மனக்கடினம்

"அடிக்கடி கடிந்துகொள்ளப்பட்டும் தன் பிடரியைக் கடினப்படுத்துகிறவன் சகாயமின்றிச் சடிதியில் நாசமடைவான்" நீதிமொழிகள் 29:1

அமெரிக்கத் தேசத்தில் ஒரு இனிதான மாலைப் பொழுதினில் நற்செய்தியாளர் ஒருவர் "மனந்திரும்புங்கள் பரலோக ராஜ்ஜியம் சமீபமாயிருக்கிறது; நாளையத்தினம் நடப்பதை நீ அறிய மாட்டாயே, இன்றே உனக்குக் கடைசி நாளாயிருக்கலாம் ஆகவே இன்றே மனம் திரும்பு" என்று பிரசங்கித்துக் கொண்டிருந்தார். நற்செய்திக் கூட்டம் நடந்த வழியே மர்லின் மன்றோ என்ற நடிகை வந்துக் கொண்டிருக்கிறார், அவர் நற்செய்தியைக் கேட்டதும் அதற்குச் செவிகொடுக்காமல் "எனக்குப் படப்பிடிப்பு வேலைகள் நிறைய இருக்கிறது மனம் திரும்புவதைப் பிறகு பார்க்கலாம் என்று அலட்சியமாகச் சென்று விட்டார். ஒரு சில நாட்கள் கழித்து மீண்டும் அவளுக்கு நற்செய்தியைக் கேட்கக் கூடியத் தருணம் கிடைத்தது. அப்போதும் நற்செய்தியாளர் மனந்திரும்புதலைக் குறித்துப் பிரசங்கம் பண்ணிக் கொண்டிருந்தார். அந்த வேளையிலும் அவள் தன் மனதைக் கடினப்படுத்திக் கொண்டுச் சென்று விட்டாள். அந்தோ பரிதாபம்! அன்று இரவே மனதில் அமைதி இல்லாமல் அளவிற்கு அதிகமாகப் போதை வஸ்து உண்டு மரித்தார்.

ஆம் பிரியமானவர்களே, ஆண்டவர் நமக்கும் மனந்திரும்புதலுக்கு பலத் தருணங்களை பல்வேறு ஊழியக்காரர்கள் மூலமாகவோ அல்லது வேதவசனங்கள் மூலமாகவோ எச்சரித்துக் கொண்டிருக்கிறார். நாமும் நமது மனதைக் கடினப்படுத்திக் கொண்டு இன்னமும் மனந்திரும்பாமல் இருப்போமானால் நாம் எரிகிற அக்கினிக்கடலில் தள்ளப்படுவோம். தேவன் கொடுக்கும் எச்சரிக்கையை நாம் அலட்சியப்படுத்தி மீண்டும் மீண்டும் பாவம் செய்துக் கொண்டிருப்போமானால் நமக்குச் சடுதியில் நாசம் நேரிடும் அப்பொழுது தேவன் நம்மைக் கைவிட்டு விடுவார். கடைசி நேரத்தில் நாம் கதறினாலும் நமக்கு மன்னிப்பு அருளப்படமாட்டாது. நான் என்னுடையக் கடைசிக் காலத்தில் மனந்திரும்பி விடுவேன் இப்பொழுது வாழ்க்கையை அனுபவிக்க வேண்டும் என்று நீ சொல்லுவாயாகில் "மதிகேடனே, உன் ஆத்துமா உன்னிடத்திலிருந்து இந்த இராத்திரியிலே எடுத்துக் கொள்ளப்படும், அப்பொழுது நீ சேகரித்தவைகள் யாருடையதாகும்" என்று கர்த்தர் சொல்லுகிறார்.

சிந்தனை: "நீங்கள் மனந்திரும்புங்கள், உங்களுடைய எல்லா மீறுதல்களையும் விட்டுத் திரும்புங்கள்; அப்பொழுது அக்கிரமம் உங்கள் கேட்டுக்குக் காரணமாயிருப்பதில்லை."எசேக்கியேல் 18:30


ஜெபம்: இயேசுவே என்னையே உமக்கு அர்ப்பணிக்கிறேன், நீரே என் பாவங்களையெல்லாம் கழுவிப் பரிசுத்தமாக்கும். ஆமேன்


தமிழ் வேதாகமம் படிக்க இங்கே சொடுக்கவும்