு நாளும் வந்தது. நீதிபதி அவனுக்குத் தூக்கு தண்டனை கொடுத்து தீர்ப்பளித்தார். அவனுடையத் தாயார் இதனை அறிந்ததும் அவனைப் பார்க்கச் சிறைச்சாலைக்குச் சென்றார். அவனைப் பார்த்து அழுதார். அதற்கு அவன் இப்பொழுது அழுது என்ன பிரயோஜனம். நான் சிறு வயதில் திருட ஆரம்பிக்கும் போது என்னைத் தண்டித்திருந்தால் இந்த நிலைமைக்கு வந்திருக்காது என்று சொன்னான்.

நாம் சிறு பிள்ளையிலிருந்தே நமது பிள்ளைகளைக் கண்டித்து வளர்ப்போமானால் நம்முடையப் பிள்ளைகள் நல்ல நிலைமையில் இருப்பார்கள். மாறாக நாம் நமது பிள்ளைகளை கண்டிக்காமல் வளர்ப்போமானால் அந்தத் தாயாருக்கு ஏற்பட்ட நிலைமை தான் ஏற்படும். சிறு வயதிலே தங்களுடையப் பெற்றோர் கண்டிப்புடன் வளர்த்ததினால் தான் நாங்கள் இப்பொழுது நல்ல நிலைமையில் இருக்கிறோம் என்று பல பேர் சாட்சி கூறினதை நாம் அறிந்திருக்கலாம். உதாரணத்திற்கு ஒரு சகோதரர் கூறியிருக்கிற சாட்சியை இந்த இணையதளத்தில் பார்க்கலாம்.சாட்சி

சிந்தனை: "உன் மகனை(ளை)ச் சிட்சைசெய், அவன் உனக்கு ஆறதல்செய்வான், உன் ஆத்துமாவுக்கு ஆனந்தத்தையும் உண்டாக்குவான்." நீதிமொழிகள் 29:27

ஜெபம்: கர்த்தாவே நாங்கள் சிறுவயதிலிருந்தே எங்களுடையப் பிள்ளைகளை உம்முடையப் பாதையில் நடத்துவதற்குக் கிருபை தாரும். ஆமேன்.

தமிழ் வேதாகமம் படிக்க இங்கே சொடுக்கவும்

துன்பத்தில் துணை

2008-03-14T19:58:00.001+05:30

"நான் துன்பத்தின் நடுவில் நடந்தாலும் நீர் என்னை உயிர்ப்பிப்பீர்; என் சத்துருக்களின் கோபத்துக்கு விரோதமாக உமது கையை நீட்டுவீர்; உமது வலதுகரம் என்னை இரட்சிக்கும்."சங்கீதம் 138 :7

சாது சுந்தர் சிங் கிறிஸ்துவைத் தன்னுடைய சொந்த இரட்சகராக ஏற்றுக் கொண்ட பின்பாகத் தன்னுடையப் பெற்றோர்களாலும் உறவினர்களாலும் வெறுக்கப்பட்டார். சாது சுந்தர் சிங்கிடம் அவருடையப் பெற்றோர் மற்றும் உறவினர்கள் வந்து கிறிஸ்துவை மறுதலித்து விடும்படிக் கூறினர்.ஆனால் அவரோ நான் கிறிஸ்துவைத் தான் பின்பற்றுவேன் என்று உறுதியாகக் கூறினார். ஒரு நாள் சாது சுந்தர் சிங் வெளியேச் சென்று தன்னுடைய நீளமான முடியை வெட்டிக் கொண்டு வந்தார். அதைப் பார்த்த சாது சுந்தர் சிங்கின் தகப்பனார் கோபத்துடன் சுந்தரிடம் வீட்டை விட்டு வெளியேறும் படி கூறினார். அன்று இரவு சாது சுந்தர் சிங்கின் உண்வில் விஷத்தை கலந்து அவருக்குச் சாப்பிடக் கொடுத்தனர். அவர் இரவு உணவை உண்ட பின்பாக அவரை வீட்டை விட்டு விரட்டி விட்டனர். உணவில் விஷம் கலக்கப்பட்டது தெரியாமல் இவரும் இரயிலில் பயணம் மேற்கொண்டார். இரயிலில் மயங்கி விழுந்த அவரை காப்பாற்றி மருத்துவமனையில் சேர்த்தனர். மருத்துவர் இவர் கடவுளின் அருளால் தான் பிழைத்தார் என்று சாட்சி பகர்ந்தார்.

மரணத்தின் அருகில் சென்ற சாது சுந்தர் சிங்கைக் காப்பாற்றிய தேவன் அவரை இந்திய தேசம் மட்டுமல்லாது சீன மற்றும் இலங்கை தேசத்திலும் அவரை வல்லமையாகப் பயன்படுத்தினார். இந்திய தேசத்து அப்போஸ்தலன் என்று மக்களால் போற்றப்பட்டார். நாமும் கிறிஸ்துவுக்காக நம்மை முழுவதுமாக அர்ப்பணித்து வாழும் போது நாம் துன்பத்தில் நடந்தாலும் கர்த்தர் நம்மை உயிர்பித்து வழிநடத்துவார்.

சிந்தனை: நான் என்னைக் கிறிஸ்துவுக்கு அர்ப்பணித்திருக்கிறேனா?

ஜெபம்: தேவனே நான் என்னையே உமக்கு அர்ப்பணிக்கிறேன் என்னுடைய துன்பங்கள் எல்லவற்றிலும் நீரே என்னுடையத் துணையாக இருந்து வழிநடத்தும். ஆமேன்.

தமிழ் வேதாகமம் படிக்க இங்கே சொடுக்கவும்

கீழ்ப்படிதல்

2008-03-12T18:17:00.005+05:30

"பலியைப் பார்க்கிலும் கீழ்ப்படிதலும், ஆட்டுக்கடாக்களின் நிணத்தைப்பார்க்கிலும் செவி கொடுத்தலும் உத்தமம்." 1 சாமுவேல் 15 : 22

நாம் யாருக்கெல்லாம் கீழ்ப்படியவேண்டும் என்றுப் பார்ப்போமானால்

1.தேவனுக்குக் கீழ்ப்படிய வேண்டும்:

நாம் கர்த்தருடைய சத்தத்திற்குக் கீழ்ப்படிந்து நடக்க வேண்டும். கர்த்தர் நமக்குக் கொடுத்தக் கற்பனைகளுக்குக் கீழ்ப்படிந்து நடக்கும்போது தேவன் நம்மை ஆசீர்வதிப்பார். நாம் அவருடையச் சத்தத்திற்குச் செவிகொடாமல் நாம் நடப்போமானால் நமக்குச் சாபத்தை வருவித்துக் கொள்ளுவோம்.

"இன்று நான் உங்களுக்குக் கற்பிக்கிற உங்கள் தேவனாகிய கர்த்தரின் கற்பனைகளுக்குக் கீழ்ப்படிந்தீர்களானால் ஆசீர்வாதமும், எங்கள் தேவனாகிய கர்த்தரின் கற்பனைகளுக்குக் கீழ்ப்படியாமல், இன்று நான் உங்களுக்கு விதிக்கிற வழியைவிட்டு விலகி, நீங்கள் அறியாத வேறே தேவர்களைப் பின்பற்றுவீர்களானால் சாபமும் வரும்."உபாகமம் 11 : 27,28

2.பெற்றோருக்குக் கீழ்ப்படிய வேண்டும்:

நம்மை இம்மட்டும் வளர்த்து உயர்வடையச் செய்த நம்முடையப் பெற்றோருக்கு எதிர்த்துப் பேசாமல் கீழ்ப்படிந்து அவர்கள் சொல்கின்றபடி கேட்டு நடக்க வேண்டும்.
"உன் தேவனாகிய கர்த்தர் உனக்குக் கொடுக்கிற தேசத்திலே உன் நாட்கள் நீடித்திருப்பதற்கு, உன் தகப்பனையும் உன் தாயையும் கனம்பண்ணுவாயாக." யாத்திராகமம் 20 :12
"பிள்ளைகளே, உங்கள் பெற்றாருக்குக் கர்த்தருக்குள் கீழ்ப்படியுங்கள்" எபேசியர் 6 : 1
"பிள்ளைகளே, உங்களைப் பெற்றாருக்கு எல்லாக் காரியத்திலேயும் கீழ்ப்படியுங்கள்; இது கர்த்தருக்குப் பிரியமானது." கொலோசேயர் 3:20

3. பெரியவர்களுக்குக் கீழ்ப்படிய வேண்டும்:

நம்முடைய நன்மைக்காக மற்றும் பரிசுத்த வாழ்விற்காகப் பெரியவர்கள் கூறுகின்ற அறிவுரைகளைக் கேட்டு அதின்படி நடக்க வேண்டும்.

"இளைஞரே, மூப்பருக்குக் கீழ்ப்படியுங்கள்" 1 பேதுரு 5: 5

4.எஜமான்கள்/மேலதிகாரிகளுக்குக் கீழ்ப்படிய வேண்டும்

நாம் வேலைப்பார்கின்ற இடங்களில் உள்ள நமக்கு அதிகாரிகளாகக் கொடுக்கப் பட்டிருக்கிறவர்களுக்குக் கீழ்ப்படிய வேண்டும்.
"எந்த மனுஷனும் மேலான அதிகாரமுள்ளவர்களுக்குக் கீழ்ப்படியக்கடவன்@ ஏனென்றால், தேவனாலேயன்றி ஒரு அதிகாரமுமில்லை@ உண்டாயிருக்கிற அதிகாரங்கள் தேவனாலே நியமிக்கப்பட்டிருக்கிறது." ரோமர் 13 :1

"வேலைக்காரரே, நீங்கள் கிறிஸ்துவுக்குக் கீழ்ப்படிகிறதுபோல, சரீரத்தின்படி உங்கள் எஜமான்களாயிருக்கிறவர்களுக்;கும் பயத்தோடும் நடுக்கத்தோடும் கபடற்ற மனதோடும் கீழ்ப்படிந்து;மனுஷருக்குப் பிரியமாயிருக்க விரும்புகிறவர்களாகப் பார்வைக்கு ஊழியஞ்செய்யாமல், கிறிஸ்துவின் ஊழியக்காரராக, மனப்பூர்வமாய்த் தேவனுடைய சித்தத்தின்படி செய்யுங்கள்." எபேசியர் 6 : 5,6

எனது தாயார் அடிக்கடிச் சொல்வார்கள் கீழ்ப்படி இல்லையென்றால் மேல்படிக்குப் போகமுடியாது. அதாவது நாம் இவ்வுலக வாழ்விலே நமது பெற்றோர் பெரியவர்கள் மற்றும் நமக்கு மேலான அதிகாரிகள் போன்றவர்களுக்குக் கீழ்ப்படிந்து நடக்கும் போது நாமும் மேன்மையாக வைக்கப்படுவோம். நமது ஆண்வராகிய இயேசு கிறிஸ்துவும் இந்த உலகத்தில் வாழ்ந்திருக்கும் போது தமது பெற்றோருக்கும், பிதாவாகிய ஆண்டவருக்கும் மற்றும் இவ்வுலக அதிகாரங்களுக்கும் கீழ்ப்படிந்து நடந்து நமக்கு முன்மாதிரியை வைத்துப் போயிருக்கிறார். அவரைப் பின்பற்றி வாழும் போது நாமும் மேன்மையைப் பெற்றுக் கொள்ளுவோம் என்பதில் எவ்விதமான சந்தேகமில்லை

சிந்தனை: நான் தேவனுக்கும், பெற்றோர் பெரியவர்களுக்கும், மேலதிகாரிகளுக்கும் கீழ்ப்படிகிறேனா?

ஜெபம்: தேவனே நான் உமக்கும் என்னுடைய பெற்றோர் மற்றும் பெரியவர்களுக்கும் என்னுடைய அதிகாரிகளுக்கும் கீழ்ப்படிந்து நடந்து அதன் மூலம் மேலான ஆசீர்வாதங்களைப் பெற்றுக் கொள்ள கிருபை தாரும்.ஆமேன்

தமிழ் வேதாகமம் படிக்க இங்கே சொடுக்கவும்

திராட்சைச் செடி

2008-03-08T10:24:00.004+05:30

வேதபகுதி: யோவான் 15 : 1 - 17

"நீங்கள் என்னைத் தெரிந்துகொள்ளவில்லை, நான் உங்களைத் தெரிந்துகொண்டேன்; நீங்கள் என் நாமத்தினாலே பிதாவைக் கேட்டுக்கொள்வது எதுவோ, அதை அவர் உங்களுக்குக் கொடுக்கத்தக்கதாக நீங்கள் போய்க் கனிகொடுக்கும்படிக்கும், உங்கள் கனி நிலைத்திருக்கும்படிக்கும், நான் உங்களை ஏற்படுத்தினேன்." யோவான் 15 : 16

இந்தப் பகுதியில் இயேசு கிறிஸ்து நம்மைப் பார்த்து உங்களை நான் தெரிந்துக் கொண்டேன் என்று கூறுகிறார். அவர் நம்மைத் தம்முடைய சொந்த ஜனமல்லாவர்களாயிருந்தாலும் நம்மைத் தெரிந்து கொண்டு நம்மை ஆசீர்வதிப்பதற்காக நம்மைப் பெயர் சொல்லி அழைக்கிறார்.நாம் திராட்சைசெடியாகிய இயேசுவில் கொடியாக நிலைத்திருக்கும்படியாக நம்மை அழைக்கிறார். நாம் திராட்சைச் செடியாகிய இயேசு கிறிஸ்துவில் கொடியாக நிலைத்திருந்து கனிகொடுக்கும்படியாக நம்மை அழைக்கிறார். நாம் அப்படிக் கிறிஸ்துவில் நிலைத்திருக்கும் போது அவர் நம்மை இந்த உலகப்பிரகாரமாக உள்ள ஆசீர்வாதங்களினாலும் உன்னதங்களிலுள்ள ஆசீர்வாதங்களினாலும் நம்மை ஆசீர்வதித்து வழிநடத்துவார்.

நம்மை ஆண்டவருக்கு ஒப்புக் கொடுத்து அவருடைய அவருடைய அடிச்சுவடிகளைப் பின்பற்றி நடப்போமானால் நம்மை இப்படிப்பட்ட ஆசீர்வாதங்களினால் ஆசீர்வதிப்பார். கிறிஸ்து நம்முடைய வாழ்க்கையின் தலைவராக இருப்பாரானால் நம்மை இந்த உலகத்தில் எதிர்த்து நிற்ப்பவன் யார்?

சிந்தனை: நான் திராட்சைச் செடியாகியக் கிறிஸ்துவில் நிலைத்திறுக்கிறேனா?

ஜெபம்: தேவனே நான் உம்மில் நிலைத்திருந்து நற்கனிகளைக் கொடுக்கக் கிருபை தாரும். ஆமேன்

தமிழ் வேதாகமம் படிக்க இங்கே சொடுக்கவும்

செவ்வைப்படுத்துவர்

2008-03-06T18:36:00.001+05:30

வேதபகுதி: ஏசாயா 45:1 - 6

"நான் உனக்கு முன்னே போய், கோணலானவைகளைச் செவ்வையாக்குவேன்."ஏசாயா 45:2

இந்தப் பகுதியில் கோரேஸ் ராஜாவைக் குறித்து ஏசாயா தீர்க்கன் மூலமாக நான் அவனை எல்லா ஜாதிகளுக்கும் முன்பாக உயர்த்தி, அவன் செய்கின்ற எல்லாக் காரியங்களிலும் உள்ள கோணலானவைகளை செவ்வைப்படுத்தி நேர்ப்படுத்துவேன் என்று கர்த்தர் கூறுகிறார். இந்தக் கோரேஸ் ராஜா இஸ்ரவேல் ஜனங்கள் அடிமைகளாக இருந்த பாபிலோன் தேசத்தை அரசாண்டவன். இந்தக் கோரேஸ் ராஜாவுக்கு அவன் அந்நிய ஜனத்திற்கு ராஜாவாயிருந்தாலும் கர்த்தர் அவனுக்கு இப்படிப்பட்ட ஆசிர்வாதங்களை எதற்காகக் கொடுத்தார் என்று பார்ப்போமானால்,கோரேஸ் ராஜா தான் அரசாளும் போது நேபுகாத்நேச்சாரால் இடிக்கப்பட்ட எருசலேமின் தேவாலயத்தைக் கட்டுவதற்குத் தன்னுடையக் கஜானாவிலிருந்து பணத்தை எடுத்துக் கொடுத்தான். மேலும் அவன் நேபுகாத்நேச்சார் கர்த்தருடைய ஆலயத்திலிருந்து பாபிலோனுக்கு எடுத்துக் கொண்டு வந்தப் பொக்கிஷங்கள் எல்லாவற்றையும் கொடுத்து அனுப்பினான். மேலும் அடிமைகளாக இருந்த இஸ்ரவேல் ஜனங்களில் சிலரை எருசலேம் ஆலயத்தை எடுப்பித்துக் கட்டுவதற்காக அனுப்பினான்.

இப்படி கோரேஸ் செய்த நற்காரியங்கள் பல. எனவே தான் கர்த்தர் அவனைப் பார்த்து நான் உனக்கு முன்பாகக் கோணலானவைகளைச் செவ்வையாக்குவேன் என்று உரைக்கிறார். நாமும் நம்மால் முடிந்த நற்காரியங்களைக் கிறிஸ்துவின் நாம மகிமைக்காகச் செய்வோமானால் நாம் செல்கின்றப் பாதையில், நம்முடைய குடும்ப வாழ்க்கையில், மேலும் நம்முடைய அலுவலகக் காரியங்களில் நமக்கு இருக்கின்றத் தடைகளை எல்லாம் அகற்றிக் கர்த்தர் நம்மை ஆசீர்வதிப்பார், மாறாக நாம் கர்த்தருக்குப் பிரியமல்லாதக் காரியங்களையேச் செய்து வந்தோமானால் நம்முடைய வாழ்க்கையில் உள்ளத் தடைகள் தடைகளாகவே இருக்கும்

சிந்தனை: " தடைகளை நீக்கிப்போடுகிறவர் அவர்களுக்கு முன்பாக நடந்துபோகிறார்; அவர்கள் தடைகளை நீக்கி, வாசலால் உட்பிரவேசித்துக் கடந்துபோவார்கள்; அவர்கள் ராஜா அவர்களுக்கு முன்பாகப்போவார், கர்த்தர் அவர்கள் முன்னணியில் நடந்துபோவார்." மீகா 2 : 13

ஜெபம்: கர்த்தாவே என்னுடைய வாழ்க்கையில் தடைகள் ஏதும் வராதபடி அதற்கு நான் உண்மையும் சாட்சியுமாய் நடக்கக் கிருபை தாரும். ஆமேன்.

தமிழ் வேதாகமம் படிக்க இங்கே சொடுக்கவும்

மறவாத ஆண்டவர்

2008-03-03T20:59:00.001+05:30

வேதபகுதி: ஏசாயா 44: 21 - 22

"நீ என் தாசன்; நான் உன்னை உருவாக்கினேன்; நீ என் தாசன்; இஸ்ரவேலே, நீ என்னால் மறக்கப்படுவதில்லை." ஏசாயா 44: 21

இஸ்ரவேல் ஜனங்கள் கர்த்தர் தங்களுக்குச் செய்த அதிசயங்களை எல்லாம் மறந்து விட்டுத் தங்கள் தேவனாகியக் கர்த்தரை மறந்துப் போனார்கள். ஆகையினால் அவர்களை அருகில் இருந்த ராஜாக்களுக்கு அடிமைகளாக விற்றுப்போட்டார். கர்த்தர் இஸ்ரவேல் ஜனங்களைத் தங்களுடைய பாவங்களை விட்டுத் திரும்பும்படி அவர்களைப் பல்வேறு தீர்க்கதரிசிகளின் மூலமாக எச்சரிக்கிறார்.அவர்கள் தங்களுடையப் பாவங்களை விட்டு மனந்திரும்பினபோதோ அவர்களைச் சுற்றியிருந்த எல்லாக் கட்டுகளில் இருந்தும் விடுவித்தார்.

நம்முடையத் தேவனாகியக் கர்த்தர் நம்மைத் தன்னுடைய உள்ளங்கைகளில் வரைந்துப் பாதுகாத்து வருகிறார். ஆனால் நாமோ பல வேலைகளில் கர்த்தரை மறந்து விட்டு உலகப்பிரகாரமானக் காரியங்களில் சிக்குண்டுத் தவித்துக் கொண்டிருக்கிறோம். நாம் கர்த்தரிடம் திரும்புவோமானால் அவர் நம்முடைய மீறுதல்களை மேகத்தைப் போலவும் நம்முடையப் பாவங்களைக் கார்மேகத்தைப் போலவும் அகற்றிவிட்டேன் என்னிடத்தில் மனந்திரும்பு என்று கர்த்தர் உரைக்கிறார். ஆனால் இன்னும் நம்முடையப் பாவ வாழ்க்கையிலேயே வாழ்ந்துக் கொண்டிருப்போமானால் நம்மை மறவாத ஆண்டவரிடம் இன்றே அர்ப்பணிப்போம். கர்த்தர் நம்மை ஆசீர்வதிப்பார்.

சிந்தனை: என்னை மறவா யேசு நாதா
உந்தன் தயவால் என்னை நடத்தும்

ஜெபம்: என்னை மறவாத அன்பின் நேசரே நான் என்னையே உம்மிடம் தருகிறேன் நீரே ஏற்று வழிநடத்தும் .ஆமேன்

தமிழ் வேதாகமம் படிக்க இங்கே சொடுக்கவும்

ஒப்புக் கொடுத்தல்

2008-02-29T21:08:00.001+05:30

"உன் வழியைக் கர்த்தருக்கு ஒப்புவித்து, அவர்மேல் நம்பிக்கையாயிரு; அவரே காரியத்தை வாய்க்கப்பண்ணுவார்" சங்கீதம் 37 : 5

எனக்கு மின்னஞ்சலில் வந்த ஒரு வேடிக்கையானக் கதை.ஒரு சிறுவன் அவனுடைய தாயாரிடம் அவன் பிறந்தநாளுக்கு அவனுக்கு விளையாட்டு பைக் ஒன்று வாங்கித் தரும்படிக் கேட்டான். அதற்கு அவனுடையத் தாயார் நீ இந்த வருடத்தில் நடந்து கொண்டவைகளையெல்லாம் கடவுளுக்குக் கடிதமாக எழுது அவர் உனக்கு பைக் கிடைக்கச் செய்வார் என்று கூறினார்கள். அவனும் தனது அறைக்குச் சென்றான். நான் நல்லபையன் எனக்கு ஒரு பைக் தாருங்கள் என்று எழுதினான். அவன் நன்றாகச் சேட்டை செய்யக்கூடியப் பையன் என்பதால் அவனுக்கு அந்தக் கடிதத்தில் திருப்தி இல்லாததால் அதைக் கிழித்துப் போட்டான். பின்னர் நான் கெட்டப் பையனாக நடந்து கொண்டேன் எனக்கு பைக் தந்தால் நான் நல்லப் பையனாக நடந்து கொள்வேன் என்று எழுதினான். தான் நல்ல பையனாக நடக்கவில்லை எனவேக் கடவுள் நமக்கு பைக் தரமாட்டார் என்று எண்ணி அந்தக் கடிதத்தைக் கிழித்து விட்டு ஆலயத்தை நோக்கிச் சென்றான். அவனுடையத் தாயாரும் நாம் நினைத்தது நடந்து விட்டது நமது பையன் திருந்தி விடுவான் என்று நினைத்தார். ஆலயத்திற்குச் சென்றவன் அங்கு உள்ளச் சிலுவையை எடுத்துக் கொண்டுத் தனது வீட்டிற்கு வந்து ஆண்டவரே உமது சிலுவையை நான் எடுத்து வைத்துள்ளேன் உமக்குவேண்டுமானால் எனக்கு பைக் கொடுத்துவிட்டு வாங்கிக் கொள்ளவும் என்று எழுதினான்.

வேடிக்கையானக் கதை என்றாலும் நாமும் இப்படித்தான் பலவேளைகளில் இறைவனிடம் நீர் எனக்கு இந்தக் காரியத்தை வாய்க்கப் பண்ணினால் நான் இதைச் செய்கிறேன் அதைச் செய்கிறேன் என்று ஜெபிக்கிறோம். ஆனால் நாம் கர்த்தருக்கு நம்மை அர்ப்பணித்து விட்டு நாம் செயல்படுவோமானால் நாம் கேட்காத ஆசீர்வாதங்களையும் நமக்குத் தந்தருளுவார். ஆனால் நாம் கர்த்தரைக் கட்டாயப்படுத்தி எனக்கு இந்தக் காரியம் கண்டிப்பாகக் கிடைக்கவேண்டும் என்று ஜெபிப்போமானால் நமக்கு அந்தக் காரியம் கிடைத்தாலும் ஒரு முழுமையான ஒன்றாக இருக்காது. நாம் நம்மைக் கர்த்தருடையக் கைகளில் ஒப்புக் கொடுக்கும் போது அவரே நம்முடைய எல்லாக் காரியங்களையும் பார்த்துக் கொள்ளுவார். நாம் எதற்காகவும் கவலைப்பட வேண்டிய அவசியமில்லை.

சிந்தனை: நான் என்னுடைய சுய இஷ்டப்படி நடக்கிறேனா? அல்லது கர்த்தருடையக் கரத்தில் ஒப்புவித்து அவருக்கு விருப்பமாய் நடக்கிறேனா?

ஜெபம்: தேவனே நான் என்னுடைய சித்தத்தின்படி அல்ல உம்முடையச் சித்தத்தின்படிச் செயல்பட அருள் தாரும். ஆமேன்.

துதித்தல்

2008-02-27T18:33:00.000+05:30

"கர்த்தருக்குப் புதுப்பாட்டைப் பாடுங்கள்; அவர் அதிசயங்களைச் செய்திருக்கிறார்; அவருடைய வலதுகரமும், அவருடைய பரிசுத்த புயமும், இரட்சிப்பை உண்டாக்கினது." சங்கீதம் 98: 1

நம்முடைய தேவனாகியக் கர்த்தர் நம்மைப் படைத்திருப்பதன் நோக்கம் அவர் படைத்தப் படைப்புகளை நாம் அனுபவித்து நாம் பெற்ற நன்மைகளை நினைத்து நாம் கர்த்தரைத் துதிப்பது தான். ஆனால் நாமோ கர்த்தரிடமிருந்து நன்மைகள் பலவற்றை பெற்றாலும் நாம் அவரை நன்றி செலுத்தித் துதிப்பதை மறந்து விடுகிறோம். கர்த்தரைத் துதித்துப் பாடுவதிலே கிடைக்கின்ற இன்பம் பேரானந்தம்.

வேதநாயகம் சாஸ்திரியார் அவர்கள் தஞ்சை சரபோஜி மன்னரிடத்திலேப் பணியாற்றும் போது ஒரு முறை மன்னர் சாஸ்திரியாரிடம் தன்னுடையக் கடவுளைப் பற்றிப் பாடும்படி கூறினார். ஆனால் வேதநாயகம் சாஸ்திரியார் நான் கர்த்தரைப் பற்றி மட்டும் தான் பாடுவேன் என்று சொல்லி ஏசுவையேத் துதி செய் என்றப் பாடலை எழுதி அங்கு அவையோர் மத்தியில் பாடினார். அவையிலிருந்த அனைவரும் மன்னர் இவருக்கு என்ன தண்டனைக் கொடுக்கப் போகிறாறோ என்று எதிர்பார்த்துக் கொண்டிருந்தனர். ஆனால் மன்னரோ நீர் உமது கடவுளைக் குறித்தேப் பாடும் என்று விட்டு விட்டர். ஆம் நாம் நம்முடையத் தேவனைக் குறித்துப் பாடும் போது கர்த்தர் நம்மை நினைத்து மற்ற மக்களிடம் கிரியை செய்கிறார்.

ஆனால் ஒரு சிலராகிய நாமோ சினிமாப் பாடல்களையும். ஒரு சிலர் மேற்கத்திய பாப் பாடல்கள் தான் பிடிக்கும் என்று அவைகளை தங்கள் வாயினால் பாடுகிறார்கள். அவர்கள் ஆலயத்திற்கு வந்து விட்டால் ஏதோ தெரியாத இடத்திற்கு வந்து விட்டது போல அங்கும் இங்கும் வேடிக்கைப் பார்த்துக் கொண்டிருப்பார்கள். நாம் கர்த்தரைப் பாடப் பாட நம்முடைய உள்ளம் அன்பினால் பூரிக்கும், நம்முடைய பாவக் கட்டுகள் எல்லம் பறந்து போகும்.

சிந்தனை: நம்முடைய வாயினால் எந்தப் பாடல்களைப் பாடுகிறோம்?

ஜெபம்: ஆண்டவரே நான் எப்பொழுதும் உம்மைத் துதிக்கக் கிருபை தாரும். ஆமேன்.

தமிழ் வேதாகமம் படிக்க இங்கே சொடுக்கவும்

அழைப்பு

2008-02-25T18:09:00.001+05:30

வேதபகுதி: எபேசியர்: 4 :1 - 8

"நீங்கள் அழைக்கப்பட்ட அழைப்புக்குப் பாத்திரவான்களாய் நடந்து.." எபேசியர்: 4 :1

கிறிஸ்தவர்களாகிய நாம் ஒவ்வொருவரும் ஊழியக்காரனாகவும் ஊழியக்காரியாகவும் தான் அழைக்கப்பட்டிருக்கிறோம். போதகர்கள், நற்செய்தியாளர்கள், மிஷனெரிகள் மட்டும் தான் ஊழியஞ்செய்வதற்காக அழைக்கப்பட்டுள்ளதாக நாம் நினைத்துக் கொண்டு இருக்கின்றோம். ஆனால் கிறிஸ்தவர்களாகிய நாம் அனைவருமே ஒவ்வொரு வகையிலும் ஊழியஞ்செய்வதற்காகத் தான் இந்த உலகத்தில் ஆண்டவரால் ஏற்படுத்தப்பட்டிருக்கிறோம். போதகர்கள் ஞானஸ்னானம் கொடுக்கும் போது கிறிஸ்துவுக்காக ஊழியம் செய்வாயா என்று நம்மிடம் கேட்கும் போது நான் கடவுளுடைய ஒத்தாசையால் செய்வேன் என்று வாக்குக் கொடுத்து விட்டு அந்த ஆராதனை முடிந்தவுடன் மறந்து விடுகின்றோம்.

கர்த்தர் ஒவ்வொருவருக்கும் ஒவ்வொரு தாலந்தைக் கொடுத்திருப்பார். ஒரு சிலருக்கு நன்றாகப் பாடல் பாடும் தாலந்தைக் கொடுத்திருப்பார், ஒரு சிலருக்கு நன்றாக இசைக்கருவிகளை மீட்டக்கூடியத் தாலந்தைக் கொடுத்திருப்பார். இப்படி ஒவ்வொருவருக்கும் ஒவ்வொருவிதமானத் தாலந்துகளைக் கொடுத்திருப்பார். நாம் நமக்குக் கொடுக்கப்பட்டிருக்கிறத் தாலந்துகளை உணர்ந்து அவைகளைக் கிறிஸ்துவின் நாமம் மகிமைப்படும்படி நாம் பயன்படுத்தும் போது கிறிஸ்துவின் நாமம் மகிமைப்படுகின்றது. நாமோ நமக்குக் கொடுக்கப் பட்டிருக்கிறத் தாலந்தை ஒரு வெள்ளிக்காசைப் பெற்ற மனிதனைப் போலப் பயன்படுத்தாமல் இருப்போமானால் கர்த்தர் நம்மையும் எரிகிற அக்கினிக்கடலிலே தள்ளுவார்.

சிந்தனை: நான் எனக்குக் கொடுக்கப்பட்டுருக்கிற அழைப்பை உணர்ந்து அதன்படி நடக்கிறேனா?

ஜெபம்: ஆண்டவரே நான் எனக்குக் கொடுக்கப்பட்டிருக்கின்றத் தாலந்துகளை உம்முடைய நாம மகிமைக்காகப் பயன்படுத்தி அதன்மூலமாக உம்மை அறியாத மக்களை உம்மண்டை வழிநடத்தக் கிருபை தாரும். ஆமேன்

தமிழ் வேதாகமம் படிக்க இங்கே சொடுக்கவும்

நன்மை செய்தல்

2008-02-21T18:33:00.001+05:30

"நீங்கள் நன்மை செய்வதிலே சோர்ந்துபோகாமலிருங்கள்." 2 தெசலோனிக்கேயர் 3: 13

அந்த ஊர் இந்து மக்கள் நிறைந்த கிராமம். அங்கு யாருக்காவது வியாதி வந்தால் அங்குள்ளப் பூசாரியிடம் வந்து பூஜை செய்வார்கள். ஒரு நாள் அந்தப் பூஜாரியின் மகனுக்கு பாம்பு கடித்து வாயில் நுறை தள்ளிக்கொண்டு உயிருக்குப் போராடிக் கொண்டிருக்கிறான், பூஜாரியோ செய்வதறியாமல் திகைத்துக் கொண்டிருக்கிறான். ஒரு சில மணி நேரத்தில் மரித்துப் போய்விடுவான் என்று அனைவரும் எதிர் பார்த்துக் கொண்டிருக்கின்றனர். அந்த வழியே ஆங்கிலேய மிஷனெரி அருள்திரு.ஜாண் தாமஸ் போதகர் வந்துக் கொண்டிருக்கிறார். அந்தச் சிறுவனின் நிலைமையைப் பார்த்தவுடன் உடனடியாக அந்தப் பையனுக்கு மருத்துவ உதவி செய்து அவனைக் காப்பாற்றிகிறார். அந்தக் கிராம மக்கள் அவரைத் தெய்வமாகப் பார்க்கின்றனர். அவரோ கிறிஸ்துவின் அன்பை அவர்களுக்கு விளக்கிக் கூறினார். அந்தக் கிராமமே இயேசுவை ஏற்றுக் கொண்டது, மெய்ஞானமாகியக் கிறிஸ்துவை அறிந்துக் கொண்டதினால் அந்த ஊருக்கு மெய்ஞானபுரம் என்றுப் பேரிட்டார்கள்.

ஆம் பிரியமானவர்களே கிறிஸ்துவின் அடிச்சுவடுகளைப் பின்பற்றுகிறவர்களாகிய நாமும் மற்றவர்களுக்கு நன்மை செய்ய வேண்டும் என்பதைப் பவுல் தேசலோனிக்கேயருக்கு எழுதுகின்ற கடிதத்தில் குறிப்பிடுகின்றார். கிறிஸ்தவர்களாகிய நாம் மற்றவர்களுக்கு நன்மை செய்கின்ற போது மட்டும் தான் நம்மில் மற்றவர்கள் கிறிஸ்துவின் அன்பைக் கண்டுக் கொள்ளுகிறார்கள். போதகர் ஜாண் தாமஸ் அவர்கள் அந்தச் சிறுவனுக்கு உதவியக் காரணத்தினால் தான் அந்தக் கிராம மக்கள் கிறிஸ்துவின் அன்பை ருசித்துக் கொள்ள முடிந்தது. நாமும் நம்மால் முடிந்த நன்மைகளை மற்றவர்களுக்குச் செய்து மற்றவர்களை ஆண்டவரிடம் வழி நடத்தும் கருவியாகப் பயன்படுவோம். கர்த்தர் நம்மை ஆசிர்வத்து வழிநடத்துவார்.

சிந்தனை: "தீமையை விட்டு விலகி, நன்மை செய்; என்றென்றைக்கும் நிலைத்திருப்பாய்." சங்கீதம் 37:27

ஜெபம்: அன்பு நிறைந்த தேவனே நான் என்னைச் சுற்றியுள்ள மக்களுக்கு நன்மை செய்து அதன் மூலமாக அவர்களை ஆதாயம் பண்ணக் கிருபை தாரும், ஆமேன்.

தமிழ் வேதாகமம் படிக்க இங்கே சொடுக்கவும்

தெரிந்து கொள்ளப்பட்டவர்கள்

2008-02-19T18:02:00.001+05:30

வேதபகுதி: ஏசாயா 41: 8 - 13

"நான் பூமியின் கடையாந்தரங்களிலிருந்து, உன்னை எடுத்து, அதின் எல்லைகளிலிருந்து அழைத்துவந்து: நீ என் தாசன், நான் உன்னைத் தெரிந்து கொண்டேன், நான் உன்னை வெறுத்துவிடவில்லை என்று சொன்னேன்." ஏசாயா 41: 9

நமது ஆண்டவராகிய கர்த்தர் நம்மைப் பார்த்து நீ என் தாசன் நான் உன்னைத் தெரிந்து கொண்டேன் என்று ஏசாயா தீர்க்கதரிசியின் மூலமாக உரைக்கிறார். இஸ்ரவேல் ஜனங்கள் தங்களை எகிப்து தேசத்திலிருந்து கானான் தேசத்திற்கு வழிநடத்தி அவர்களுக்கு அடைக்கலம் கொடுத்த தங்கள் தேவனை மறந்து விக்கிரகங்களைத் தெரிந்துக் கொண்டு பாவ வழிகளில் நடந்ததினால் அவர்களை அந்நிய ராஜாக்களுக்கு அடிமைகளாக விற்றுப்போட்டார். இஸ்ரவேல் ஜனங்கள் அந்நிய ராஜாக்களுக்கு அடிமைப்பட்டு அவர்களைச் சேவித்தார்கள்.

இப்படிப்பட்ட காலக்கட்டத்தில் தான் ஆண்டவர் ஏசாயா தீர்க்கதரிசியின் மூலமாக இஸ்ரவேல் ஜனங்களுக்கு நான் உன்னைத் தெரிந்து கொண்டேன் நீ உன்னுடையப் பாவ வழிகளை விட்டு மனந்திரும்பி வருவாயானால் நான் ஆபிரகாம், ஈசாக்கு, யாக்கோபு என்பவர்களுக்குக் கொடுத்த வாக்குத்தத்தத்தை நிறைவேற்றுவேன் என்று கூறுகிறார். நாமும் நம்முடையப் பாவ வாழ்க்கையை விட்டுத் திரும்பி கிறிஸ்துவினண்டை வருவோமானால் நம்மையும் அவர் ஆபிரகாமின் பிள்ளைகளாக ஏற்றுக் கொண்டு நம்மையும் தாங்கி வழிநடத்துவார்.

சிந்தனை: நான் கிறிஸ்துவைப் பின்பற்றி நடக்கிறேனா?

ஜெபம்: ஆண்டவரே நான் உம்மைப் பின்பற்றி நடக்க எனக்கு உதவி புரியும். ஆமேன்

தமிழ் வேதாகமம் படிக்க இங்கே சொடுக்கவும்

ஆசிர்வாதமும் சாபமும்

2008-02-18T18:41:00.001+05:30

வேதபகுதி: உபாகமம் 11 : 26 - 32

"இன்று நான் உங்களுக்கு முன்பாக ஆசீர்வாதத்தையும் சாபத்தையும் வைக்கிறேன்."உபாகமம் 11:26

நாம் பரிசுத்த வேதாகமத்தை ஆராய்ந்துப் பார்ப்போமானால் கர்த்தர் நமக்கு முன்பாக இரண்டு காரியங்களை வைக்கிறார். முதலாவது ஆசீர்வாதம், இரண்டாவது சாபம். இந்த இரண்டில் நமக்கு எது தேவை என்பதை நாம் தான் தேர்வு செய்ய வேண்டும்.

கர்த்தர் நமக்குக் கூறிய கற்பனைகள் அனைத்தையும் கைக்கொண்டு அதன் படி நடப்போமானால் நமக்கு ஆசீர்வாததைத் தந்தருளுவார். நாம் கற்பனைகளைக் கைக்கொண்டு நடக்கும் போது ஒரு சில சோதனைகளையும் வேதனைகளையும் சந்திக்க நேரிடும் ஆனால் முடிவோ நமக்கு ஆசிர்வாதமாக இருக்கும். நாம் யோபுவின் வாழ்க்கையைப் பார்ப்போமானால் அவன் அநேகப் பாடுகளின் மத்தியிலும் கர்த்தரை உறுதியாகப் பற்றிக் கொண்டு இருந்ததினால் இரட்டிப்பான ஆசிர்வாதத்தைக் கண்டு கொண்டான். மாறாக நாம் கற்பனைகளைப் பின்பற்றாமல் இருப்போமானால் நமக்குச் சாபங்கள் தான் வரும். நாம் இஸ்ரவேலில் முதல் ராஜாவான சவுலின் வாழ்க்கையைப் பார்ப்போமானால் அவன் கர்த்தரைப் பின்பற்றின நாட்களில் எல்லாம் அவனுக்கு வெற்றி கிடைத்தது. அவன் கர்த்தரின் சத்தத்திற்க்குக் கீழ்ப்படியாமற்போன போது அவனுக்குத் தோல்வி தான் கிடைத்தது. ராஜ்ஜியபாரமும் அவன் குடும்பத்தை விட்டுப் போயிற்று.

சிந்தனை: நாம் எந்தப் பாதையைத் தேர்ந்தெடுக்கிறோம்? ஆசீர்வாதத்திற்குரிய பாதையா அல்லது சாபத்திற்கு நேராக வழி நடத்துகிறப் பாதையா?

ஜெபம்: தேவனே நான் உமது கற்பனைகளுக்குக் கீழ்ப்படிந்து நடந்து அதன் மூலம் ஆசீர்வாதத்தைச் சுதந்தரிக்கக் கிருபை தாரும். ஆமேன்.

தமிழ் வேதாகமம் படிக்க இங்கே சொடுக்கவும்

அயலார் மீது கரிசனை

2008-02-15T17:14:00.002+05:30

வேதபகுதி: லூக்கா 6 : 27 - 36

"மனுஷர் உங்களுக்கு எப்படிச் செய்ய வேண்டுமென்று விரும்புகிறீர்களோ, அப்படியே நீங்களும் அவர்களுக்குச் செய்யுங்கள்." லூக்கா 6 : 31

ஒரு நண்பரிடம் ஒரு திருமண நிகழ்ச்சிக்கு முன்பதாகப் பேசிக் கொண்டிருக்கும்போது அவரிடம் நீங்கள் இந்தத் திருமணத்திற்கு என்னச் செய்யப் போகிறீர்கள் என்று கேட்ட பொழுது எனது திருமணத்திற்கு அவர்கள் என்னச் செய்தார்களோ அதையே தான் இந்தத் திருமணத்திற்குச் செய்யப் போவதாகக் கூறினார். இப்படித் தான் நம்மில் அநேகர் மற்றவர்கள் நமக்கு என்னச் செய்தார்களோ அதையேத் தான் திரும்பவும் செய்கின்றோம்.ஆனால் நமது ஆண்டவராகிய இயேசு கிறிஸ்துவோ மனுஷர் உங்களுக்கு எவைகளைச் செய்ய வேண்டும் என்று விரும்புகிறீர்களோ அவைகளை நீங்களும் அவர்களுக்குச் செய்யுங்கள் என்று கூறுகிறார்.

நாமோ நம்முடைய பக்கத்து வீட்டுக்காரர்கள் மற்றும் அயலகத்தாரிடம் அன்பு கொள்ளாமல் அவர்களிடம் வெறுப்பு காட்டுகின்றோம். இப்படிப்பட்ட காரியங்கள் மேலும் பகைமையையும் வெறுப்பையும் தான் வளர்க்கும். மாறாக இயேசு கிறிஸ்துக் கூறிய படி நாம் நம்முடைய சத்துருக்களைச் சிநேகிக்கும் போது அவர்கள் நம்முடைய நற்குணங்களைப் பார்த்துத் திருந்தி கிறிஸ்துவினண்டை வழிநடத்துவோமானால் நம்மை ஆண்டவர் அவருடையச் சொந்தப் பிள்ளையாக ஏற்றுக் கொண்டு நம்மை ஆசிர்வதிப்பார்.

சிந்தனை: நான் என்னுடைய அயலகத்தாரிடம் அன்பு கூறுகிறேனா?

ஜெபம்: தேவனே நான் என்னுடைய அண்டை அயலகத்தாரிடம் அன்பு கூர்ந்து அதன் மூலம் அவர்களை உம்மண்டை வழிநடத்துகிறக் கருவியாக என்னைப் பயன்படுத்தும். ஆமேன்.

தமிழ் வேதாகமம் படிக்க இங்கே சொடுக்கவும்

இடறல்

2008-02-14T18:14:00.001+05:30

வேதபகுதி: மத்தேயு 18 :6 - 10

"என்னிடத்தில் விசுவாசமாயிருக்கிற இந்தச் சிறியரில் ஒருவனுக்கு இடறல் உண்டாக்குகிறவன் எவனோ, அவனுடைய கழுத்தில் ஏந்திரக்கல்லைக் கட்டி, சமுத்திரத்தின் ஆழத்திலே அவனை அமிழ்த்துகிறது அவனுக்கு நலமாயிருக்கும்."மத்தேயு 18 :6

இடறல் என்பது கிறிஸ்துவின் நாமம் எந்த இடங்களில் எல்லாம் பரிசுத்தக்குலைச்சலாக்கப் படுகிறதோ அல்லது அவருடைய நாமம் எங்கெல்லாம் தூஷிக்கப்படுகிறதோ அங்கெல்லாம் நாம் மற்ற மக்களைக் கிறிஸ்துவினண்டை வருவதற்கு இடறல் உண்டாக்குகிறோம்.

நாம் எப்பொழுதெல்லாம் இடறல்களை உண்டாக்குகின்றோம் என்று பார்ப்போமானால்

1. இவனெ(ளெ)ல்லாம் ஒரு கிறிஸ்தவனா/கிறிஸ்தவளா என்று மற்ற மக்களால் சொல்லப்படுகின்றபோது(புகை, மது)
2. புதிதாகக் கிறிஸ்துவை ஏற்றுக் கொண்டவர்கள் நாம் செய்கின்றப் பாவமானக் காரியங்களுக்குள்ளே வழிநடத்தும் போது(திருச்சபை அரசியல்)
3. உலகத்தையும் அதின் காரியங்களையும் நாம் நேசித்து இறைவனை விட்டு விடும் போது (பெயர்க் கிறிஸ்தவர்கள் ஆகும் போது)

இப்படி இடறல் உண்டாக்குகின்றக் காரியங்களைச் சொல்லிக் கொண்டேப் போகலாம். நாம் மற்றவர்களுக்கு இடறல் உண்டாக்குகிறவர்களாக இருப்போமானால் எந்திரக் கல்லைக் கழுத்தில் கட்டிக் கடலின் ஆழத்திலே போய் அமிழ்த்த வேண்டும் என்று கர்த்தர் சொல்லுகிறார். இதன் பொருள் என்னவென்றால் நமக்கு ஆசிர்வாதம் கிடையாது மாறாகச் சாபம் தான் வந்து சேரும்.

சிந்தனை: நம்முடையக் கிரியைகள் மற்றவர்கள் கிறிஸ்துவினண்டை வருவதற்கு உதவியாக இருக்கிறதா? அல்லது இடறல் உண்டாக்குகிறவர்களாக இருக்கிறோமா?

ஜெபம்: தேவனே நான் மற்றவர்களை உம்மண்டை வழிநடத்தும் கருவியாக என்னைப் பயன்படுத்தும். அதற்கு என்னுடையக் கிரியைகள் சாட்சியாக இருக்க உதவி புரியம். ஆமேன்.

தமிழ் வேதாகமம் படிக்க இங்கே சொடுக்கவும்

நியாயத்தீர்ப்பு

2008-02-11T16:17:00.000+05:30

வேதபகுதி: எண்ணாகமம் 20 : 7 - 12

"கர்த்தர் மோசேயையும் ஆரோனையும் நோக்கி: இஸ்ரவேல் புத்திரரின் கண்களுக்கு முன்பாக என்னைப் பரிசுத்தம்பண்ணும்படி, நீங்கள் என்னை விசுவாசியாமற் போனபடியினால், இந்தச் சபையாருக்கு நான் கொடுத்த தேசத்துக்குள் நீங்கள் அவர்களைக் கொண்டுபோவதில்லை என்றார். "எண்ணாகமம் 20 : 12

இந்தப் பகுதியில் இஸ்ரவேல் ஜனங்களை எகிப்து தேசத்திலிருந்து கானான் தேசத்திற்கு அழைத்துக் கொண்டுச் செல்லுகின்ற மோசேக்கும் ஆரோனுக்கும் தண்டனை கிடைக்கின்றது. நாம் நினைத்துக் கொண்டிருக்கிறக் காரியம் என்னவென்றால் நமது ஆண்டவர் மன்னிப்பின் தேவன் நாம் எப்படிப்பட்டத் தவறுகள் செய்தாலும் நம்மை மன்னித்து நமது தவறுகளையெல்லாம் கடலின் ஆழத்திலே போட்டுவிடுவார். ஆனால் நாம் செய்கின்றது தவறு என்று நமக்குத் தெரிந்தும் மீண்டும் மீண்டும் நாம் செய்கின்ற காரியங்களுக்கு மன்னிப்பு உண்டு ஆனாலும் ஆண்டவர் நாம் மீண்டும் அந்தத் தவறைச் செய்யாதபடிக்கு நாம் செய்த பாவத்திற்கு நமக்குத் தண்டனை கொடுக்கிறார்.

மோசே என்ற தேவ மனிதன் "என் தாசனாகிய மோசேயோ அப்படிப்பட்டவன் அல்ல, என் வீட்டில் எங்கும் அவன் உண்மையுள்ளவன். எண்ணாகமம் 12 :7" என்று கர்த்தரால் சாட்சி கொடுக்கப்பட்டவர். ஆனால் அவர் செய்தது ஒரே ஒரு சிறிய பாவம் தான். கர்த்தர் மோசேயைப் பார்த்துக் கன்மலையினிடத்தில் போய் பேசு என்றார், ஆனால் இவரோ கன்மலையை அடித்தார். ஆகவே கர்த்தர் என்னிடத்தில் நம்பிக்கை வையாமல் போனதினால் உங்களை நான் கானான் தேசத்திற்குப் பிரவேசிக்கப் பண்ணுவதில்லை என்று அவர்களுக்குத் தண்டனை கொடுக்கிறார். நாமும் இப்படிப் பட்டச் சிறிய காரியங்களை இன்னும் செய்துக் கொண்டிருப்போமானால் நமக்குக் கண்டிப்பாகத் தண்டனை உண்டு. நாம் தண்டனைக்குத் தப்புவிக்கப்படவேண்டுமென்றால் இன்றே நாம் மனந்திரும்புவோம்.

சிந்தனை: "பாவத்தில் சிறியப் பாவம் என்றோப் பெரியப் பாவம் என்றோ இல்லை"

ஜெபம்: தேவனே நான் எப்பொழுதும் உமக்குக் கீழ்ப்படிய உமது கற்பனைகளைப் பின்பற்ற உதவி புரியும். ஆமேன்

தமிழ் வேதாகமம் படிக்க இங்கே சொடுக்கவும்

நற்கிரியை

2008-02-07T18:06:00.001+05:30

"மனுஷர் உங்கள் நற்கிரியைகளைக் கண்டு, பரலோகத்திலிருக்கிற உங்கள் பிதாவை மகிமைப்படுத்தும்படி, உங்கள் வெளிச்சம் அவர்கள் முன்பாகப் பிரகாசிக்கக்கடவது." மத்தேயு 4: 16

வெளிநாட்டில் இருந்து மிஷனெரிகள் நமது நாட்டிற்குச் சுவிஷேசம் அறிவிக்க வந்தார்கள். அவர்கள் ஒவ்வொரு இடங்களிலும் செய்த நற்கிரியைகளைக் கண்டு தான் நமது முன்னோர்கள் இயேசு கிறிஸ்துவைச் சொந்த இரட்சகராக ஏற்றுக் கொண்டார்கள். அவர்கள் செய்த நற்கிரியைகள் இன்றும் நமக்குச் சாட்சியாக இருக்கின்றது. ஆனால் இன்று நாமோ பிற மதத்தவர் இகழும் படியானக் காரியங்களைச் செய்து வருகின்றோம். ஆலயங்களிலே ஒருவருக்கு ஒருவர் பிடிக்காமல் சண்டை போட்டுக் கொண்டும், அண்டை வீட்டுக்காரர்களுடன் சமாதானமாக வாழாமல் சண்டை போட்டுக் கொண்டு காவல் நிலையத்திற்கும் நீதிமன்றத்திற்கும் அழைந்துக் கொண்டிருக்கிறார்கள்.

இப்படிப்பட்ட காரியங்களைத் தேவன் விரும்பவில்லை. நாம் நற்காரியங்கள் செய்வதைத் தான் தேவன் விரும்புகிறார். நம்மிடத்தில் நற்காரியங்கள் காணப்படவில்லை என்றால் நாம் இன்னும் இருளில் தான் இருக்கிறோம். நாம் நற்கிரியைகள் செய்யும் போது கிறிஸ்துவின் நாமம் மகிமைப்படுகின்றது. நம்மால் கிறிஸ்துவின் நாமம் மகிமைப்படும் போது நாம் தேவனுடைய சந்நிதியில் நினைக்கப்படுவோம். ஒளியாகிய கிறிஸ்து நம்மிடத்தில் காணப்படுவாராகில் கப்பல்கள் இருளான நேரத்தில் கலங்கரை விளக்கத்திலுள்ள விளக்கைப் பார்த்துச் சரியானப் பாதையில் வருவது போல மற்ற மக்களும் நம்முடைய நற்கிரியைகளைப் பார்த்து கிறிஸ்துவினிடத்தில் வருவார்கள்.

சிந்தனை: நம்முடையக் கிரியைகள் எப்படிப்பட்டவைகளாயிருக்கிறது? நற்கிரியைகளா அல்லது துர்க்கிரியைகளா?

ஜெபம்: கிருபை நிறைந்த இயேசுவே என்னுடையக் கிரியைகள் மற்றவர்களை உம்மண்டைச் சேர்க்கின்றக் கருவியாகச் செயல்படக் கிருபை புரியும். ஆமேன்.

தமிழ் வேதாகமம் படிக்க இங்கே சொடுக்கவும்

நற்கிரியை

2008-02-07T18:06:00.000+05:30

உபவாசம்

2008-02-06T19:27:00.000+05:30

வேதபகுதி: ஏசாயா 58 : 3 - 14

"விடியற்கால வெளுப்பைப்போல உன் வெளிச்சம் எழும்பி, உன் சுகவாழ்வு சீக்கிரத்தில் துளிர்த்து, உன் நீதி உனக்கு முன்னாலே செல்லும்@ கர்த்தருடைய மகிமை உன்னைப் பின்னாலே காக்கும். அப்பொழுது நீ கூப்பிடுவாய், கர்த்தர் மறுஉத்தரவு கொடுப்பார்; நீ சத்தமிடுவாய்: இதோ, நான் இருக்கிறேன் என்று சொல்லுவார். நுகத்தடியையும், விரல் நீட்டுதலையும், நிபச்சொல்லையும், நீ உன் நடுவிலிருந்து அகற்றி, பசியுள்ளவனிடத்தில் உன் ஆத்துமாவைச் சாய்த்து, சிறுமைப்பட்ட ஆத்துமாவைத் திருப்தியாக்கினால், அப்பொழுது இருளில் உன் வெளிச்சம் உதித்து, உன் அந்தகாரம் மத்தியானத்தைப்போலாகும். கர்த்தர் நித்தமும் உன்னை நடத்தி, மகா வறட்சியான காலங்களில் உன் ஆத்துமாவைத் திருப்தியாக்கி, உன் எலும்புகளை நிணமுள்ளதாக்குவார்; நீ நீர்ப்பாய்ச்சலான தோட்டத்தைப்போலவும், வற்றாத நீரூற்றைப்போலவும் இருப்பாய்."ஏசாயா 58: 8 - 11

இன்று முதல் நாம் லெந்து நாட்களை ஆசரிக்க இருக்கிறோம். இந்த நாட்களில் நாம் பண்ணுகின்ற உபவாசங்கள் எப்படிப்பட்டவைகளாக இருக்கின்றது? கடமைக்காகச் செய்கின்றோமா அல்லது உண்மையாக பரிசுத்த உணர்வோடு செய்கின்றோமா என்று நம்மை நாமே நிதானித்துப் பார்ப்போம். இந்த காலங்கள் கொடுக்கப்பட்டிருப்பதன் நோக்கம் நம்மைத் தற்பரிசோதனை பண்ணி நம்மைத் திருத்திக் கொள்வதற்காகக் கொடுக்கப்பட்டிருக்கின்றது. ஆனால் நாமோ இந்த நாட்களை ஒரு கடமைக்காகச் ஆசரித்து வருகிறோம்.

ஒரு சிலர் இந்த லெந்து நாட்களில் கண்டிப்பாக ஆலயத்திற்குத் தவறாமல் வந்து விடுவார்கள். ஒரு சிலரோ புகை மது போன்ற பழக்கங்களை இந்தக் கிருபையின் நாட்களில் விட்டு விடுவார்கள். ஆனால் ஈஸ்டர் திருநாளைக் கொண்டாடியதும் மீண்டுமாக தங்களுடையப் பாவ வாழ்க்கைக்குத் திரும்பி விடுகின்றார்கள். நமது ஆண்டவர் இப்படிப்பட்டக் காரியங்களை விரும்புவது கிடையாது. நாம் கடமைக்காக இப்படி உபவாச நாட்களை ஆசரிப்பாமானால் இறைவனின் ஆசிர்வாதம் நமக்குக் கிடைக்காது. மாறாக நாம் உண்மையுடனும் பரிசுத்தத்துடனும் ஆசரிப்போமானால் மேலே உள்ள வசனத்தில் குறிப்பிடப்பட்டுள்ள ஆசிர்வாதங்களைத் தேவன் நமக்குத் தந்தருளுவார்.

சிந்தனை: நாம் கடமைக்காக உபவாச நாட்களை ஆசரிக்கின்றோமா? அல்லது உண்மையாக ஆசரிக்கின்றோமா?

ஜெபம்: ஆண்டவரே நான் இந்தப் பரிசுத்த நாட்களை உண்மையுடனும் பரிசுத்தத்துடனும் ஆசரித்து என் ஆவிக்குரிய வாழ்வில் முன்னேற்றம் அடையக் கிருபை தாரும். ஆமேன்.

தமிழ் வேதாகமம் படிக்க இங்கே சொடுக்கவும்

இரு மனம்

2008-02-04T18:05:00.000+05:30

நீங்கள் எந்தமட்டும் இரண்டு நினைவுகளால் குந்திக்குந்தி நடப்பீர்கள்; கர்த்தர் தெய்வமானால் அவரைப் பின்பற்றுங்கள்; பாகால் தெய்வமானால் அவனைப் பின்பற்றுங்கள்" 1 இராஜாக்கள் 18:21

நர்ஸ் ஒருவருக்கு வெளிநாட்டிற்குச் சென்று சம்பாதிக்க வேண்டும் என்று நீண்ட நாட்களாக ஆசை இருந்து வந்தது. ஆனால் அவர்களுக்கு எல்லாக் காரியங்களும் தடைபட்டுக் கொண்டே வந்தது. நன்றாக ஆலயத்திற்கு வந்து ஜெபிக்கிற சகோதரி தான். அவர்களது விசுவாசம் தளர்ந்து கொண்டே போனது. அவர்களது வீட்டிற்கு அருகில் உள்ள ஒரு பெண் இவரிடம் வந்து நீங்கள் ஒரு கோயில் இருக்கிறது அங்கு அர்ச்சனை செய்தால் உங்களுக்கு ஏற்பட்டிருக்கிற எல்லாத் தடைகளும் நீங்கி விடும் என்று சொன்னார்கள். இவர்கள் வேண்டாம் எங்களது ஆண்டவர் ஏற்றக் காலத்தில் எல்லாவற்றையும் செய்ய வல்லவர் என்று நிராகரித்தார்கள். அந்த புறமதத்தைச் சார்ந்த பெண்ணும் இவரை விடவில்லை. நீங்கள் வந்து அர்ச்சனை செய்ய வேண்டாம் என்னிடம் பணம் கொடுங்கள் நான் உங்கள் பெயரில் அர்ச்சனை செய்து வருகிறேன் என்று கூறினார்கள். இந்தச் சகோதரியும் என்னதான் நடக்கிறது என்று பார்க்கலாம் என்று சொல்லி அந்தப் பெண்ணிடம் பணத்தைக் கொடுத்தார்கள். ஒரு சில நாட்களில் இவருக்கு வெளிநாடு செல்வதற்கு விசா கிடைத்தது. இவரும் வெளிநாடு சென்றார். சந்தோஷமாக விமானம் ஏறிச் சென்றார் ஆனால் அவருக்கு அங்குச் சென்ற பின் தான் மிகப் பெரிய அதிர்ச்சி காத்திருந்தது காரணம் இவருக்கு நர்ஸ் வேலை கிடைக்கவில்லை மாறாக வீட்டு வேலை தான் கிடைத்து இருந்தது.

ஆம் பிரியமானவர்களே நாமும் உலகக் காரியங்களினால் நம்மைக் கறைப்படுத்திக் கொண்டு வாழ்வோமானால் நமக்கும் இந்தச் சகோதரிக்கு ஏற்பட்ட நிலைமை தான் நமக்கும் ஏற்படும். அவர் வெளிநாடு சென்ற பின் தான் தமது தவறை உணர்ந்தார். கண்ணீர் விட்டார் ஆனால் பயன் ஒன்றுமில்லை. நாமும் இப்படித்தான் "ஆற்றிலே ஒரு கால் சேற்றிலே ஒரு கால்" என்ற பழமொழியைப் போல கிறிஸ்துவும் வேண்டும் உலகக் காரியங்களும் வேண்டும் என்று அலைவோமானால் கர்த்தர் நம்மைக் கைவிட்டுவிடுவார் நாமும் நடு ஆற்றிலே தான் விழ வேண்டியதாயிருக்கும்.

இஸ்ரவேல் ஜனங்கள் பாகால்களைச் சேவிக்கும் போது ஆண்டவர் அவர்களைக் கைவிட்டார். அது போல நாமும் உலகத்தையும் அதின் காரியங்களையும் இச்சித்துச் சேவிப்போமானால் நமக்கும் அழிவு தான் நேரிடும். நமது தனிப்பட்ட வாழ்விலும் குடும்ப வாழ்விலும் ஆசிர்வாதக் குறைவு ஏற்படும்.

சிந்தனை: "தேவனிடத்தில் சேருங்கள், அப்பொழுது அவர் உங்களிடத்தில் சேருவார். பாவிகளே, உங்கள் கைகளைச் சுத்திகரியுங்கள்; இருமனமுள்ளவர்களே, உங்கள் இருதயங்களைப் பரிசுத்தமாக்குங்கள்." யாக்கோபு 4:8

ஜெபம்: அன்புள்ள இறைவா நான் உலகத்தின் காரியங்களைப் பின்பற்றாமல் உம்மை மட்டுமே பின்பற்ற உதவி புரியும். ஆமேன்.

தமிழ் வேதாகமம் படிக்க இங்கே சொடுக்கவும்